اتالعان قىزمەتتەردىڭ باسشىلارىنا كىلتتەردى سالتاناتتى تاپسىرۋ كەزىندە وبلىس اكىمى ەرلان قوشانوۆ پرەزيدەنتتىڭ حالىققا جولداۋىندا پوليتسەيلەردىڭ باستى مىندەتى تۇرعىنداردىڭ سەنىمىنە يە بولۋ ەكەندىگىن ايتقانىن ەسكە سالىپ, ءتارتىپ ساقشىلارى مەن قۇتقارۋشىلارعا ناتيجەلى جۇمىس تىلەدى.
– جىل سايىن وبلىستىڭ ىشكى ىستەر دەپارتامەنتى مەن توتەنشە جاعدايلار دەپارتامەنتىنىڭ ماتەريالدىق-تەحنيكالىق تۇرعىدا قامتاماسىز ەتىلۋىنە وبلىستىق بيۋدجەتتەن قاراجات بولىنەدى. وتكەن جىلى ءبىز پوليتسەيلەرگە 150 قىزمەتتىك كولىكتىڭ كىلتىن تابىس ەتسەك, بيىل ءتارتىپ ساقشىلارى تاعى 127 بىرلىك كولىككە, ال قۇتقارۋشىلارىمىز 10 بىرلىك ارنايى تەحنيكاعا يە بولدى, – دەدى ە.قوشانوۆ.
جاڭا كولىكتەردى جول پوليتسەيلەرى, وڭىرلەردەگى ءتارتىپ ساقشىلارى مەن ۋچاسكەلىك پوليتسيا قىزمەتكەرلەرى پايدالاناتىن بولادى.
– بۇل ءبىزدىڭ قوعامدىق ءتارتىپتى ساقتاۋدا, قىلمىستاردى ءىزىن سۋىتپاي اشۋ بارىسىندا جەدەلدىلىگىمىزدى ارتتىراتىن بولادى, – دەدى وبلىستىق ءىىد باستىعى مەرگەنباي جاپپاروۆ. – جىل سايىن ءبىز ەسكى تەحنيكانى شىعىسقا شىعارامىز. بيىل قىرىققا تارتا اۆتوكولىك قولدانىستان شىعارىلادى. ءالى دە بولسا اۆتوموبيل پاركىنىڭ جاڭارتىلۋىنا مۇقتاجبىز. بۇل تۇرعىدا وبلىس باسشىلىعى بىزگە ايتارلىقتاي كومەك كورسەتىپ كەلەدى.
وبلىستىق تجد باستىعى يبراگيم كۇلشىمباەۆتىڭ ايتۋىنشا, سوڭعى ەكى جىلدا ۆەدومستۆونىڭ ماتەريالدىق-تەحنيكالىق جابدىقتالۋى ايتارلىقتاي جاقسارىپ, كولىك قۇرالدارىنىڭ 20 پروتسەنتتەيى جاڭارتىلعان. ال بيىل قۇتقارۋشىلارعا ارنالعان ارنايى تەحنيكانى ساتىپ الۋعا 206,2 ملن تەڭگە جۇمسالىپتى.
– باسقا وبلىستارمەن سالىستىرعاندا, جول تالعامايتىن كولىكتەر سانىنىڭ ەڭ كوبى بىزدە. ولار كوكتەمگى سۋ تاسقىنى مەن قار باسىپ قالعان كەزدەردە دالادا ىزدەستىرۋ-قۇتقارۋ وپەراتسيالارىن ىسكە اسىرۋ ءۇشىن قاجەت. وسىعان دەيىن قالىڭ قار مەن مي باتپاقتا جۇرەتىن ءۇش كولىك بولعان, ەندى تاعى بىرەۋى ساتىپ الىندى, – دەيدى تجد باستىعى.
قۇتقارۋشىلار يە بولعان تاعى ءبىر جاڭا تەحنيكا – بەلارۋس ەلىندە شىعارىلعان 32 مەترلىك اۆتوبۇگىلمەلى ارنايى كوتەرگىش. ول ءورت سوندىرۋشىلەرگە بەس مينۋت ىشىندە توعىز قاباتتى ءۇيدىڭ توبەسىنە شىعۋعا مۇمكىندىك بەرەدى. مۇنداي ارنايى تەحنيكا ءزاۋلىم ۇيلەرى بار ءىرى قالالارعا اۋاداي قاجەت.
قايرات ءابىلدا,
«ەگەمەن قازاقستان»
قاراعاندى
