ەلباسى جولداۋى ارقايسىسىمىزدىڭ جارقىن كەلەشەگىمىزگە ارنالىپ وتىر. بۇگىندە قازاقستان حالقى 18 ميلليونعا جەتتى دەسەك, ءاربىر تۇرعىننىڭ وزىندىك اۋىرتپالىعى, وزىندىك قيىندىعى بار. سوندىقتان دا ءاربىر ازاماتتىڭ باسىنداعى ماسەلەلەردى بىرلەسە شەشىپ, ءبىر-بىرىمىزگە تۇسىنىستىكپەن قاراپ, بىرلەسكەن كۇش-جىگەر تانىتا بىلگەندە عانا قوعام الدەقايدا العا جىلجيدى دەپ بىلەمىن.
بۇگىندە الەمنىڭ وزىق ەلدەرىنىڭ كوشىنە ىلەسۋدە جەتكەن جەتىستىكتەرىمىز از ەمەس. الايدا تاعى دا العا جىلجىپ, دامي بەرۋ قازاقستاننىڭ الەمدىك دەڭگەيدەگى بەدەلىن ارتتىرا تۇسەتىنى ءسوزسىز. سوندىقتان دا ءاربىر قازاقستاندىق ءوزىنىڭ دامۋى, ءبىلىم الۋى مەن دەنساۋلىعىن ساقتاۋ جولىنداعى ارەكەتتەرىنە سەرگەك قاراۋى ءتيىس. سەرگەكتىك زور سەرپىن تۋدىرسا, سەرپىن ءبىزدى العا ۇمتىلۋعا جەتەلەيدى. ال ءاربىر ازاماتتىڭ قوعام الدىنداعى جاۋاپكەرشىلىگى بالاباقشادان باستاۋ الۋعا ءتيىس. وسى ورايدا اعا بۋىن وكىلدەرى مەن جاستار اراسىنداعى ساباقتاستىقتىڭ دا ءرولى ايرىقشا. قوعامنىڭ ەرەسەك وكىلدەرى جاس وسكىندى ەل كەلەشەگى ءۇشىن قىزمەت ەتۋگە جۇمىلدىرۋعا ءتيىس. قاي سالانى الساق تا ءاربىر ازاماتتىڭ دامۋىنا ەشقانداي كەدەرگىلەر بولماۋى قاجەت. وسى تۇرعىدان العاندا جەمقورلىقپەن كۇرەستى كۇشەيتۋ بارشامىزعا ورتاق مىندەت دەر ەدىم. جاستار وسىناۋ زايىرلى قوعامنان ءوزىنىڭ جارقىن كەلەشەگىن بارلاي الاتىن بولسا, وندا ەلىمىزدىڭ الار اسۋى ءالى الدا.
كازبەك مامسۋروۆ,
الماتى قالالىق قازاقستان حالقى اسسامبلەياسى توراعاسىنىڭ ورىنباسارى
