سالتاناتتى راسىمگە وبلىس اكىمى بەردىبەك ساپارباەۆ, وبلىستىق ءماسليحات حاتشىسى ءسانيا قالدىعۇلوۆا, اقتوبە قالاسىنىڭ اكىمى ءىلياس يسپانوۆ, سونداي-اق ەلىمىزدىڭ ءار وڭىرىنەن كەلگەن بەلگىلى تۇلعالار, اتاپ ايتساق, ءانشى, قازاق كسر جانە كسرو حالىق ءارتيسى بيبىگۇل تولەگەنوۆا, سوتسياليستىك ەڭبەك ەرى, قازاق كسر-ءىنىڭ ەڭبەك سىڭىرگەن اگرونومى ۆەرا سيدوروۆا, جازۋشى, قوعام قايراتكەرى التىنشاش جاعانوۆا, اقىن, قازاقستان مەملەكەتتىك سىيلىعىنىڭ لاۋرەاتى مارفۋعا ايتقوجينا, باۋىرجان مومىش ۇلىنىڭ كەلىنى زەينەپ احمەتوۆا, ءابىش كەكىلباەۆتىڭ زايىبى كلارا جۇماباەۆا, اكادەميك, بيولوگيا عىلىمىنىڭ دوكتورى اجار جۇبانوۆا, مەديتسينا عىلىمىنىڭ دوكتورى, پروفەسسور, قازاقستان عىلىم اكادەمياسىنىڭ اكادەميگى رايسا كوزدەنباەۆا, ت.ب. قاتىستى.
شارادا وبلىس اكىمى بەردىبەك ساپارباەۆ جينالعان جۇرتشىلىقتى جاڭا ورتالىقتىڭ اشىلۋىمەن قۇتتىقتادى.
قازاقتا «اناڭدى مەككەگە ارقالاپ اپارساڭ دا, ونىڭ الدىنداعى بورىشىڭدى وتەي المايسىڭ» دەگەن ءسوز بار. سوندىقتان ءبىز, ءبارىمىز, انا الدىندا باسىمىزدى يەمىز, ولاردى ماڭگى قۇرمەتتەيمىز.
بۇگىنگى اشىلىپ وتىرعان عيمارات — اقتوبەلىكتەردىڭ انالار الدىنداعى بورىشتارىن وتەۋگە دەگەن شىنايى تىلەگى مەن نيەتىنىڭ كورىنىسى. ءبىزدىڭ ماقساتىمىز — تاريحتا ونەگەلى ءومىر سۇرگەن, بۇگىنگى كۇنى ەلىمىزدىڭ دامۋىنا سۇبەلى ۇلەس قوسقان انالارعا قۇرمەت كورسەتۋ, ولارعا تاعزىم ەتۋ, انانىڭ ادام ومىرىندەگى ورنى ەرەكشە ەكەنىن, انانىڭ سۇتىمەن ءبىزدىڭ بويىمىزعا قانداي قاسيەتتەر داريتىنىن ناسيحاتتاۋ, وبلىستاعى قىز-كەلىنشەكتەرىمىزدى سول باتىر, دانا انالارىمىزدىڭ ونەگەلى ومىرىنەن ۇلگى الۋعا شاقىرۋ. مەملەكەت باسشىسى نۇرسۇلتان نازارباەۆتىڭ «رۋحاني جاڭعىرۋ» باعدارلاماسىن جاريالاعانداعى ەڭ نەگىزگى ماقساتى — ۇلتتىق قۇندىلىقتارىمىزدى ساقتاۋ, ۇلىقتاۋ, ءوسىپ كەلە جاتقان ۇرپاقتىڭ بويىنا قازاقتىڭ سالت-داستۇرلەرىن, ۇردىستەرىن ءسىڭىرۋ. سوندىقتان بۇگىنگى اشىلىپ وتىرعان ورتالىقتا ءبىزدىڭ جاستارىمىز قازىرگى زاماننىڭ تالابىنا ساي وزىق ۇلگىلەردى ۇيرەنىپ, ابزال انالارىمىزدىڭ ومىرىنەن ونەگە الىپ, ابىرويلى, ءبىلىمدى, يماندى بولىپ وسەتىنىنە سەنەمىز.
بارلىق اقتوبەلىكتەردىڭ اتىنان بيبىگۇل احمەتقىزى باستاپ كەلگەن انالارىمىزعا, اپالارىمىزعا كوپ راقمەت ايتامىن. سونداي-اق وبلىس باسشىلىعى اتىنان وسى عيماراتتىڭ سالىنۋىنا دەمەۋشىلىك كورسەتكەن بارلىق كاسىپكەرلەرگە ريزاشىلىعىمدى بىلدىرەمىن. اقتوبەدە بوي كوتەرىپ جاتقان ورتالىقتار, ءزاۋلىم عيماراتتار وسى دەمەۋشىلەردىڭ, كاسىپورىنداردىڭ, كاسىپكەرلەردىڭ قارجىسىنا سالىنىپ جاتىر.
ەڭ نەگىزگىسى, بارىمىزگە ورتاق بۇگىنگى قۋانىش قۇتتى بولسىن! بارلىق انالارىمىز, قىز-كەلىنشەكتەرىمىز امان بولسىن! قازاق ەلىنىڭ ابىرويى ارتا بەرسىن! — دەدى وبلىس اكىمى.
بۇدان كەيىن جازۋشى, قوعام قايراتكەرى التىنشاش جاعانوۆا جينالعاندارعا جىلى لەبىزىن ءبىلدىردى.حالقىمنىڭ التىن ۇل-قىزدارىنان اينالايىن! ولاردىڭ وسىنداي جاساعان باستاماسىنا, يگىلىكتى ىسىنە مىڭ دا ءبىر راقمەت! مۇنداي عيماراتتى مەن الەمدە كەزدەستىرگەن جوقپىن. بۇل — بۇكىل دۇنيەجۇزىنە تاراتاتىنداي كەرەمەت دۇنيە. بۇل انالاردىڭ عانا ورتالىعى ەمەس, ءوسىپ كەلە جاتقان ۇل-قىزدارىمىزعا تاربيە بەرەتىن, ۇلتتىق قۇندىلىقتارىمىزدى ناسيحاتتايتىن ورتالىق دەپ سانايمىن. سوندىقتان وسى يگىلىكتى ءىستى جاساعان ازاماتتارعا مىڭ العىس! وسى باستامانىڭ قاسيەتتى اقتوبە جەرىنەن باستالىپ وتىرعانىنىڭ وزىندە ۇلكەن ءمان بار. بۇل ومىردە انادان ارتىق قاسيەتتى ەشتەڭە جوق! سوندىقتان ەندىگى ۋاقىتتا ءار ازامات ءوز اناسىن ەسىنە الىپ, تاعزىم ەتۋى ءۇشىن وسى ورتالىققا كەلۋى كەرەك. مەن وبلىس اكىمى بەردىبەك ماشبەك ۇلىنا وسى يدەياسى ءۇشىن, سونداي-اق ونى قولداپ, عيماراتتىڭ سالىنۋىنا ۇلەس قوسقان ىسكەر ازاماتتارعا ەرەكشە راقمەتىمدى ايتامىن. ۇزاق, باقىتتى ءومىر ءسۇرسىن دەپ تىلەيمىن! — دەدى ول.
شارادا مەملەكەت جانە قوعام قايراتكەرى, جازۋشى ءابىش كەكىلباەۆتىڭ زايىبى كلارا جۇماباەۆا جۇرەكجاردى تىلەگىن جەتكىزدى.
بۇگىنگى قۋانىشتارىڭىز قۇتتى بولسىن! بولاشاق ءوسىپ كەلە جاتقان ۇرپاق وسى جومارت ازاماتتاردىڭ جاساعان جاقسىلىعىن تۇسىنەتىن بولسىن! جاس ۇرپاق, سىزدەردىڭ الدارىڭىزدا كوپ مىندەت تۇر. وسى اعا-اپالارىڭنىڭ جاساعان ەڭبەگىن ارى قاراي جالعاستىرىپ, ەلىمىزدى كوركەيتە بەرىڭىزدەر! — دەدى ول.
سالتاناتتى شارادا ءانشى, قازاق كسر جانە كسرو حالىق ءارتيسى بيبىگۇل تولەگەنوۆا, سوتسياليستىك ەڭبەك ەرى, قازاق كسر-ءىنىڭ ەڭبەك سىڭىرگەن اگرونومى ۆەرا سيدوروۆا, اقىن, قازاقستان مەملەكەتتىك سىيلىعىنىڭ لاۋرەاتى مارفۋعا ايتقوجينا, باۋىرجان مومىش ۇلىنىڭ كەلىنى زەينەپ احمەتوۆا جاڭا ورتالىقتىڭ لەنتاسىن قيىپ, وبلىس اكىمى باستاعان قۇرمەتتى قوناقتار ورتالىقتى ارالاپ شىقتى.
بۇدان كەيىن ورتالىقتىڭ ۇلكەن زالىندا وبلىس اكىمى بەردىبەك ساپارباەۆ, اكادەميك, بيولوگيا عىلىمىنىڭ دوكتورى اجار جۇبانوۆا جانە مەديتسينا عىلىمىنىڭ دوكتورى, پروفەسسور, قازاقستان عىلىم اكادەمياسىنىڭ اكادەميگى رايسا كوزدەنباەۆا ءبىر توپ كوپبالالى اناعا «التىن القا» توسبەلگىسىن تابىستادى.
بۇگىننەن باستاپ وسى زال ءاردايىم وسى وڭىردەن شىققان, كوپ بالا ءوسىرىپ, تاربيەلەگەن انالاردى قۇرمەتتەيتىن, ماراپاتتايتىن زال بولادى. وسى جەردە باتىر انالارىمىزعا «التىن القا», «كۇمىس القا» توسبەلگىلەرى تابىستالاتىن بولادى. بيىلعى جىلى وبلىستا كوپ بالا تاربيەلەگەن, ەلىمىزگە ەڭبەك سىڭىرگەن انالارعا «انا داڭقى» توسبەلگىسى دايىندالىپ جاتىر.
وزدەرىڭىزگە بەلگىلى, ەلباسى نۇرسۇلتان نازارباەۆ ەلىمىزدە انالارعا ەرەكشە قۇرمەت- قوشەمەت كورسەتىپ كەلەدى. بۇگىنگى كۇنى ۇلان-بايتاق جەرىمىز قازاقستاندا 18 ميلليون ادام تۇرادى, بۇل, ارينە, از. ول ءۇشىن حالىقتىڭ سانىن كوبەيتۋىمىز كەرەك. سوندىقتان بيلىكتە جۇرگەن بىزدەر انالارعا بارلىق جاعدايدى جاساۋىمىز كەرەك. بۇگىنگى باستاما — سونىڭ ءبىر ايعاعى, — دەدى ب.ساپارباەۆ.
شارا سوڭىندا اجار جۇبانوۆا جينالعاندارعا جىلى لەبىزىن بىلدىرسە, رايسا كوزدەنباەۆا وبلىستا مەديتسينا سالاسىنىڭ قارقىندى دامىپ جاتقانىن, ال بۇل ءوز كەزەگىندە انا مەن بالا دەنساۋلىعىنا, ۇلت بولاشاعىنا جاسالىپ جاتقان ۇلكەن قولداۋ ەكەنىن اتاپ ءوتتى.
سالتاناتتى شارادان كەيىن ءانشى, قازاق كسر جانە كسرو حالىق ءارتيسى بيبىگۇل تولەگەنوۆا باستاعان توپ «انالار» اللەياسىنا شىرشا وتىرعىزىپ, كوپشىلىكپەن ەستەلىك سۋرەتكە ءتۇستى.
بۇگىن وبلىس اكىمى بەردىبەك ماشبەك ۇلىنىڭ باستاماسىمەن وبلىس ورتالىعىندا «اناعا تاعزىم» ورتالىعى اشىلىپ وتىر. ورتالىقتا ونەگەلى ءومىر سۇرگەن, ەرلىگىمەن ەستە قالعان تانىمال ايەلدەر, بەلگىلى تۇلعالاردىڭ انالارى تۋرالى كەڭ ماعلۇمات بەرەتىن مۇراجاي, پسيحولوگيالىق, كەڭەس بەرۋ كابينەتتەرى, قولدانبالى ونەر, مۋزىكالىق تاربيە بەرۋگە ارنالعان ارنايى بولمەلەر جاساقتالعان. جالپى «اناعا تاعزىم» جوباسى اياسىندا وبلىس بويىنشا 200-دەن استام ادام, 300-گە جۋىق كاسىپورىن, مۇعالجار, شالقار اۋداندارىنىڭ وندىرىستىك ۇجىمدارى ءوز ەسەپشوتتارىنان وسى ورتالىقتىڭ سالىنۋىنا قارجى اۋدارىپ, ءوز ۇلەستەرىن قوستى. سونىڭ ناتيجەسىندە بۇگىن, مىنە, اقتوبەدە وسىنداي ادەمى, ءزاۋلىم عيمارات اشىلىپ وتىر. ءبىز وتە قۋانىشتىمىز. بۇل ورتالىق تەك انالار عانا ەمەس, بارلىق ايەلدەر, قىز-كەلىنشەكتەر باس قوساتىن ورتالىق بولماق. بۇل ورتالىقتىڭ سالىنۋىنا 350 ميلليون تەڭگە قارجى جۇمسالسا, ونىڭ قۇرىلىسىن جۇرگىزۋگە 10 مىڭ ادام ۇلەس قوستى, — دەيدى اقتوبە قالاسى اكىمىنىڭ ورىنباسارى كۇلپارشىن ايدارحانوۆا.
ايتا كەتۋ كەرەك, اتالعان عيماراتتىڭ قۇرىلىسىن مەردىگەر ۇيىم «ەسات» جشس جۇرگىزسە, جوبالاۋشى ۇيىم — «رەگيونسترويپروەكت» جشس.
ءۇش قاباتتى عيماراتتا «انا داڭقى» مۋزەي-گالەرەياسى, مۋلتيمەديالىق ەكسپوزيتسيا زالى, حورەوگرافيا زالى, سونداي-اق بىرىڭعاي تاقىرىپتىق كابينەتتەر ورنالاسقان.
داناگۇل قازيحان
