قازاقستان پرەزيدەنتىنىڭ جولداۋى ەلدىڭ باقىتتى بولاشاعىنىڭ نەگىزگى پارامەترلەرىن ايقىنداعان. جاستارعا, ءبىلىم مەن دەنساۋلىققا باسىمدىقپەن قاراۋ سونى اڭعارتادى. قازىر قازاقستان بۇرىنعىدان دا جوعارىراق دامىعان جانە وسى زامانعى تالاپتاردىڭ ۇدەسىنەن شىعاتىن ەل ەكەنىن كورسەتىپ وتىر. قازاقستاننىڭ جاھاندىق الەمدەگى ورنى مەن ءرولىن ايقىندايتىن ەكونوميكالىق باعىت – وڭدەۋ ونەركاسىبىن ارتتىرۋ مەن «بولاشاقتىڭ ەكونوميكاسى» سەكتورىن ءوسىرۋ بولسا, پرەزيدەنت ناق وسى باعداردى جانداندىرۋعا كۇش سالىپ وتىر.
«بولاشاقتىڭ ەكونوميكاسى» وتە ماڭىزدى باعىت, اسىرەسە ونىڭ بالامالى ەنەرگەتيكا سالاسى ماڭىزدى. ءبارىمىز بولاشاقتىڭ ەنەرگياسى تاقىرىبىندا قازاقستاندا ەكسپو-2017 كورمەسى وتكەنىن بىلەمىز. بۇل ونىڭ ورتالىق ازيا مەملەكەتتەرىنىڭ اراسىنان ءبىرىنشى بولىپ ءوز دامۋىنىڭ جاڭا شەشىمدەرىن تابۋعا دەگەن ۇمتىلىسىن كورسەتتى. بەرليندەگى ەۋرازيالىق كلۋبتىڭ شەڭبەرىندە قازاقستانداعى «بولاشاقتىڭ ەكونوميكاسىن» تسيفرلاندىرۋ جانە باسقا دا ەلەمەنتتەر تالقىلاۋدىڭ تاقىرىبى بولدى. وسىناۋ ديالوگتىك الاڭ 2012 جىلى قۇرىلعان ەدى, ول قازاقستان مەن گەرمانيا, سونداي-اق ەۋروپالىق وداق اراسىنداعى قوعامدىق-ساياسي ماسەلەلەردىڭ بارلىق سپەكترىن تالقىلاۋدى ماقسات ەتكەن.
پرەزيدەنتتىڭ جولداۋىنداعى بارلىق باعىتتار دا ەلدىڭ ءححى عاسىرداعى دامۋىنا اسا قاجەتتى دۇنيەلەر. قازاقستاننىڭ سىرتقى ساياساتىنداعى گەوساياسي جاۋاپكەرشىلىگىنە بايلانىستى تومەندەگى جايلارعا توقتالا كەتكىم كەلەدى. قازىر قازاقستان كوپۆەكتورلى سىرتقى ساياسات ۇستانىپ, شىعىستىڭ دا, باتىستىڭ دا ەلدەرىمەن جاقسى قارىم-قاتىناستا بولىپ وتىر. ونىڭ ۇستىنە استانادا سيريا بويىنشا كەلىسسوزدەر جۇرگىزىلۋدە, 2010 جىلى ەقىۇ-نىڭ ءسامميتىن دە وتكىزدى, سونداي-اق قازاقستان بىرنەشە حالىقارالىق ۇيىمنىڭ توراعالىعىنا سايلاندى. وسىنىڭ ءبارى قازاقستاننىڭ سىرتقى ساياساتىنىڭ بەيبىتسۇيگىش جانە دوستىققا ۇمتىلعىش سيپاتىن كورسەتەدى.
قازاقستان – وسى زامانعى تەڭگەرىمدى ساياساتتى قولداۋشى, يادرولىق قارۋ-جاراقتى جويۋ, حالىقارالىق تەرروريزم مەن باسقا دا قاتەرلەرگە قارسى كۇرەستە الەمدىك ۇيىمدارعا بەلسەندى قاتىسۋشى بولىپ وتىرعان ازياداعى از مەملەكەتتەردىڭ ءبىرى. سونداي-اق ول كيكىلجىڭدەردى شەشۋگە بەلسەنە قاتىسۋى ارقىلى الەمدىك ارەناداعى ماڭىزدى ويىنشىلار قاتارىنا شىعىپ وتىر. اۋعانستانداعى تۇراقتىلىقتى ساقتاۋ مەن بەيبىت ءومىردى قالپىنا كەلتىرۋگە قازاقستاننىڭ ارالاسىپ وتىرعانى قازىر ماڭىزدى تەتىكتەردىڭ بىرىنە اينالدى.
ماتياس دورنفەلد,
ساياساتتانۋشى, بەرليننىڭ كاسپي ايماعىن زەرتتەۋ ورتالىعىنىڭ دوتسەنتى
