شىڭعىرلاۋ اۋدانىنىڭ قۇرىلعانىنا 90 جىلدىعىنا ورايلاس كەلگەن بۇل جاڭالىقتى جەرگىلىكتى تۇرعىندار قۋانىشپەن قابىلداپ جاتىر. وڭىرلەردى دامىتۋدىڭ 2020 جىلعا دەيىنگى باعدارلاماسى اياسىندا جۇزەگە اسقان وسى ىستەردىڭ ارقاسىندا اقتاۋ, شوقتىباي, امانگەلدى, قاراعاش اۋىلدارىندا دارىگەرلىك قىزمەت كورسەتۋ ساپاسى ارتاتىن بولدى. وسى ءتورت نىساننىڭ كۇردەلى جوندەلۋىنە 61 ملن.تەڭگەگە جۋىق بيۋدجەت قارجىسى بولىنگەن.
- باتىس قازاقستان وبلىستىق دەنساۋلىق ساقتاۋ باسقارماسىنا 388 مەديتسينالىق نىسان قارايدى. سولاردىڭ 270-ءى بەيىمدەلگەن جاڭا عيماراتتاردا ورنالاسقان. ەندى قالعان عيماراتتاردى دا ءتيىستى ستاندارتقا سايكەستەندىرۋ مىندەتى تۇر. حالىقتىڭ ساپالى مەديتسينالىق ەم الۋى ءۇشىن اتقارىلىپ جاتقان جۇمىس از ەمەس. ماسەلەن, بىلتىر وڭىردە 81 نىساندى كۇردەلى جوندەۋدەن وتكىزۋ ءۇشىن جوبالىق-سمەتالىق قۇجاتتاما جاساۋعا 103 ملن. تەڭگە ءبولىندى. ونىڭ ىشىندە وسى اۋدانداعى نىساندار دا بار ەدى. بيىل 593 ملن. تەڭگە قارجىعا 21 نىساندى كۇردەلى جوندەۋدى جوسپارلاپ ەدىك. قازىر 10 عيماراتتا جوندەۋ اياقتالدى. قالعانى دا تاياۋدا تاپسىرىلادى, - دەيدىوسى وقيعاعا ارنايى كەلگەن باتىس قازاقستان وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ايزادا شۇكىرعاليەۆا.
شىڭعىرلاۋ اۋدانىنىڭ اكىمى البەرت ەساليەۆتىڭ سوزىنە قاراعاندا, سوڭعى ەكى جىل ىشىندە اۋدانداعى مەدپۋنكت, فاپ سىندى التى نىسان زامان تالابىنا ساي جوندەلگەن. ءدال قازىر اقشات اۋىلىندا مەملەكەت پەن جەكەمەنشىك ارىپتەستىگىنىڭ نەگىزىندە سۋ جاڭا فاپ عيماراتى سالىنىپ جاتىر. ول جاڭا جىل قارساڭىندا پايدالانۋعا بەرىلمەك.
قازبەك قۇتتىمۇرات ۇلى
«ەگەمەن قازاقستان»
باتىس قازاقستان
