«Astana Media Week» – ءداستۇرلى تۇردە جىل سايىن ەلىمىزدىڭ اقپارات جانە كوممۋنيكاتسيالار مينيسترلىگى ۇيىمداستىراتىن ورتالىق ازيا ايماعىنداعى كەڭ اۋقىمدى سالالىق ءىس-شارالار سەرياسى. شارانىڭ نەگىزگى ماقساتى – وتاندىق مەدياسفەرانى دامىتىپ, مەديايندۋستريامىزداعى ىسكەرلىك قارىم-قاتىناستاردى جانداندىرۋ. مەديا اپتالىققا قاتىسۋشىلار قاتارى ارتا تۇسكەنى بيىل انىق بايقالدى. سەبەبى مۇندا بىرنەشە ەلدىڭ جۋرناليستيكا مايتالماندارى تاجىريبەسىمەن ءبولىسىپ, مەديانارىقتى دامىتۋعا قاتىستى ورتاق ماسەلەلەردى كەڭىنەن تالقىلايدى. ءبىر-بىرىمەن بايلانىستارىن نىعايتىپ, ساپالى ونىمدەرىمەن الماسادى. ءۇش كۇن ىشىندە ەلىمىزدىڭ ايتۋلى مەديا شاراسى اياسىندا قاتىسۋشىلار كوممۋنيكاتسيا, مەديا-مەنەدجمەنت جانە الەۋمەتتىك جەلىلەر بويىنشا وتەتىن شەبەرلىك سىنىپتارىنا قاتىسىپ, وزدەرىنە قاجەتتى مول اقپاراتپەن سۋسىندايتىن بولادى.
بىلتىرعى «Astana Media Week» شەڭبەرىندە ەلىمىزدە العاش رەت كونتەنت-ماركەت وتكىزىلگەن بولاتىن. بيىل دا سول داستۇردەن جاڭىلماي, اشىلعان كونتەنت-ماركەت كورمەسىندە وتاندىق جانە ايماقتىق 15 تەلەارنانىڭ تانىستىرىلىم ستەندى ورناتىلىپ, كوپشىلىك نازارىنا ۇسىنىلدى. سونىمەن بىرگە كونتەنت-ماركەت كورمەسىنە ەلىمىزدىڭ بارلىق وڭىرلەرىنەن پروداكشن-كومپانيالار مەن جەتەكشى ۆەندينگتىك كومپانيالار قاتىسىپ, ولار جاڭا تەلەباعدارلامالاردىڭ, رەاليتي-شوۋلاردىڭ, مۋلتفيلمدەردىڭ, كوركەم فيلمدەر مەن دەرەكتى فيلمدەردىڭ تۇساۋكەسەرى رەتىندە, ينۆەستورلار تابۋ ماقساتىندا ءوز جوباسىن تانىستىرۋ ءۇشىن پيتچينگ وتكىزدى. ياعني كورمە اياسىندا قازاقستاندىق پروداكشن-ستۋديالار ءوز ونىمدەرىنە ينۆەستور تابۋ ماقساتىندا بەلسەندى جۇمىس اتقارۋعا, ءوز مەديا ونىمدەرىن شەتەلگە شىعارۋعا مۇمكىندىك الدى.
سەبەبى مەديا-اپتالىق قىزمەتىنە بەلارۋس, رەسەي, تۇركيا جانە وزبەكستان وكىلدەرى قاتىسۋدا. پروداكشن-كومپانيالار مەن PR قاۋىمداستىقتاردان ارنايى قاتىسىپ جاتقاندار وتاندىق مەديانارىق وكىلدەرىنىڭ شىعارماشىلىعىنا قىزىعۋشىلىق تانىتسا, ءوز كەزەگىندە ءبىزدىڭ ازاماتتار شەتەلدىك مەديا سفەرامەن بايلانىستى جاڭا دەڭگەيگە كوتەرۋگە ىنتالانارى انىق. ماسەلەن, فورۋم اياسىندا «قازاقستان» رترك» اق مەن قۇرامىنا وزبەكستاننىڭ 20-دان استام ۇزدىك ارنالارى كىرەتىن وزبەك ۇلتتىق تەلەراديوكومپانياسى اراسىندا سەرىكتەستىك جايلى مەموراندۋم بەكىتىلدى. مەموراندۋم «قازاقستان» كورپوراتسياسىنىڭ مەديااكتيۆتەرى مەن وزبەكستاننىڭ 20-دان اسا تەلەارنالارى جانە راديولارى اراسىندا ەركىن فورماتتا بىرلەسە وتىرىپ, جۇمىس جاساۋعا مۇمكىندىك بەرەدى.
«Astana Media Week» شاراسى بۇقارالىق اقپارات قۇرالدارىن, ياعني تەك قالام ۇستاعان قاۋىمدى جيناپ جاتقان جوق. اتالعان شارا مەديا سالاسىنداعى, اقپارات نارىعىنداعى ءونىم شىعارۋعا اتسالىساتىن ءتۇرلى ماماندار مەن بيلىك وكىلدەرىن توعىستىرۋدا.
قازاقستاننىڭ تسيفرلى ساۋاتتىلىق پەن بايلانىس ساپاسىن كوتەرۋ باعىتىندا جۇرگىزىپ جاتقان جۇمىستارى سوڭعى ۋاقىتتا جاڭاشا ءورىس العانى بەلگىلى. بۇل اقپارات تۇتىنۋشىلارىنىڭ تالعامىنا ۇسىنىلاتىن مەديا ءونىمنىڭ ساپاسىن ارتتىرۋعا مىندەتتەيدى. تۇپتەپ كەلگەندە, تاڭداۋدىڭ مولدىعى حالىقتىڭ وسىلايشا ءوزى قالايتىن اقپاراتتاردى تاڭداپ, وي-ءورىسىن كەڭەيتەتىنى اقيقات. زاماناۋي كونتەنتتەردىڭ كوپتىگى تۇتىنۋشى ساناسىنىڭ جاڭعىرۋىنا كومەكتەسسە, وتاندىق پروداكشن-كومپانيالارعا مەديايندۋستريا الىپتارىمەن تىكەلەي قارىم-قاتىناس جاساپ, ينۆەستورلار تارتۋىنا زور مۇمكىندىك بەرەدى. مىنە, «Astana Media Week»-ءتىڭ كوزدەپ وتىرعان نەگىزگى ماقساتتارىنىڭ ءبىرى وسى.
«قازمەديادا» باستالعان ءىرى مەديا شارانىڭ اشىلۋ سالتاناتىنا اقپارات جانە كوممۋنيكاتسيالار ءمينيسترى داۋرەن اباەۆ شەتەلدىك ارىپتەستەرى وزبەك ۇلتتىق تەلەراديوكەشەنىنىڭ توراعاسى الىشەر حادجاەۆ پەن تۇركيا راديو جانە تەلەۆيزيا كورپوراتسياسى باسقارما توراعاسىنىڭ ورىنباسارى مەحمەت يىلدىرىم, بەلارۋس اقپارات ءمينيسترىنىڭ ءبىرىنشى ورىنباسارى پاۆەل لەگكيمەن بىرگە قاتىستى.
الدىمەن اقپارات جانە كوممۋنيكاتسيالار ءمينيسترى داۋرەن اباەۆ ءسوز الىپ, ايماقتىق ءىرى مەديا-اپتالىقتى سالتاناتتى تۇردە اشتى. «ەلباسى نۇرسۇلتان نازارباەۆ وتاندىق مەديا سالانى دامىتۋعا ءاردايىم ايرىقشا كوڭىل ءبولىپ وتىرادى. وسىمەن ەكىنشى رەت ءوتىپ جاتقان اۋقىمى كەڭ شارا ەلىمىزدىڭ عانا ەمەس, ايماقتاعى مەديانارىقتى قالىپتاستىرۋعا, ودان ءارى دامىتۋعا سەرپىن بەرەدى دەپ سەنەمىن. ويتكەنى ەلوردا تورىندە قازاقستاندىق بۇقارالىق اقپارات قۇرالدارىنان بولەك, شەتەلدىك ارىپتەستەرىمىز دە ءوز ويلارىن ورتاعا سالادى. بۇل شارانىڭ باستى ماقساتى – وتاندىق مەديانارىقتى جان-جاقتى دامىتۋ, مادەني-اقپاراتتىق بايلانىستاردى تەرەڭدەتۋ. بايلانىسى مىقتى مەملەكەتتىڭ قورعانىسى دا قۋاتتى», دەگەن داۋرەن اباەۆ مەديا-اپتالىققا قاتىسۋعا نيەت ءبىلدىرۋشى ارىپتەستەردىڭ قاتارى كوبەيىپ كەلە جاتقانىن جەتكىزدى.
وزىق تاجىريبەلەرمەن تانىسۋ, پىكىر الماسۋ, شىعارماشىلىق شەبەرلىكتەرىن شىڭداۋعا, جاڭا تەحنولوگيالاردى ەل يگىلىگىنە جاراتۋ تۋرالى ۇسىنىستار مەديا-اپتالىققا قاتىسۋشىلار ءۇشىن ۇلكەن مۇمكىندىك ەكەنىنە باسىمدىق بەرە سويلەگەن مينيستر, شارانىڭ مەديا سالاسىنىڭ كاسىبي مايتالماندارىن جيناپ, قوعامداعى ماسەلەلەردىڭ كەڭ اۋقىمىن تالقىلايتىن كونسترۋكتيۆتى سۇقبات الاڭى ەكەنىنە توقتالدى.
«بۇگىندە بۇقارالىق كوممۋنيكاتسيا سالاسى – قوعامدىق دامۋدىڭ ماڭىزدى قۇرامداس بولىگىنىڭ ءبىرى. وسى ورايدا, سىزدەردىڭ تىڭ, جاڭا ويلارىڭىز, يدەيالارىڭىز اقپاراتتىق لاندشافتتى وزگەرتىپ قانا قويماي, ساياسات پەن قارجى, اۋىل شارۋاشىلىعى مەن سپورتقا دەيىنگى ارالىقتاعى ءتۇرلى سالالارداعى پروتسەستەرگە جاڭا سەرپىن بەرەدى. وسى تۇرعىدان العاندا, وزەكتى ماسەلەلەردى كەڭ تالقىعا سالۋ ماڭىزدىلىعى ارتا تۇسەدى. سەبەبى سول ارقىلى ناقتى قالاي, قانداي باعىتتا جۇمىس ىستەۋ كەرەكتىگىنىڭ الگوريتمى تۇزىلەدى. وسى ماقساتتا مەديا-اپتالىق جۋرناليستەر مەن بيلىك وكىلدەرىن عانا جيناماي, PR قاۋىمداستىقتار مەن شەتەلدىك ساراپشى مامانداردىڭ باسىن بىرىكتىرىپ وتىر. فورۋم جەرگىلىكتى باق وكىلدەرىنە دە تاجىريبە الماسۋ جانە شەبەرلىگىن شىڭداۋ ءۇشىن تاپتىرماس ءتيىمدى الاڭعا اينالىپ وتىر», دەدى مينيستر.
بۇدان سوڭ اقپارات جانە كوممۋنيكاتسيالار ءمينيسترى شەتەلدىك ارىپتەستەرىمەن بىرگە وتاندىق پروداكشن-كومپانيالار مەن تەلەارنالار ۇسىنعان كونتەنت-ماركەتتى ارالاپ, وتاندىق تانىستىرىلىم ستەندتەرىن تاماشالادى.
ءۇش كۇندىك شارانىڭ جۇمىسىنا 2 مىڭنان اسا قوناق قاتىسادى دەپ كۇتىلۋدە. ولاردىڭ قاتارىندا جەرگىلىكتى جانە شەتەلدىك مەديايندۋستريانىڭ الپىستان استام توپ-مەنەدجەرى, ياعني باسشىلارى مەن ەلۋگە جۋىق پروداكشن-كومپانيا وكىلدەرى بار. مەديا-اپتالىقتىڭ ءۇش كۇندىك باعدارلاماسى تىزىمىندە كونتەنت-ماركەت كورمەسىنەن باسقا, ايماقتىق باق-تار فورۋمىن, Astana Digital Forum شاراسىن وتكىزۋ جوسپارى بار. وندا مەديا سالاسىنداعى وزەكتى تاقىرىپتار تالقىلانادى. ماسەلەن, وتاندىق مەديانارىقتى دامىتۋ, كەلەشەكتىڭ ماماندىعى, مەديا ساۋاتتىلىق جانە ءبىلىم ماسەلەلەرى كوتەرىلەدى.
ال ەرتەڭ ەلىمىزدىڭ تۇكپىر-تۇكپىرىنەن كەلگەن جۋرناليستەر ەلورداعا جينالماق. ولار «Astana Media Week» شەڭبەرىندە وڭىرلىك باق اليانسى ۇيىمداستىراتىن ايماقتىق باق وكىلدەرىنىڭ فورۋمىنا قاتىساتىن بولادى. فورۋم باعدارلاماسىنا سايكەس ماسس-مەديا جۇمىسىنا قاتىستى زاڭنامالاردى وزگەرتۋ, مەديا ساۋاتتىلىقتى دامىتۋ, مەديانى ساندىق ترانسفورماتسيالاۋ تاقىرىپتارىنا ارنالعان بىرنەشە سەسسيالار بار.
مەديا-اپتالىقتىڭ سوڭعى كۇنى دە پايدالى شارالارعا تولى بولماق. اقپارات جانە كوممۋنيكاتسيالار مينيسترلىگى وڭىرلىك باق اليانسىمەن بىرگە ورتالىق جانە جەرگىلىكتى مەملەكەتتىك ورگانداردىڭ ءباسپاسوز قىزمەتى قىزمەتكەرلەرى مەن ءتۇرلى سالاداعى جۋرناليستەر ءۇشىن سەمينارلار وتكىزبەك. وندا ءباسپاسوز قىزمەتتەرىنىڭ وكىلدەرىنە باق-پەن ءتيىمدى جۇمىس جۇرگىزۋدىڭ, مەديا جۇمىسىنىڭ اجىراماس بولىگى SMM-ءدى (Social media Marketing) جۇرگىزۋدىڭ قىر-سىرى ۇيرەتىلەتىن بولادى. سونىمەن بىرگە, ساراپشىلار ىسكەرلىك بايلانىس ورناتۋدىڭ ماڭىزدىلىعى مەن مەديا جوسپارلاۋ تيىمدىلىگىن, زاماناۋي مەديا ترەندتەر جايىن تالقىلاپ, ستراتەگيالىق ويلاۋدى دامىتۋ قۇپيالارىمەن بولىسپەك.
«Astana Media Week»-ءتىڭ العاشقى كۇنى مەديا-كونتەنتكە تاپسىرىس بەرۋشى ءىرى تەلەۆيزيالىق جانە راديو-كومپانيالار مەن مەدياوندىرىس نارىعىنداعى جەكە كومپانيالار, پروداكشن-ستۋديالار مەن شىعارماشىلىق ۇجىمدار, پروديۋسەرلىك ورتالىقتار جانە مەدياونىمدەر ۇسىناتىن ءتۇرلى ۇيىمدار اراسىندا ىسكەرلىك بايلانىستار ورناتۋعا ارنالدى. ياعني شارا وتاندىق مەدياونىمدى ءوندىرۋ, ساتۋ-ساتىپ الۋ, شىعارماشىلىق يدەيالارمەن الماسۋدىڭ قايناعان ورتاسىنا اينالدى. مەديا-اپتالىقتىڭ العاشقى كۇنى قوناقتار قاتارىندا بولعان, ۇلتتىق برەندكە اينالىپ ۇلگەرگەن بۇركىتشى قىز ايشولپان, «توميريس» كينوفيلمىنە تۇسكەن الميرا تۇرسىن جانە باسقالار شەتەلدىك قوناقتارعا ماقتانىشپەن كورسەتەتىن وتاندىق مەديانىڭ جاڭا كەلبەتىن كورسەتتى.
اۋقىمدى شارا ەلىمىزدىڭ ايماقتارىنداعى بايلانىستىڭ جاڭا باعىتتا دامۋىنا, بيزنەس الەمىندەگى ارىپتەستەرىمەن ءتيىمدى ىسكەرلىك بايلانىستار ورناتۋعا جانە وتاندىق مەديا سالاسىنىڭ شەتەلدىك سەرىكتەستەرمەن حالىقارالىق ىنتىماقتاستىعىن نىعايتۋعا سەپتىگىن تيگىزەرى انىق.
ۆەنەرا تۇگەلباي,
«ەگەمەن قازاقستان»
