توتەنشە جاعدايلار قىزمەتىنىڭ حابارلاۋىنشا, وقيعا قىركۇيەكتىڭ 24-ءى كۇنى بولعان. سول كۇنى تاڭەرتەڭ استانا قالاسىنىڭ №2 ارنايى مامانداندىرىلعان ءورت ءسوندىرۋ بولىمىنە قالاداعى كوپقاباتتى ۇيلەردىڭ ءبىرىنىڭ 10-شى قاباتىنان كىشكەنتاي بالانىڭ قۇلاعالى تۇرعانى تۋرالى حابار تۇسكەن. ءورت سوندىرۋشىلەر كەلىپ جەتكەنشە, قۇلاپ بارا جاتقان بالانى تومەنگى قاباتتا تۇراتىن ا.كارەۆ اتتى تۇرعىن قۇتقارىپ قالادى.
«بىرەۋ سىرتقا قاراي جەتەلەگەندەي كورىندى. ارتىنشا جۇرتتىڭ ايعايىن ەستىدىم. بالكونعا اتىپ شىعىپ, تومەنگە قاراسام, قاپتاعان ادام جوعارىعا قاراپ, ايعايلاپ تۇر ەكەن. سول كەزدە ۇستىڭگى ءۇيدىڭ بالكونىنان سالبىراپ تۇرعان بالانى كوردىم. ول اناسىن شاقىرىپ, «قۇتقارىڭدار» دەپ ايعايلاپ تۇر ەكەن», دەيدى ول. ءال-دارمەنى تاۋسىلعان بالا وسى كەزدە قولىن بوساتىپ جىبەرەدى. ءساتىن سالعاندا, وڭتايلانىپ ۇلگەرگەن ا.كارەۆ ونى قاعىپ الادى.
ۇلكەن ەرلىك جاساعان ازاماتقا ب.سۇلتانوۆ سىي-سياپات تاپسىرىپ تۇرىپ, ەلوردالىقتاردىڭ, بارشا ەل تۇرعىندارىنىڭ اتىنان العىس ءبىلدىردى. ء«سىزدىڭ كەشەگى ەرلىگىڭىزگە جۇرتشىلىق شەكسىز ريزا. ءسىز ءوز ءومىرىڭىزدى قاتەرگە تىگىپ, بالانى قۇتقارىپ قالدىڭىز. بۇل كىمگە دە بولسىن ۇلگى ەتۋگە تۇرارلىق ارەكەت» دەدى ەلوردا اكىمى.
ءتيىستى ورگانداردىڭ بۇل وقيعانى نازاردان تىس قالدىرماعانىنا جانە بارشا جۇرتشىلىقتىڭ قولداۋىنا ريزاشىلىعىن بىلدىرگەن ا.كارەۆ اقشاعا ءزارۋ ەمەستىگىن ايتىپ, جالپى, مۇنداي قولداۋ ەڭ دۇرىسى ەسىك-تەرەزەسىن قوسىمشا قۇرىلعىلارمەن بەكىتۋگە جاعدايى جوقتارعا جاسالسا دەگەن تىلەگىن ءبىلدىردى.
سۆەتلانا عالىمجانقىزى
