قازاقستان ساپا جانە يننوۆاتسيالىق مەنەدجمەنتى ۇيىمى, «اتامەكەن» ۇلتتىق كاسىپكەرلەر پالاتاسى جانە ازيا ساپا جەلىسىنىڭ - ANQ ۇيىمداستىرۋىمەن وتكەن كونگرەسسكە نورياكي كانو, كلاەس بەرلين, موحامەد زايري, ۆان سەون شين, لين حاي, ت.ب. ساپا مەنەدجمەنتى سالاسىنىڭ كاسىپقويلارى قاتىستى.
كونگرەسستە «اتامەكەن» ۇلتتىق كاسىپكەرلەر پالاتاسى توراعاسىنىڭ ورىنباسارى ەلدوس رامازانوۆ «اتامەكەن» ۇكپ توراعاسى اسقار مىرزاحمەتوۆتىڭ قۇتتىقتاۋ ءسوزىن وقىپ, قازاقستاندىق كاسىپكەرلەر ءۇشىن شارانىڭ ماڭىزدىلىعىنا توقتالدى.
بۇگىندە ەكونوميكاسى دامىعان ەلدەردىڭ وزىق تاجىريبەسى ءومىردىڭ بارلىق سالاسىن قامتيدى. ال ساپا فيلوسوفياسى كەز كەلگەن قازاقستاندىق كومپانياداعى باسقارۋ جۇيەسىنىڭ اجىراماس بولىگىنە اينالۋى قاجەت. باسەكەگە قابىلەتتى ءونىم تۇتىنۋشىنىڭ جوعارى تالاپتارى مەن سۇرانىسىن قامتاماسىز ەتۋگە ءتيىس.
ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرىندە ساپا مەنەدجمەنتىنىڭ ءرولى ايرىقشا. قر تەحنيكالىق رەتتەۋ جانە مەترولوگيا كوميتەتىنىڭ توراعاسى ارمان شاققاليەۆ «جەدەل باسەكەلەستىك جاعدايىندا الەمدىك نارىقتا ءوندىرىستىڭ تەحنولوگيالىق تۇرعىدان جاڭعىرۋىن, مەنەدجمەنتتىڭ قازىرگى زامانعى يننوۆاتسيالىق جۇيەلەرىن, جاڭا باستامالار مەن ساپانى قولداۋ اسا وزەكتى بولىپ وتىر. تاجىريبەلى مەنەدجەرلەردىڭ ءبىر الاڭدا باس قوسۋى رەسپۋبليكادا حالىقارالىق ستاندارتتاردى ەنگىزۋدى جەدەلدەتۋمەن قاتار قازاقستاندىق وندىرۋشىلەر ءۇشىن ءونىمنىڭ, قىزمەت تۇرلەرىنىڭ باسەكەگە قابىلەتتىلىگىن نىعايتۋعا مۇمكىندىك بەرەتىندىگىنە» توقتالدى.
بۇگىندە ANQ ازيادا عىلىم مەن تەحنيكانىڭ دامۋىنا ىقپالداسۋ, ونەركاسىپتىڭ دامۋى مەن ادام ءومىرىنىڭ ساپاسىن جاقسارتۋدى ماقسات ەتەدى.
قاتاڭ باسەكەلەستىك جاعدايىندا ەكونوميكانىڭ بارلىق سالاسىندا كومپانيالار ءۇشىن تۇتىنۋشىمەن ۇزاق مەرزىمدى ءارى ءوزارا ءتيىمدى ارەكەتتەردىڭ ءرولى زور. ءتيىمدى قارىم-قاتىناستار قۇرۋدا تۇتىنۋشىنىڭ كوڭىلىنەن شىعۋدى باعالاۋ ادىستەرى مەن باعدارلامالار تۇراقتى جەتىلدىرىلىپ وتىرۋى ءتيىس. بۇگىندە قۇرامىنا قازاقستان, ءۇندىستان, قىتاي, وڭتۇستىك كورەيا, رەسەي, سينگاپۋر, جاپونيا, تايلاند, ت.ب. ازيانىڭ 17-دەن استام مەملەكەتتەرىنىڭ ۇلتتىق ساپا ۇيىمدارى كىرەتىن ANQ قۇرۋدىڭ باستاماشىسى, ساپا مەنەدجمەنتىنىڭ بىلگىر مامانى كانو ءادىسى تاۋارعا تۇتىنۋشى كوزىمەن قاراپ, ونىڭ قۇندى ءارى ءتيىمسىز تۇستارىن باعالاۋعا مۇمكىندىك بەرەدى. تاۋار نەمەسە قىزمەت تۇرلەرىن ۇسىنعاندا ءبىرىنشى كەزەكتە قانداي ءونىم ۇنايتىندىعىنا بايلانىستى تۇتىنۋشىلار تالاپتارىنا نازار اۋدارۋ قاجەت. عالىمنىڭ زەرتتەۋ جۇمىستارىنىڭ ناتيجەسىنە وراي كانو ءادىسى وندىرىسكە 90-جىلداردىڭ باسىنان باستاپ ەنگىزىلە باستادى.
«ازيا ساپا جەلىسى وسىدان 16 جىل بۇرىن ءوندىرىستىڭ بارلىق سالاسىندا ساپانى ارتتىرۋدى ماقسات ەتە وتىرىپ قۇرىلعان-دى. كونگرەسس اياسىندا قول قويىلعان كەلىسىمدەر قازاقستاننىڭ بارلىق كاسىپورىندارىن ساپا دەڭگەيىنە كوتەرۋگە ىقپال ەتەدى. ۇكىمەت ورگاندارىنا كاسىپكەرلەردىڭ جۇمىسىن جەڭىلدەتۋگە باعىتتالعان شارالاردى اتقارۋعا مۇمكىندىك بەرەدى. باسقارۋ, يننوۆاتسيالاردى پايدالانۋ, ساپالى ءونىم قاتارىن كوبەيتىپ, كورسەتىلەتىن قىزمەتتەردىڭ ساپاسىن ارتتىرۋداعى وزىق تاجىريبەلەرمەن ءبولىسۋدى ماقسات ەتەدى», - دەدى نورياكي كانو.
ال ساپا مەنەجدەمەنتىن باسقارۋ, قىزمەت كورسەتۋ سالالارىنداعى ەرەكشەلىكتەرى مەن ونەركاسىپتەگى باسىمدىقتارى تۇرعىسىنداعى پىكىرلەرىمەن بولىسكەن كلاەس بەرلين, موحامەد زايري, ۆان سەون شين, لين حاي ءوز تاجىريبەلەرىندەگى ساپا جۇيەسىنىڭ وزىق ۇلگىلەرىنە توقتالدى.
ازيا ساپا جەلىسىنىڭ پرەزيدەنتى ازات ءابدىراحمانوۆتىڭ ايۋىنشا, ساپا مەنەدجمەنتىن دامىتۋ, ونىڭ نەگىزگى قاعيداتتارىمەن ءبولىسۋ كەز كەلگەن كومپانيا ءۇشىن ماڭىزدى. عالامدىق ەكونوميكالىق داعدارىستار كەزەڭى ءوندىرىس ورىندارىنان ساپانى ارتتىرۋدى تالاپ ەتەدى. بۇگىندە دامىعان ەلدەر ەكونوميكاسىن ۇلگى ەتە وتىرىپ, جاپونيا, وڭتۇستىك-شىعىس ازياداعى ساپا مەنەدجمەنتىنە نازار اۋدارۋعا ءتيىسپىز. ساپا باعانىڭ تومەندەۋىنە عانا ەمەس, جەمقورلىقپەن كۇرەسۋگە دە مۇمكىندىك بەرەدى. قازاقستان ءۇشىن ونەركاسىپ الاڭدارىنا ساپا مەنەدجمەنتىن ەنگىزۋ ۋاقىت كۇتتىرمەيتىن ماسەلە. وسى تۇرعىدا باسقارۋ جۇيەسىنىڭ, ماماندار وقىتۋدىڭ ماڭىزى جوعارى. ساپا جاڭا تەحنولوگيالاردى يگەرىپ, ونى وندىرىسكە ەنگىزۋمەن شەكتەلمەيدى. كومپانيانىڭ بەدەلى, تاۋاردىڭ زور سۇرانىسقا يە بولۋى ساپا ساياساتىن, ساپا ستراتەگياسىن مەڭگەرگەن مەنەدجەرلەردىڭ بىلىكتىلىگىمەن بايلانىستى.
كونگرەسستە ANQ مەن «اتامەكەن» ۇكپ اراسىندا قازاقستاندىق بيزنەسمەندەر, كاسىپەرلەر ءۇشىن كومپانيالاردى باسقارۋدىڭ ەڭ وزىق ۇلگىلەرىمەن تانىستىرۋدى, باسەكەگە قابىلەتتىلىككە قول جەتكىزۋدە اقپارات الماسۋ مەن ءوندىرىس ورىندارىنىڭ ونىمدەرى, كورسەتەتىن قىزمەتتەرىنە باعىتتالعان كەلىسىمگە قول قويىلىپ, ANQ قۇرمەتتى پرەزيدەنتى نورياكي كانو سالاداعى ۇزدىك مەنەدجەرلەرگە ارنايى سىيلىقتار تاپسىردى.
كونگرەسس شەڭبەرىندە كاسىپورىندار اراسىندا ىنتىماقتاستىققا قول جەتكىزىلىپ, قازاقستاندىق وندىرۋشىلەردىڭ كورمەسى اياسىندا حالىقارالىق ىقپالداستىق كەلىسىمدەرىنە قول قويىلدى.
كونگرەسس ء«بىر بەلدەۋ – ءبىر جول» باعدارلاماسى اياسىندا حالىقارالىق ساپا اليانسىنىڭ فورۋمى, ANQ وتىرىستارى, سيمپوزيۋممەن جالعاسىن تاپتى.
ەلۆيرا سەرىكقىزى,
«ەگەمەن قازاقستان»
الماتى
