ماسەلەن, اينابۇلاق اۋىلىندا 70, كەڭسايدا 79, قارابۇلاقتا 62 ۇيگە گاز قوسىلىپتى. «جۋىقتا اۋدانداعى توعىز ەلدىمەكەندى ارالاپ, گازداندىرۋ ماسەلەسى بويىنشا تۇرعىندارمەن كەزدەسۋ وتكىزدىم. گاز تارتۋ جۇمىستارى كەزەڭ-كەزەڭمەن جۇرگىزىلەتىنىن ءتۇسىندىردىم. بيىل اۋدانداعى 9 ەلدىمەكەن گازبەن تولىق قامتىلادى», - دەيدى زايسان اۋدانىنىڭ اكىمى تەمىربەك قاسىمجانوۆ.
ۇيلەرىنە گاز جەتكىزىلگەن اۋىل تۇرعىندارى ءدان ريزا. «مىنە, ۇيىمىزگە گاز كىرىپ, بار قيىنشىلىقتان ارىلعالى وتىرمىز. ەندى وت جاعىپ, كومىر تاسىپ اۋرە بولمايمىز. قاي جاعىنان الىپ قاراساق تا گازعا قوسىلۋ ءتيىمدى. قازىر قاتتى وتىننىڭ باعاسى شارىقتاپ تۇر. سونىڭ ءبارىن ەسكەرسەك, گازدىڭ پايداسى وتە مول. اۋىل تۇرعىندارى اتىنان مەملەكەتكە, اۋدان, وبلىس باسشىلىعىنا ريزاشىلىعىمىزدى بىلدىرەمىز», - دەيدى العاشقىلاردىڭ ءبىرى بولىپ گاز تارتقان اينابۇلاق اۋىلىنىڭ تۇرعىنى باقىتبەك ساسپاەۆ.
قازىرگى ۋاقىتتا زايساندا اۋىلدارعا گاز تارتۋ جۇمىستارى ەكى كەزەڭ بويىنشا جۇرگىزىلۋدە. ءبىرىنشىسى, نەگىزگى قۇبىردان اۋىلدارعا جەتكىزۋ بولسا, ەكىنشىسى, كەنتىشىلىك جانە كۆارتالىشىلىك گاز قۇبىرىن تارتۋ. اۋدان اكىمىنىڭ ايتۋىنشا, 2020 جىلعا دەيىن اۋدانداعى 37 ەلدى مەكەننىڭ 18-ءىن گازبەن قامتۋ جوسپارلانعان. «اۋداندى گازداندىرۋ تۋرالى ارنايى باعدارلاما بار. سول باعدارلاما بويىنشا زايسان قالاسىن تولىعىمەن اياقتادىق. بيىلعى باستى ماقسات – 9 ەلدى مەكەندى گازعا قوسۋ. بۇل دەگەنىڭىز – 10 مىڭ ادام. بۇعان قالاداعى 16 مىڭ ادامدى قوسساڭىز, بيىل 26 مىڭ ادام كوگىلدىر وتىنعا قول جەتكىزەدى», - دەيدى تەمىربەك قاسىمجانوۆ.
زايساننىڭ گازىن وبلىستىڭ وزگە دە اۋداندارىنا جەتكىزۋ جوسپارلانىپ وتىرعانى بەلگىلى. ىركىلىپ تۇرعان بۇل ىسكە «پرەزيدەنتتىڭ بەس الەۋمەتتىك باستاماسى» سەرپىن بەرگەندەي. ءساۋىر ايىندا وبلىسىمىزدا ماڭىزدى بەس باستامانى ىسكە اسىرۋعا ارنالعان «جول كارتاسى» ازىرلەنگەن بولاتىن. «جول كارتاسى» بويىنشا ايماقتىڭ وڭتۇستىك وڭىرلەرىن گازداندىرۋ ماسەلەسى جونىندە ارنايى جۇمىس توبى قۇرىلىپ, ىسكە كىرىسىپ كەتتى. زايسان, تارباعاتاي, ءۇرجار جانە كۇرشىم اۋداندارىنىڭ اۋىلدىق ەلدى مەكەندەرىنە ماگيسترالدى جەلىلەردى جانە اۆتوماتتاندىرىلعان گاز تاراتۋ ستانتسياسىن (اگتس) سالۋ جوباسىن حالىقارالىق قارجى ينستيتۋتتارىن تارتۋ ارقىلى جۇزەگە اسىرۋ جوسپارلانىپ وتىر. جوبا بويىنشا گاز قۇبىرلارى 4 باعىتتا سالىنىپ, ۇزىن سانى 95, 314 مىڭ ادامدى كوگىلدىر وتىنمەن قامتۋعا مۇمكىندىك تۋماق.
ازامات قاسىم,
«ەگەمەن قازاقستان»
شىعىس قازاقستان وبلىسى,
زايسان اۋدانى
