كونفەرەنتسيادا ماتەماتيكا, ينفورماتيكا جانە اقپاراتتىق-ماتەماتيكالىق مودەلدەۋدىڭ وزەكتى ماسەلەلەرى, سونىمەن قاتار, جاراتىلىستانۋ پاندەرىن ساپالى وقىتۋ, تسيفرلاندىرۋ جانە اقپاراتتاندىرۋ, اقپاراتتىق جانە ەسەپتەۋ تەحنيكاسىنىڭ دامۋىنىڭ جاي-كۇيى مەن كەلەشەگى, «ينفورماتيكا» ءپانىن زەرتتەۋدىڭ ماقساتى مەن مازمۇنى, ينجەنەرلىك ءبىلىم بارىسى تالقىلاندى.
كونفەرەنتسيا جۇمىسىنا ماسكەۋ پەداگوگيكالىق مەملەكەتتىك ۋنيۆەرسيتەتىنىڭ رەكتورى, ەۋرازيالىق پەداگوگيكالىق ۋنيۆەرسيتەتتەر قاۋىمداستىعىنىڭ پرەزيدەنتى الەكسەي لۋبكوۆ, ەۋرازيالىق پەداگوگيكالىق ۋنيۆەرسيتەتتەر قاۋىمداستىعىنىڭ (EAPU) اتقارۋشى ديرەكتورى ەدۋارد نيكيتين, پومور اكادەمياسىنىڭ رەكتورى, پروفەسسور زبيگنەۆ وسادوۆسكي (پولشا, سلۋپسك ق.), پەداگوگيكالىق ۋنيۆەرسيتەتىنىڭ قۇرمەتتى رەكتورى Hans Schachl (اۆستريا), حاچاتۋرا ابوۆيان اتىنداعى ارميان مەملەكەتتىك پەداگوگيكالىق ۋنيۆەرسيتەتىنىڭ قۇرمەتتى رەكتورى سربۋي گەۆوركيان, ربا كوررەسپوندەنت-مۇشەلەرى, مقپۋ, ۆ.پ.استافەۆ اتىنداعى كراسنويار مەملەكەتتىك پەداگوگيكالىق ۋنيۆەرسيتەتى, پمۇزۋ, م.ۆ. لومونوسوۆ اتىنداعى ممۋ ۋنيۆەرسيتەتتەرىنىڭ پروفەسسورلارى جانە قازاقستان جوعارى وقۋ ورىندارىنىڭ وكىلدەرى قاتىستى.
ءىس-شارا اياسىندا «پەداگوگيكالىق STEM-پاركتىڭ» اشىلۋ سالتاناتى ءوتتى. كەڭەيتە ايتقاندا, STEM – Science, Technology, Engineering, Math باعىتتارىنىڭ باسقى ارىپتەرىنىڭ قۇرىلىمى, ال «پەداگوگيكالىق STEM-پارك» – ءبىلىم بەرۋ, عىلىم جانە بيزنەس جۇيەسىندەگى ارىپتەستىكتىڭ جاڭا فورماتى.
كونفەرەنتسيانىڭ اشىلۋىندا رەكتور تاكير بالىقباەۆ قازاقستاننىڭ پەداگوگيكا سالاسىنداعى جەتەكشى عىلىمي جانە ءبىلىم بەرۋ ورتالىعى بولىپ تابىلاتىن اباي اتىنداعى قازۇپۋ-دىڭ جەتىستىكتەرى مەن الەۋەتى تۋرالى بايانداپ, كونفەرەنتسيا تاقىرىبىنىڭ وزەكتىلىگىنە توقتالا كەلە الداعى كەزەڭدە شەتەلدىك ارىپتەستەرمەن بىرلەسە دايىندالعان جاڭا وقۋ جوسپارى جۇزەگە اساتىندىعىن اتاپ ءوتتى.
كونفەرەنتسيانىڭ ءبىرىنشى بولىمىندە Tamagawa university پروفەسسورى Seiji Moriya (جاپونيا), پروفەسسور رعا اكادەميگى, پەداگوگيكا عىلىمدارىنىڭ دوكتورى, ومبى مەملەكەتتىك پەداگوگيكالىق ۋنيۆەرسيتەتىنىڭ پروفەسسورى ميحايل لاپچيك, فيزيكا-ماتەماتيكا عىلىمدارىنىڭ دوكتورى, پەرم مەملەكەتتىك ۇلتتىق زەرتتەۋ ۋنيۆەرسيتەتىنىڭ پروفەسسورى ەۆگەني حەننەر, ممپۋ پروفەسسورى سەرگەي گريگورەۆ, قازاقستان رەسپۋبليكاسى ۇعا اكادەميگى, اقپاراتتىق جانە ەسەپتەۋىش تەحنولوگيالار ينستيتۋتىنىڭ پروفەسسورى ماقسات كاليمولداەۆ بايانداما جاساسا, اباي اتىنداعى قازۇپۋ-دىڭ ءبىرىنشى پرورەكتورى ماقتاعالي بەكتەمەسوۆ جەتەكشىلىك جاساعان كونفەرەنتسيانىڭ ەكىنشى بولىمىندە عالىمدار تسيفرلىق تەحنولوگيالاردى ءتيىمدى پايدالانۋ جولدارى, تسيفرلىق مودەلدەۋ ادىستەرى مەن گاز قوسپالارىندا كينەتيكالىق اۋىسۋ سيپاتتاماسىنىڭ ەرەكشەلىكتەرى, بيولوگيا جانە مەديتسيناداعى كەرى ارەكەتتەردى سايكەستەندىرۋ تاسىلدەرى, جوعارى ءبىلىم بەرۋدەگى پەداگوگيكالىق ولشەمدەر تاجىريبەسىنە قاتىستى پىكىرلەرىمەن ءبولىستى.
عالىمدار سونىمەن قاتار تسيفرلاندىرۋدىڭ ارتىقشىلىقتارىن پايدالانۋ مۇمكىندىكتەرىن, جوعارى وقۋ ورىندارىنىڭ وقۋ ۇردىسىنە IT-تەحنولوگيالاردى ەنگىزۋدە وتاندىق جانە شەتەلدىك تاجىريبەنى جيناقتاۋ, ءبىلىم بەرۋ ۇيىمدارىنىڭ قىزمەتكەرلەرىنىڭ ساپاسىن ارتتىرۋ جانە جەتىلدىرۋ ماسەلەلەرىنە قاتىستى دا كوكەيتەستى جايتتاردى قاراستىردى. بۇگىندە تسيفرلاندىرۋدىڭ الەۋەتى زور. وسى تۇرعىدان العاندا ونلاين-كۋرستار, ترەنينگتەر جانە ءبىلىم الۋدىڭ يننوۆاتسيالىق ادىستەرى جوعارى سۇرانىسقا يە.
قازىرگى ۋاقىتتا ءتيىستى زەرتتەۋلەر اتالعان ۋنيۆەرسيتەتتەگى ءبىلىم بەرۋدى جانە ءبىلىم بەرۋ تەحنولوگيالارىن اقپاراتتاندىرۋ ماسەلەلەرى حالىقارالىق عىلىمي زەرتحاناسى مەن «ينفورماتيكا جانە ءبىلىم بەرۋدى اقپاراتتاندىرۋ» كافەدراسىندا جۇزەگە اسۋدا.
ەكى كۇنگە سوزىلعان حالىقارالىق كونفەرەنتسيا سەسسياسى وتاندىق جانە شەتەلدىك عالىمدار ءۇشىن ءبىلىمدى تسيفرلاندىرۋ جاعدايىنداعى كوپتەگەن ماڭىزدى تاجىريبەلەرمەن بولىسۋگە مۇمكىندىك بەردى.
ەلۆيرا سەرىكقىزى,
«ەگەمەن قازاقستان»
الماتى
