عالامتوردىڭ جاستارىمىزعا پايداسى مەن زيانى قاتار تيۋدە. قازىرگى تاڭدا عالامتورعا تاۋەلدىلىكتىڭ سالدارىنان ادامداردىڭ دەنساۋلىعى عانا ەمەس, ويلاۋ, سويلەۋ, ءتىپتى جازۋ مادەنيەتى دە تومەندەپ بارادى. الەۋمەتتىك جەلىنى كىم قالاي پايدالانامىن دەسە, ءوز ەركى. وعان ەشكىم شەكتەۋ قويا المايدى. ايتسە دە جاستارىمىز ينتەرنەتتىڭ جاقسى تۇسىن ءتيىمدى پايدالانعانى دۇرىس.
جۋىردا س.جيەنباەۆ اتىنداعى وبلىستىق جاسوسپىرىمدەر كىتاپحاناسىندا «ينتەرنەتسىز ءبىر كۇن» اكتسياسى ءوتتى. شارانىڭ ماقساتى – جاستاردىڭ دەنساۋلىعىنا زيان كەلتىرەتىن اقپاراتتاردان, ناسيحات پەن ۇگىتتىڭ تەرىس ىقپالىنان قورعاۋعا اتسالىسۋ. سونىمەن بىرگە كىتاپ وقۋعا ۇندەۋ, كىتاپحانا جانىنان اشىلعان ۇيىرمە, كلۋبتارمەن تانىستىرۋ. جاستاردىڭ بوس ۋاقىتىن ينتەرنەتسىز ءتيىمدى وتكىزۋگە باۋلۋ.
شارانى اقتوبە وبلىسىنىڭ مادەنيەت, ارحيۆتەر جانە قۇجاتتاما باسقارماسىنىڭ باس مامانى گۇلجان مەيىرحانقىزى اشىپ بەردى. سونىمەن قاتار «ISMER» ەتنومادەني قولونەر ۇيىرمەسىنىڭ تۇساۋكەسەرى ءوتتى. ءسوز سويلەگەن قوناقتار ينتەرنەتتىڭ قازىرگى زامانعا ساي ءتيىمدى بايلانىس قۇرالى بولعانىمەن, ونىڭ دا زياندى تۇستارى بار ەكەندىگىن ايتىپ, جاستاردى كىتاپ وقۋعا, بوس ۋاقىتتارىن ءتيىمدى پايدالانۋى ءۇشىن كىتاپحانا كلۋبتارىنا, ۇيىرمەگە جازىلۋعا شاقىردى. شاراعا اقتوبە وبلىسىنىڭ ۇكىمەتتىك ەمەس ۇيىمدار قاۋىمداستىعىنىڭ, بۇقارالىق اقپارات قۇرالدارىنىڭ وكىلدەرى, №16 مەكتەپ وقۋشىلارى, كلۋب مۇشەلەرى قاتىستى. كىتاپحاناشىلار تەك كىتاپپەن قامتاماسىز ەتىپ قويماي, ءارتۇرلى كلۋبتارعا جەتەكشىلىك ەتەدى. جاسوسپىرىمدەردىڭ بوس ۋاقىتىن ءتيىمدى پايدالانۋىنا كومەكتەسەدى. اكتسياعا كىتاپحانانىڭ «اق قاۋىرسىن», «شاپاعات», «التىن ولكە», «بۇركىت», «سىرعالىم», «ستارت» كلۋبتارىنىڭ مۇشەلەرى قاتىستى. ءار كلۋب مۇشەلەرى وزدەرىنە بەرىلگەن تاپسىرمانى ورىندادى. يننا گوروبەتس «رودينا مويا كازاحستان», يگور كوتلوبوۆسكي «ۆوت گولۋبوي كاك نەبو فلاگ», امانشيەۆا توميريس «كازاحستان – ەتو يميا سترانى» ولەڭدەرىن وقىسا, ال مانات زاكەەۆ «قازاق ەلى» ءانىن ورىندادى.
گۇلجان ەسكەندىرقىزى,
س.جيەنباەۆ اتىنداعى وبلىستىق جاسوسپىرىمدەر كىتاپحاناسىنىڭ قىزمەتكەرى
اقتوبە
