قازاقستاننىڭ باس مەملەكەتتىك سانيتاريالىق دارىگەرى جانداربەك بەكشيننىڭ توراعالىعىمەن وڭىرلەردىڭ الداعى تۇماۋ مەن جرۆي-دىڭ ەپيدەميالىق ماۋسىمىنا دايىندىعى, سونداي-اق 2018-2019 جىلعى ەپيدماۋسىمدا سىرقاتتانۋدى ازايتۋعا باعىتتالعان ءىس-شارالار تۋرالى سەلەكتورلىق كەڭەس ءوتتى. كەڭەستە ەلىمىزدەگى ەمدەۋ ۇيىمدارىنىڭ تۇماۋعا قارسى ۆاكتسيناتسيالاۋعا, تۇماۋمەن جانە جرۆي-مەن اۋىراتىن ناۋقاستارعا باستاپقى مەديتسينالىق-سانيتاريالىق, ستاتسيونارلىق كومەك كورسەتۋگە دايىندىعى ماسەلەسى سونداي-اق حالىق اراسىندا ولاردىڭ الدىن الۋ بويىنشا قابىلدانىپ جاتقان شارالار قارالدى. ودان بولەك ۆيرۋسولوگيالىق زەرتحانالاردىڭ تۇماۋ مەن باسقا دا جرۆي-عا زەرتتەۋ جۇرگىزۋگە دايىندىعى تالقىلاندى.
ء«بىز تاۋەكەل توبىن ۆاكتسينامەن قامتاماسىز ەتۋدەگى جۇمىستاردىڭ جەتكىلىكسىزدىگىنە الاڭداپ وتىرمىز. بۇل ءبىرىنشى كەزەكتە قوستاناي وبلىسى مەن استانا قالاسىنا قاتىستى», دەدى جانداربەك بەكشين.
ونىڭ ايتۋىنشا, بارلىق مەديتسينالىق مەكەمەلەر ەپيدەميالىق ماۋسىمعا دايىن. تاۋەكەل توبىنىڭ ادامدارىن تۇماۋعا قارسى ۆاكتسيناتسيالاۋمەن قامتۋ ءۇشىن بيۋدجەتتىك قاراجاتقا «گريپپول +» رەسەيلىك ۆاكتسينا ساتىپ الىنعان. ونىڭ قۇرامىندا ا(H1N1), A(H3N2) تۇماۋىنا جانە ۆ ءتيپتى تۇماۋعا قارسى شتامدار انتيگەندەرى بار. تاۋەكەل توبىنا مەديتسينالىق باقىلاۋعا جاتاتىن, ءجيى اۋىراتىن بالالار, سابيلەر, بالالار ءۇيىنىڭ جاسوسپىرىمدەر, مۇگەدەكتەر مەن قارتتار ۇيلەرىنىڭ كونتينگەنتى, سوزىلمالى جانە جۇرەك-قان تامىرى, تىنىس الۋ اعزالارىنىڭ اۋرۋلارىمەن اۋىراتىن ادامدار, مەديتسينا قىزمەتكەرلەرى مەن جۇكتى ايەلدەر جاتادى. بۇلار اۋرۋعا بەيىم توپتار بولىپ سانالادى. رەسپۋبليكا بويىنشا تۇماۋعا قارسى ۆاكتسيناتسيالاۋدى جۇرگىزۋ ءۇشىن 3428 ەگۋ پۋنكتى ۇيىمداستىرىلعان, ولار قاجەتتى جابدىقپەن قامتاماسىز ەتىلگەن.
«استانادا ۆيرۋسقا قارسى ۆاكتسينا ماسەلەسى تۇراقتالىپ كەلەدى. قازىرگى ۋاقىتتا ەلورداعا 30 مىڭ ۆاكتسينا جەتكىزىلسە, تاعى 50 مىڭى اكەلىنەتىن بولادى. دەگەنمەن, قاجەتتىلىك تۋىنداعان جاعدايدا ولار جۇمىس بەرۋشىلەر تاراپىنان دا, دەنساۋلىق ساقتاۋ باسقارماسى تاراپىنان دا ساتىپ الىنادى دەپ ويلايمىز. ال قوستاناي وبلىسىنا 100 مىڭ ۆاكتسينا كەرەك بولسا, قازىرگى ۋاقىتتا سونىڭ 57 مىڭ دوزاسى ساتىپ الىنعان. قالعانىن ساتىپ الۋدى وتىنەمىز», دەدى ج.بەكشين.
مەديتسينالىق كومەكتى ۋاقتىلى كورسەتۋ ماقساتىندا شاقىرتۋلار مەن كونسۋلتاتسيالار ءۇشىن مەديتسينالىق ۇيىمداردا 1226 تەلەفون بولىنگەن, ۇيگە شاقىرتۋعا قىزمەت كورسەتۋ ءۇشىن 1025 بىرلىك اۆتوكولىك بولىنگەن, ال جرۆي مەن تۇماۋمەن اۋىرعان اۋىر ناۋقاستاردى ەمدەۋگە جاتقىزۋ ءۇشىن رەزەرۆتىك 5000 توسەك قورى قاراستىرىلعان.
سونىمەن بىرگە رەسپۋبليكانىڭ مەديتسينالىق ۇيىمدارىندا مامانداندىرىلعان كومەكتى كورسەتۋ ءۇشىن تۇماۋعا قارسى پرەپاراتتار قورى قۇرىلعان. قازىر قازاقستاندا 50 000 قاپتاما تاميفليۋ جانە 10 000 «رەلەنزا» پرەپاراتىنىڭ قورى بار. ستاتسيونارلار قارقىندى ەمدەۋ ءۇشىن قاجەتتى جابدىقپەن جانە قۇرالدارمەن قامتاماسىز ەتىلگەن. ءدارىحانالاردا ۆيرۋسقا قارسى پرەپاراتتار مەن ءبىر رەت قولدانىلاتىن بەتپەردەلەردىڭ جەتكىلىكتى قورى بار. وسىعان دەيىنگى جۇرگىزىلگەن اقپاراتتىق ءتۇسىندىرۋ جۇمىستارىنىڭ ناتيجەسىندە اعىمداعى جىلى قازاقستاندا ۆاكتسيناتسيادان باس تارتاتىنداردىڭ اراسىندا ۆاكتسيناتسيا جونىندەگى ءوز پىكىرلەرىن وزگەرتكەن ادامداردىڭ كۇرت ءوسۋ ءۇردىسى بايقالادى. بيىل 8 ايدا ولاردىڭ 2220-سى ەكپە العان, ال 2016 جىلى تەك 250 ادام عانا ەگىلگەن بولاتىن.
مايگۇل سۇلتان,
«ەگەمەن قازاقستان»
