حالىقارالىق كەزدەسۋگە دەنساۋلىق ساقتاۋ مينيسترلىگى مەن ددۇ-نىڭ وكىلدەرى, امەريكانىڭ ونكولوگيالىق اۋرۋلاردى ەمدەيتىن جەتەكشى كلينيكاسى سەنت دجۋد (اۋليە يۋدە) بالالار گوسپيتالىنىڭ باسشىلارى مەن دارىگەرلەرى, قازاقستانداعى ونكولوگيالىق جانە گەماتولوگيالىق قىزمەتتىڭ دامۋىنا ۇلەس قوسىپ كەلە جاتقان رەسەيدىڭ د.روگاچەۆ اتىنداعى بالالار گەماتولوگياسى, ونكولوگياسى مەن يممۋنولوگياسى فەدەرالدىق عىلىمي-كلينيكالىق ورتالىعى (ماسكەۋ), بەلارۋستەن بالالار ونكولوگياسى, گەماتولوگياسى مەن يممۋنولوگياسى عىلىمي-پراكتيكالىق ورتالىعىنىڭ (مينسك) باسشىلارى مەن ونكولوگ-دارىگەرلەرى, سونداي-اق مولدوۆا, ۋكراينا, گرۋزيا, ارمەنيا, تاجىكستان, وزبەكستان, تۇرىكمەنستان, ازەربايجان, موڭعوليا, قىرعىز ەلدەرىنىڭ اتالعان سالالارىنىڭ جەتەكشى ماماندارى مەن ساراپشىلارى قاتىستى. ەسكە سالا كەتەيىك, ءبىرىنشى كەزدەسۋ 2018 جىلى ساۋىردە ماسكەۋ قالاسىنداعى د.روگاچەۆ اتىنداعى بالالار گەماتولوگياسى, ونكولوگياسى مەن يممۋنولوگياسى فەدەرالدىق عىلىمي-كلينيكالىق ورتالىعىندا وتكەن ەدى.
– بۇگىنگى كەزدەسۋدىڭ قازاقستان بالالار ونكولوگياسى مەن گەماتولوگياسى سالاسى ءۇشىن ماڭىزى زور, – دەدى شارانىڭ اشىلۋ سالتاناتىندا پەدياتريا جانە بالالار حيرۋرگياسى عىلىمي ورتالىعىنىڭ باسشىسى, پروفەسسور ريزا بورانباەۆا. – الەمدىك ستاندارتتارعا ساي, ساپالى جوعارى تەحنولوگيالىق مەديتسينالىق كومەكپەن قامتاماسىز ەتە وتىرىپ بالالاردىڭ دەنساۋلىعىن قورعاۋ مەن نىعايتۋ – پەدياتريا ورتالىعىنىڭ باستى ماقساتى. قازاقستانداعى ونكولوگيالىق جانە گەماتولوگيالىق قىزمەتتىڭ دامۋىنا زور ۇلەس قوسىپ كەلە جاتقان رەسەيدىڭ د.روگاچەۆ اتىنداعى ونكولوگيالىق ورتالىعىنا, ددۇ-عا جانە اقش-تىڭ سەنت دجۋد بالالار گوسپيتالىنە بۇگىنگى ماڭىزدى شارانى ۇيىمداستىرۋعا مۇرىندىق بولعاندارى ءۇشىن العىس ايتامىن. بۇل كەزدەسۋ بالالار ونكولوگيالىق قىزمەتىنىڭ دامۋىنا تىڭ سەرپىن بەرىپ, ەۋرازيالىق ايماق ساراپشىلارىنىڭ ىنتىماقتاستىعىن ودان ءارى ارتتىرا تۇسەدى, – دەدى ول.
جيىن بارىسىندا اتالعان جوبا قاتەرلى دەرتپەن كۇرەس جولىندا بارلىق قاتىسۋشى ەلدەردى بىرىكتىرىپ, جوعارى ساپالى مەديتسينالىق كومەكتى الۋعا مۇمكىندىك جاسايتىنى ونكولوگيالىق اۋرۋلارعا شالدىققان بالالاردىڭ ءومىر ءسۇرۋ ۇزاقتىعىن جاقسارتۋ جولىنداعى جاھاندىق باستامانى ىسكە اسىرۋداعى العاشقى قادام ەكەندىگى اتاپ ءوتىلدى. كەزدەسۋگە قاتىسۋشىلار ايتىلعان سالاداعى وزەكتى ماسەلەلەردى تالقىلاپ قانا قويماي, بۇگىنگى جاعدايىن ساراپتاپ, ءوزارا پىكىر الماستى. ەكى كۇن بويى وتكەن باسقوسۋدا ءار ەلدىڭ ماماندارى بالالارداعى قاتەرلى ىسىك اۋرۋلارىن دياگنوستيكالاۋ مەن ەمدەۋدىڭ زاماناۋي ءادىس-تاسىلدەرىمەن, مەديتسينالىق كومەك كورسەتۋدى ۇيىمداستىرۋداعى تاجىريبەلەرىمەن ءبولىستى.
– ءبىز قازاق ەلىنە ءبىرىنشى رەت كەلىپ وتىرمىز. ماقساتىمىز – جاھاندىق دەڭگەيدە بارلىق بالاعا قاتەرلى دەرتتى جەڭۋگە كومەكتەسۋ. الەمدەگى ءار بالا ءوز جاسىنا جەتپەي ومىردەن وتپەۋى كەرەك دەپ سانايمىز. جانە بۇل ماسەلەنى ددۇ-نىڭ الدىنا قويعان ەدىك. اتالعان ۇيىمنىڭ قولداۋىمەن ءوتىپ جاتقان بۇگىنگى شارا وسى ماقساتتىڭ العاشقى قادامى. ءبىز بارلىق تمد ەلدەرىنە كومەك كورسەتكىمىز كەلەدى. كەز كەلگەن, اتاپ ايتقاندا دارىگەرلەر مەن مەدبيكەلەردىڭ بىلىكتىلىگىن ارتتىرۋ, ءبىلىم بەرۋ, عىلىمدى دامىتۋ, ونكولوگيالىق اۋرۋلاردى دياگنوستيكالاۋ مەن ەمدەۋ ءادىس-تاسىلدەرىمەن, تەحنولوگيا, تاجىريبەمەن بولىسۋگە ءازىرمىز, – دەدى سەنت دجۋد بالالار ونكولوگيالىق گوسپيتالىنىڭ ۆيتسە-پرەزيدەنتى كارلوس رودريگەز-گاليندو.
ونىڭ پىكىرىنشە, قازاقستاندا بالالاردىڭ ونكولوگيا سالاسى ءبىر جۇيەگە تۇسىرىلگەن ەمدەۋدىڭ جوعارى دەڭگەيىندە. «بۇگىن پەدياتريا ورتالىعىن ارالاپ, جۇمىس بارىسىمەن تانىسىپ, ونكولوگيا مەن گەماتولوگيا جانە ترانسپلانتولوگيا بولىمدەرىندە بولدىق. بالالار ءۇشىن جوعارى دەڭگەيدە بارلىق جاعداي جاسالعان ەكەن. كوڭىلىمىزدەن شىقتى. اسىرەسە ورتالىقتاندىرىلعان جۇيە مەن ەمدەۋ ساپاسىنا ءتانتى بولدىق», دەپ اتاپ ءوتتى ك.رودريگەز-گاليندو.
قازىرگى تاڭدا الەمدەگى ونكولوگ, گەماتولوگ دارىگەرلەردىڭ ەڭ ماڭىزدى مىندەتتەرىنىڭ ءبىرى قاتەرلى دەرتكە شالدىققان بالالاردىڭ ءومىر ءسۇرۋ ۇزاقتىعىن ودان ءارى ۇزارتۋ. ساراپشىلاردىڭ ماسكەۋدە وتكەن ءبىرىنشى كەزدەسۋى ەۋرازيالىق ايماق-تاعى ورتاق ماسەلەلەردى انىقتاپ, بالالار ونكولوگياسى سالاسىنىڭ الداعى دامۋ باعىتىن ايقىنداپ بەرسە, ەكىنشى كەزدەسۋ بالالار مەن جاسوسپىرىمدەرگە پاللياتيۆتىك كومەك بەرۋ جۇيەسىن ۇيىمداستىرۋ جانە دامىتۋ باعىتىن, بالالار گەماتولوگياسى مەن ونكولوگياسى سالاسىنىڭ مەدبيكەلەرى ءۇشىن بىرىڭعاي سەرتيفيكاتتاۋ باعدارلاماسىن دايىنداۋ, بالالارداعى قاتەرلى ىسىك اۋرۋلارىن ەمدەۋدىڭ كەشەندى ستاندارتتارىن ازىرلەۋ, ونكولوگيالىق اۋرۋلارعا شالدىققان بالالاردىڭ بىرىڭعاي تىركەلىمدەرىن قۇرۋ ماسەلەلەرىن ناقتىلادى. سونىمەن قاتار ءبىلىمدى دامىتۋ, حاتتامالاردى ازىرلەۋ, ارنايى زەرتتەۋ توپتارىنىڭ باستى باعدارى مەن ەۋرازيالىق ايماقتاعى بالالار ونكولوگيالىق قىزمەتىن دامىتۋدىڭ باسىمدىقتارى انىقتالدى.
كەزدەسۋ اياسىندا شاراعا قاتىسۋشىلار پەدياتريا جانە بالالار حيرۋرگياسى عىلىمي ورتالىعى مەن قاتەرلى دەرتكە شالدىققان بالالاردى وڭالتۋ ورتالىعى – «الاتاۋ» رەسپۋبليكالىق كلينيكالىق شيپاجايىندا بولىپ, ەكى مەكەمەنىڭ قىزمەتىمەن تانىستى. شارانىڭ ەكىنشى كۇنى امەريكالىق پروفەسسور كارلوس رودريگەز-گاليندو پەدياتريا ورتالىعىنىڭ ونكولوگ-گەماتولوگ ماماندارى ءۇشىن ارنايى ءدارىس وقىدى.
گۇلزەينەپ سادىرقىزى,
«ەگەمەن قازاقستان»
