ويلى وقىرمانعا جول تارتقان ءتورت كىتاپتىڭ دا ورنى بولەك. جازۋشىنىڭ «سۋىقتوبەنىڭ ۇلارى» اتتى اڭگىمەلەر جيناعىندا بەرىلگەن ومىرلىك تاريحى بار, تانىمدىق مازمۇنعا باي «قۇت پەن جۇرت», «اق شىمىلدىق», «سۇلدە», «سۋىقتوبەنىڭ ۇلارى», «ۇرەي» جانە باسقا دا تىڭ اڭگىمەلەرى بۇگىنگى كۇننىڭ كوكەيكەستى ماسەلەلەرىن ورتاعا سالىپ وقىرماندى وي تەرەڭىنە تارتادى. ال ورىس تىلىندە شىققان «كاشكە باتىر» اتتى كىتابىنان كاشكە باتىر, انداس داتقا, سۇرانشى باتىرلاردىڭ ءومىرى جايلى قۇندى دەرەكتەردى كەزدەستىرۋگە بولادى. اڭىز-اڭگىمەلەردە قاتتالىپ تاريحتان الىنعان وقيعالار قالامگەردىڭ ويىمەن استاسىپ كوركەم كورىنىس تاپقان. سونداي-اق ورىس تىلىندە شىققان «تاۋدان تۇسكەن تۇمان» جيناعىنا دا جازۋشىنىڭ شوقتىعى بيىك ءۇش پوۆەسى مەن ءبىر توپ اڭگىمەلەرى ەنگەن. باۋىرلاس تۇرىك ەلىنىڭ زيالىلارىنىڭ ىستىق ىقىلاسىنا بولەنگەن «قۇس قاناتى» جيناعىنىڭ دا ءمان-ماڭىزى تەرەڭدە. انكارادا جارىق كورگەن جيناقتى وقىرمانعا ۇسىنعان جازۋشى ياكۋپ ومەروعلى توراعالىق ەتەتىن ەۋرازيا جازۋشىلار قاۋىمداستىعىنا قاراستى «Bengü» (بەنگۇ) باسپاسى.
سالتاناتتى شاراعا قازاقستاننىڭ تۇركياداعى ەلشىلىگىنىڭ ديپلوماتى, جازۋشى-اۋدارماشى مالىك وتارباەۆ ارنايى قاتىسىپ, قازاقستاننىڭ تۇركياداعى توتەنشە جانە وكىلەتتى ەلشىسى ابزال ساپاربەك ۇلىنىڭ قۇتتىقتاۋ حاتىن وقىپ, ناعاشىبەك قاپالبەك ۇلىنا تۇركى مادەنيەتى مەن ادەبيەتىن دامىتۋعا قوسقان ۇلەسى ءۇشىن انكاراداعى تۇركى الەمى جازۋشىلارى جانە ونەرپازدار قورىنىڭ ارنايى سىيلىعىن تابىستادى.
عالىمدار جازۋشىنىڭ كوپشىلىك قاۋىمعا ۇسىنىلعان شىعارمالارىندا كەزدەسەتىن تىڭ تەڭەۋلەر, تاريحي دەرەكتەر جوعارى وقۋ ورىندارى ستۋدەنتتەرىنىڭ ءبىلىمىن شىڭداۋعا دا قوسىمشا رەتىندە پايدالانۋعا بولاتىن تاپتىرماس قۇرال ەكەنىن ايتادى..
«قازاقتىڭ باي ادەبي ءتىلىنىڭ قورى, قولدانىستارى, ءسوز تىركەستەرى, جەكە سوزگە, جەكە سويلەمدەرگە ماعىنا سىيعىزاتىن سۋرەتكەرلىك قاسيەتى ناعاشىبەك شىعارماشىلىعىن دارالاپ تۇر. ونىڭ شىعارمالارىندا سوعىستان كەيىنگى قازاق وتباسىلارىنداعى اۋىر ءحال, جەتىمدىك, جەسىرلىك سىندى تاعى باسقا سول كەزدەردەگى پسيحولوگيالىق احۋالدى قازاقى ورتانىڭ تىلىمەن, قاراپايىم ادامداردىڭ كوزىمەن بەينەلەپ سۋرەتتەيدى. ادەبيەتتە وقىرمان كەيىپكەرگە اينالۋ دەگەن بار. ناعاشىبەك شىعارمالارىنان دا ءار وقىرمان ءوز تاعدىرىن كورەدى» دەيدى فيلولوگيا عىلىمدارىنىڭ دوكتورى, پروفەسسور تەمىرحان تەبەگەنوۆ.
ناعاشىبەك قاپالبەك ۇلى – كوپتەگەن زەرتتەۋلەر, تاريحي-تانىمدىق جيناقتار شىعارعان, ەل, جەر, تاريحىن جەتە بىلەتىن شەجىرەشى – قايراتكەر رەتىندە دە جۇرتشىلىققا جاقسى تانىمال قالامگەر. ءومىر بويى جازۋدى جانىنا سەرىك ەتكەن ونىڭ قالامىنان ورىلگەن 46 كىتاپتىڭ جارتىسىنان استامى تاريحي تاقىرىپتارعا ارنالعان. اۆتوردىڭ تۋىندىلارى كوپ جاعدايدا قازاقتىڭ شەجىرەسىنە, ادەت-عۇرپى مەن تانىم-تۇسىنىگىنە نەگىزدەلەدى. سونداي-اق ءسۇيىنباي, اباي, جامبىل سياقتى تاريحي تۇلعالاردى تانىتۋداعى ۇلەسى زور.
ارمان وكتيابر,
«ەگەمەن قازاقستان»
الماتى
