سولاردىڭ ءبىرى الماتى وبلىسىنان كوشىپ كەلگەن تالعات مۇساباەۆ قازىر مال شارۋاشىلىعىمەن اينالىسادى. باعىمىندا 20 شاقتى ءىرى قارا مالى بار. كوتەرمە اقىعا باسپانا ساتىپ الىپتى.
«بۇل جاقتا كۇن رايى سالقىنداۋ بولعانىمەن, تابيعاتى تاماشا ەكەن. مال جايىلىمى شۇيگىندى. مەملەكەتتىڭ جەڭىلدىكتى باعدارلامالارىنا قاتىسۋدى ويلاستىرىپ وتىرمىن», دەيدى مالساق جان.
تۇركىستان وبلىسىنان ات باسىن تىرەگەن مەيىربەك اشىربەكوۆ جەرگىلىكتى شارۋا قوجالىعىندا ەڭبەك ەتەدى. جالاقىسى جوعارى تۇراقتى جۇمىس تاپقانىنا قۋانۋلى. شارۋاشىلىق جاس وتباسىنى ءبىرىنشى كەزەكتە تەگىن باسپانامەن قامتاماسىز ەتىپتى.
ايتا بەرسە, مۇنداي جاعىمدى مىسالدار كوپ. جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى الما ماحمەتوۆانىڭ ايتۋىنشا, وڭتۇستىك ايماقتاردان كوشىپ كەلۋشىلەر ەكونوميكالىق الەۋەتى تۇراقتى 224 ەلدى مەكەنگە ورنالاستىرىلىپ, 255 ادام جۇمىسپەن قامتىلعان. قالعاندارى ءوز ىستەرىمەن اينالىسۋدا. بىلتىر 203 وتباسى قونىستانسا, بيىل قابىلداۋ كۆوتاسى 4 ەسەدەي كوبەيگەن. جىل سوڭىنا دەيىن ولاردىڭ قاتارى 700 وتباسىدان اسىپ جىعىلادى دەپ كۇتىلۋدە. باعدارلاما تالاپتارىنا ساي وتباسىنىڭ ءار مۇشەسىنە 85 مىڭ تەڭگە كولەمىندە سۋبسيديا بەرىلەدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
