رەسەيدىڭ حالىق ءارتىسى, ەسىمى الەمگە ءماشھۇر بالەرينا, حورەوگراف التىناي اسىلمۇراتوۆا جەتەكشىلىك ەتەتىن بەكزات ونەر ورداسى بيىل ءۇشىنشى وقۋ جىلىن باستادى. وسىعان وراي «استانا بالەت» تەاترىندا اكادەميا وقۋشىلارىنىڭ تىكەلەي اتسالىسۋىمەن «ماماندىققا العاشقى قادام» اتتى جاس تالاپكەرلەردى وقۋعا قابىلداۋ قۇرمەتىنە ارنالعان سالتاناتتى كەش ءوتتى. ايتۋلى شاراعا مادەنيەت جانە سپورت ءمينيسترى ارىستانبەك مۇحامەدي ۇلى, قازاق ۇلتتىق حورەوگرافيا اكادەمياسىنىڭ رەكتورى التىناي اسىلمۇراتوۆا, بەلگىلى مادەنيەت جانە قوعام قايراتكەرلەرى, سونداي-اق جاس تالاپكەرلەردىڭ اتا-انالارى قاتىستى.
ماماندىققا العاشقى قادام باسۋ ءراسىمىن مەرەكەلەۋ – ءبىلىم الۋشى بالدىرعاندار ءۇشىن مىندەتتى ءارى ماڭىزدى مادەني شارا. ايتۋلى سيمۆوليكالىق ءىس-شارا وقۋشىلاردىڭ الدىندا قانداي قاجىرلى ىزدەنىس پەن مىندەتتىڭ كۇتىپ تۇرعانىن كورسەتەتىن جاۋاپتى ءسات. ءدال وسى كۇنى تالاپكەرلەر رەسمي تۇردە حورەوگرافيا اكادەمياسىنىڭ وقۋشىسى اتانىپ, بالەت دەيتىن سۇلۋ دا تەكتى ونەردىڭ العاشقى ءالىپبيىن اشادى. كىشكەنتاي ارتىستەر كاسىبي ساحنامەن تانىسىپ, زال تولى كورەرمەن الدىندا تۇڭعىش رەت اكادەميا رەپەرتۋارىنداعى ۇزدىك تۋىندىلاردى ورىندايدى.
وسىناۋ جاۋاپتى ءارى تولقىنىستى ساتتەگى جاس تالاپكەرلەردىڭ كەۋدەسىن جارىپ شىعارداي بولىپ اتقاقتاپ تۇرعان جۇرەگىنىڭ ءدۇرسىلى مەن قوبالجۋىن كورىپ, سەزىنۋ قيىن ەمەس. بالدىرعانداردىڭ بار ىشكى كوڭىل كۇيىن شەكسىز ءۇمىت پەن اسقاق ارمانعا تولى مۇنتازداي ءمولدىر جانارلارى ايتىپ بەرىپ تۇر. قالايشا قوبالجىماسىن؟! تەك تەلەديدار مەن ۇلكەن ساحنالاردان تامسانا تاماشالايتىن ارتىستەردىڭ ورنىندا ەندى, مىنە بۇگىن وزدەرى ونەر كورسەتپەك.
– قۇرمەتتى مەنىڭ كىشكەنتاي دوستارىم! سىزدەر بۇگىننەن باستاپ ومىرلەرىڭىزدى ونەردىڭ ىشىندەگى ەڭ ءبىر ادەمى, ەڭ ءبىر تەكتى, ەڭ ءبىر بەكزات ونەر – بالەتكە ارناپ وتىرسىزدار. ارماندارىڭىزدىڭ ورىندالۋىنا باعىتتالعان العاشقى قادام جاسالدى: ىرىكتەۋ كەزەڭىنەن ءساتتى ءوتىپ, ءبىلىم الۋشىلار قاتارىنا قابىلداندىڭىزدار. بىراق مۇنىمەن جۇمىس بىتكەن جوق, الدارىڭىزدا ءالى دە تالاي سىناق كۇتىپ تۇر. كوپ نارسەنى تانىپ, ۇيرەنىپ جانە ەڭ باستىسى ەڭبەكتى ومىرلىك ۇستانىمعا اينالدىرۋلارىڭىز قاجەت. وسىناۋ تاماشا ماماندىق بارلىعىڭىزدان كاسىپكە دەگەن شەكسىز ادالدىق پەن شىنايى دا قايتارىم كۇتپەيتىن رياسىز ماحابباتتى تالاپ ەتەدى. بويلارىڭىزداعى تالانتتى ءارى قاراي جەتىلدىرىپ, تۇلعالارىڭىزدى قالىپتا ۇستاۋ ءۇشىن دە ۇنەمى جاتتىعۋ مەن دايىندىقتان قول ۇزبەۋ مىندەتتەلەدى. سونىمەن قاتار ساباقتى جاقسى وقىپ, سان الۋان ونەر تۇرىنە ىنتا بەرىپ, ءاردايىم تانىم كوكجيەكتەرىڭىزدى كەڭەيتۋ ءۇشىن ىزدەنىستە ءجۇرۋ, ءتارتىپتى دە سىپايى مىنەز قالىپتاستىرۋ – بالەت ارتىستەرىنە قويىلاتىن باستى تالاپتاردىڭ ءبىرى. وزگە ماماندىق يەلەرىنەن تەك قانا جاقسى قاسيەت, تەرەڭ بىلىمدەرىڭىزبەن دارالانىپ تۇرۋلارىڭىز قاجەت. سەبەبى بالەت ءارتىسى – مادەنيەتىمىز بەن ونەرىمىزدىڭ بەت بەينەسى. بىلەمىن, مۇنىڭ بارلىعىن وڭاي دەمەيمىن. بىراق بالەت سونىسىمەن دە ەرەكشە عوي. ساحنادا تۇرىپ كورەرمەنگە ونەردىڭ باقىتى مەن قۋانىشىن سىيلاعان ساتتەگى ءارتىستىڭ ىشكى كوڭىل كۇيىن, ەموتسياسىن سوزبەن ايتىپ جەتكىزۋ مۇمكىن ەمەس. سوندىقتان قيىندىقتان قورىقپاڭىزدار. مەن سىزدەرگە بالەتتىڭ ۇزدىك مامانى اتانىپ, وسىناۋ بەكزات ونەردىڭ شىنايى باقىتىن سەزىنۋدى تىلەيمىن, – دەدى قازاق ۇلتتىق حورەوگرافيا اكادەمياسىنىڭ رەكتورى التىناي اسىلمۇراتوۆا.
باس شاھار تورىندە بوي تۇزەگەن جاس تا بولسا جاستىق جالىنىمەن جاڭالىقتىڭ جارشىسى بولىپ جۇرگەن بي ونەرىنىڭ ەڭسەلى ورداسى بۇگىندە الدىنا اۋقىمدى جوبالار مەن ۇلكەن ماقساتتار قويىپ ۇلگەردى جانە ونىڭ العاشقى ماڭىزدى قادامدارى جاسالىپ, تاجىريبەگە ەندى.
قازاق ۇلتتىق حورەوگرافيا اكادەمياسى – تولىق تسيكلدى, كوپ دەڭگەيلى كاسىپتىك حورەوگرافيالىق ءبىلىم بەرەتىن ورتالىق ازياداعى العاشقى جوعارى وقۋ ورنى. كاسىبي بالەت ارتىستەرىن جانە قوعامنىڭ مادەني, رۋحاني-ەستەتيكالىق دامۋىن قامتاماسىز ەتەتىن حورەوگرافيالىق ونەر سالاسىنداعى جان-جاقتى جەتىلدىرىلگەن بىلىكتى مامان دايارلاپ شىعۋدى ماقسات تۇتقان وقۋ ورداسىنىڭ الدىندا بۇگىندە ۇلكەن مىندەتتەر تۇر. ونىڭ ەڭ نەگىزگىسى – الەمدىك وقىتۋ ستاندارتتارىنا سايكەس كەلەتىن ءبىلىم بەرۋ ءادىسىنىڭ بىرەگەي مودەلىن قۇرۋ.
جالپى, بىلىكتى مامان تاربيەلەۋ ءۇشىن تەك تەوريالىق ءبىلىمدى قاناعات تۇتۋ جەتكىلىكسىز. اسىرەسە حورەوگرافيا سالاسى ىزدەنۋشىسىنەن جۇيەلى تۇردەگى تىڭعىلىقتى تاجىريبەلىك دايىندىقتى تالاپ ەتەدى. بالەت ونەرى ءۇشىن اسا ماڭىزدى وسىناۋ ءبىلىم بەرۋ ادىسىنە ءمان بەرگەن اكادەميا ۇستازدارى بۇگىندە «استانا وپەرا» جانە «استانا بالەت» تەاترلارىمەن كەلىسىمگە كەلىپ, شاكىرتتەرىنىڭ كاسىبي ساحنالاردا شەبەرلىگىن شىڭداۋىنا مول مۇمكىندىك سىيلاپ وتىر. اتاپ ايتقاندا, 2017-2018 وقۋ جىلىندا اكادەميا وقۋشىلارى مەن ستۋدەنتتەرى جالپى سانى 27 سپەكتاكلدە ونەر كورسەتىپ, كورەرمەن الدىنا شىعۋعا جولداما الدى. ولاردىڭ قاتارىندا «استانا وپەرا» تەاترىنىڭ: «بايادەركا», «دون كيحوت», «مانون», «قىز جىبەك», «كورسار», سونداي-اق «استانا بالەت» تەاترىنىڭ: «ششەلكۋنچيك», «جۋسان», «جيزەل» سىندى بىرقاتار ۇزدىك قويىلىمدارى بار.
اتالعان تاجىريبەنىڭ بارلىعى حورەوگرافيا اكادەمياسى تالاپكەرلەرىن كاسىبي تۇرعىدا جەتىلدىرىپ, بىلىكتى مامان اتاندىرۋ باعىتىندا جاسالىپ جاتقان جۇيەلى جۇمىستاردىڭ ءبىر پاراسى عانا. بۇدان بولەك, جوعارى وقۋ ورنىنىڭ تىكەلەي باستاماسىمەن اكادەميا وقىتۋشىلارى مەن تاربيەلەنۋشىلەرىنە الەمنىڭ ۇزدىك ءبىلىم وردالارىنا بارىپ تاجىريبە الماسۋىنا جاعداي جاسالىپ, كاسىبي بىلىكتىلىگىن ارتتىرۋ باعىتىندا دا تالاي تىڭعىلىقتى جۇمىس اتقارىلدى. اكادەميا رەكتورى التىناي اسىلمۇراتوۆانىڭ باستاماسىمەن ماڭىزدى مەموراندۋمدارعا قول قويىلدى. مەملەكەت باسشىسى نۇرسۇلتان نازارباەۆتىڭ قازاق ونەرى مەن مادەنيەتىن دامىتۋعا, ونەر سالاسىنداعى بىلىكتى دە ءبىلىمدى مامان تاربيەلەۋ جولىندا سالىپ جاتقان ينۆەستيتسياسى مەن كورسەتىپ جاتقان قامقورلىعى بالەت اتالاتىن سۇلۋ دا تەكتى ونەردىڭ ەرتەڭىن كەمەل ەتىپ, بەينەلى بي ءتىلى ارقىلى قازاق اتىن عالامعا تانىتادى دەپ سەنەمىز. ول ويىمىزعا كۇنى كەشە ونەر ورداسىنىڭ رەسمي تۇردەگى وقۋشىسى اتانىپ, ساحنا تورىندە ونەر كورسەتكەن كەزدەرىندە وت ويناپ, ءار قيمىلىنان سەنىمدىلىك پەن سەرگەكتىكتى ايقىن اڭعارتقان جاس تالاپكەرلەردىڭ جاستىق جالىنى مەن تاسقىنداعان تالپىنىسى كۇمانسىز يلاندىردى.
نازەركە جۇماباي,
«ەگەمەن قازاقستان»
