ءمولدىر ساعىندىقوۆا سۋرەت ونەرىن بۇكىل ونە بويىنان وتكىزىپ, ونىڭ قادىر-قاسيەتىن ەس بىلگەننەن-اق جادىنا توقىپ وسكەن كاسىبي سۋرەتشى. ورىمدەي قىزدى وسىناۋ الەمگە ىڭكار ەتكەن تۋعان جەردىڭ تۇمسا تابيعاتى مەن اكە تاربيەسى بولسا كەرەك. اكەسى دە قولونەر شەبەرى. پەرزەنتىنىڭ بويىنان تالانت ۇشقىنىن بايقاعان ول, قىزىنىڭ بولاشاعىنان زور ءۇمىت كۇتىپتى. اكە ءۇمىتى مەن ونەرگە دەگەن قۇشتارلىق قارشاداي قىزدى ارمان ارقالاتىپ قالاعا اتتاندىرعان.
– ءوز قاتارلاستارىنىڭ ىشىندە باتىل, شوقتىعى بيىك, تۇستەرى قانىق قىزدارىمىزدىڭ ءبىرى ءمولدىر. تۇستەردى ەمىن-ەركىن قورىقپاي پايدالانۋى, اشىق قاراڭعى تۇستارىن تاڭبالارمەن العاندا ەركىن كوسىلتىپ سالاتىنى, تۇستەردى قۇبىلتۋى, ويناتۋى ارعى جاعىمىزدان كەلە جاتقان رۋحىمىزدىڭ بيىكتىگىن كورسەتىپ تۇرادى. كەنەپ بەتىن دۇرىس شەشىممەن پايدالانادى, كومپوزيتسيالىق شەشىمى وزگەلەرگە ۇقسامايدى. بىرىزدىلىكتەن, ەلىكتەۋدەن ادا. ءوز جولىن تاۋىپ, ومىرگە جاڭالىق اكەلگىسى كەلەدى. دارالىققا دەگەن ۇمتىلىس, جاڭالىققا قۇشتارلىق, ەرەكشەلىك تابۋعا دەگەن تالپىنىس ونىڭ ىشكى دۇنيەسىنەن سىر بەرەدى. شىنايىلىق بار. تۋا بىتكەن تالانتى مەن وسى اتالعان قاسيەتتەرى ونى ۇلكەن شىعارماشىلىق جولعا اكەلەدى دەپ سەنەمىن, – دەيدى قازاقستان سۋرەتشىلەر وداعىنىڭ مۇشەسى شاتتىق باتان.
ونىڭ كارتينالارى شەبەرلىكپەن ستيليستيكالىق مادەنيەتكە, ەرەكشە كوڭىل-كۇيگە, ماحاببات پەن مەيىرىم شۋاعىنا تولى. تۇسپەن جانە فورمامەن, كەڭىستىكپەن جانە سىزىقپەن باتىل جۇمىس ىستەيدى, سەزىم سىرى رۋحتىڭ كۇشىمەن ورىلە بىتكەن جىگەرلى دە كوركەم, سيقىرلى وبرازدار تۋدىرادى. كەيىپكەرلەرىن ءومىردىڭ وزىنەن, اينالاسىنداعى ادامداردان ىزدەيدى. ۇيىقتاپ جاتقان ستۋدەنت, ارمانداپ وتىرعان قىز, كەشكى قوناق سىندى تۇرمىستىق تاقىرىپتاردا ورىلگەن كارتينالارىندا جانعا جايلى جىلىلىق بار. ءۇمىت, ارمان, ساعىنىش, مۇڭ سەكىلدى سەزىمدەردى كەنەپ بەتىندەگى كەيىپكەرلەرى ارقىلى بەرەدى.
«سۋرەت سالۋ مەن ءۇشىن كادىمگى تەراپيا ىسپەتتى. كوڭىلىم قۇلازىعاندا نەمەسە قاتتى قۋانعان ساتتە شابىتتانامىن. كوڭىل-كۇيىم بولماعاندا ايناداعى ءوز بەينەم ارقىلى كومپوزيتسيا سالامىن, سول كەزدە جانىم راحات تاۋىپ كوڭىلىم كوتەرىلەدى. وسىنداي شاقتاردا سالىنعان جۇمىستار كوبىنە-كوپ ءساتتى شىعادى. اسىرەسە ءوز تۋعان جەرىمدى, بالالىق شاعىمدى بەينەلەگىم كەلەدى. تاۋ باۋرايىنا بارىپ تابيعاتقا شىنايى قاراپ تۇرىپ سالعاندى جانىم سۇيەدى. وسىلاي سالىنعان ەتيۋدتەر فوتوسۋرەتكە قاراعاندا سول كەزدەگى سەزىمدەردى ءساتتى بەرە الادى» دەيدى ءمولدىر.
تەرەزەگە قاراپ تەلمىرىپ وتىرعان بەيتانىس ارۋدىڭ جانارىندا جاسىرىنعان مولتەك سىر, اينا الدىندا ءوز بەينەسىن سومداۋ ارقىلى ءوز بولمىسىنىڭ سۋرەتىن كورسەتكىسى كەلگەن سۋرەتشى قىز ءسىزدى دە ءوز جان-دۇنيەڭىزدىڭ ايناسىنا ۇڭىلۋگە شاقىرادى.
ارمان وكتيابر,
«ەگەمەن قازاقستان»
الماتى
