ەلباسىنىڭ بيىلعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا 2019 جىل – «جاستار جىلى» دەپ بەكىتىلگەنى بەلگىلى. سونىڭ نەگىزىندە 19-20 قازان كۇندەرى جاستار ماسەلەسىنە ارنالعان حالىقارالىق جاستار فورۋمى وتەدى.
ەلىمىزدە العاش رەت وتكەلى جاتقان بۇل فورۋمدى پارلامەنت ءماجىلىسى, قوعامدىق دامۋ مينيسترلىگى مەن حالىقتى قونىستاندىرۋ جانە دامىتۋ جونىندەگى ازيالىق اسسوتسياتسيا ۇيىمداستىرادى. فورۋم اياسىندا جاستاردىڭ مۇددەلەرى مەن قۇقىقتارىنا ارنالعان وزەكتى ماسەلەلەر تالقىلانباق.
جيىندا ءماجىلىس توراعاسى نۇرلان نىعماتۋلين, حالىقتى قونىستاندىرۋ جانە دامىتۋ جونىندەگى ازيالىق اسسوتسياتسيانىڭ توراعاسى, جاپونيانىڭ بۇرىنعى پرەمەر-ءمينيسترى ياسۋو فۋكۋدا, حالىقتىڭ قونىستانۋى جانە دامۋى جونىندەگى ازيا پارلامەنتشىلەرى فورۋمىنىڭ (حقداپف) توراعاسى كيزو تاكەمي, قوعامدىق دامۋ ءمينيسترى دارحان كالەتاەۆ جانە بۇۇ وكىلى يان ماك فارلەين جاستار ماسەلەسىنە بايلانىستى وي بولىسەتىن بولادى. سونداي-اق الەمنىڭ 37 ەلىنەن كەلگەن ساياسي ساراپشىلار, 200-دەن اسا مەملەكەتتىك ورگاندار مەن حالىقارالىق جانە ۇكىمەتتىك ەمەس جاستار ۇيىمدارىنىڭ وكىلدەرى ءوزارا تاجىريبە الماسادى.
جاستار ماسەلەسىن العا تارتقان حالىقارالىق فورۋم 4 پانەلدى سەسسيا بويىنشا وتەدى. ونىڭ بىرىنشىسىندە جاستاردىڭ ءبىلىم الۋ مۇمكىندىكتەرىن كەڭەيتۋ مەن ولاردى جۇمىسپەن قامتاماسىز ەتۋ ماسەلەلەرى تالقىلانادى. ال ەكىنشى كەزەكتە ازاماتتاردىڭ دەنساۋلىق ساقتاۋ سالاسىنداعى تۇيىتكىلدى ماسەلەلەرى ءسوز ەتىلەدى. جاستاردىڭ ەكونوميكالىق جانە الەۋمەتتىك ماسەلەلەرگە تولىق قاتىسۋى تۇرعىسىندا فورۋمنىڭ ءۇشىنشى سەسسياسىندا ايتىلادى. ءتورتىنشى سەسسيا جاھاندانۋ جاعدايىنداعى جاستاردىڭ مۇمكىندىكتەرى مەن قاۋىپ-قاتەرلەرى ءسوز بولادى. جاستار ماسەلەسىن تالقىلاۋعا ارنالعان بۇل سەسسيالار جاپونيا, قىرعىزستان, فيليپپين, تايلاند, مالايزيا, شري-لانكا جانە يندونەزيا مەملەكەتتەرىنەن كەلگەن ساراپشىلاردىڭ قاتىسۋىمەن وتەدى. جاستارعا ارنالعان ءتيىستى زاڭناما نەگىزىندە جاستاردىڭ ءار ءتۇرلى سالاداعى كەدەرگى كەلتىرەتىن ماسەلەلەرىن انىقتاۋ ارقىلى ءتيىمدى شارالار ازىرلەنەدى.
پارلامەنت ءماجىلىسىنىڭ دەپۋتاتى ب.ماكەننىڭ ايتۋىنشا, حالىقارالىق جاستار فورۋمى اياسىندا ارنايى دەكلاراتسيا قابىلداناتىن بولادى.
«فورۋم اياسىندا استانا دەكلاراتسياسى قابىلدانادى. فورۋم حالىقارالىق دەڭگەيدە وتەتىن بولعاندىقتان, قابىلدانعالى وتىرعان دەكلاراتسيا تەك قازاقستان جاستارىنىڭ عانا ەمەس, حالىقارالىق دەڭگەيدەگى ءار مەملەكەتتەگى جاستارعا دەگەن قولداۋ بولادى دەپ ەسەپتەيمىز. بۇل دەكلاراتسيا جاستاردىڭ جان-جاقتى دامۋىنا ۇلەس قوسۋى كەرەك», دەدى ب.ماكەن.
مارجان تىلەۋبەك,
«ەگەمەن قازاقستان»
