ەلباسى ءوزىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «تۋعان جەر» باعدارلاماسىن قولعا الۋ كەرەكتىگىن ايتا كەلىپ, «تۋعان جەرگە, ونىڭ مادەنيەتى مەن سالت-داستۇرلەرىنە ايرىقشا ىڭكارلىكپەن اتسالىسۋ – شىنايى ءپاتريوتيزمنىڭ ماڭىزدى كورىنىستەرىنىڭ ءبىرى» دەگەن بولاتىن. بۇل رەتتە «تۋعان جەر» باعدارلاماسى اياسىندا جامبىل وڭىرىندە دە بىرقاتار جوبالار قولعا الىنىپ كەلەدى.
ماسەلەن «قازفوسفات» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى, قازاقستاننىڭ ەڭبەك ەرى مۇقاش ەسكەندىروۆ, تاراز يننوۆاتسيالىق-گۋمانيتارلىق ۋنيۆەرسيتەتىنىڭ رەكتورى ەربولات ساۋرىقوۆ, «ارايسترويماركەت» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ارمان ەدىلباەۆ جانە وزگە دە ازاماتتار «تۋعان جەر» باعدارلاماسى اياسىندا 543 ميلليون تەڭگەنىڭ جۇمىسىن جۇزەگە اسىرۋدا.
سونىمەن قاتار, شۋ اۋدانىنىڭ بەلباسار اۋىلىندا بولات ساۋرانباەۆ قۇنى 350 ميلليون تەڭگە بولاتىن سپورت كەشەنىنىڭ قۇرىلىسىن جۇرگىزۋدە. مۇنىڭ بارلىعى دا ازاماتتاردىڭ تۋعان جەرگە تارتۋى, اتالعان باعدارلامانىڭ لايىقتى جۇزەگە اسىپ كەلە جاتقانىنىڭ كورىنىسى.
جۋىردا تاراز قالالىق اكىمدىگىندە وتكەن قايىرىمدىلىق شاراسى كەزىندە «تۋعان جەر» جوباسى اياسىندا كاسىپقوي بوكستان ايەلدەر اراسىندا ەلىمىزدەن شىققان تۇڭعىش الەم چەمپيونى فيرۋزا شاريپوۆا از قامتىلعان جولدىباەۆتار وتباسىنا «Renault Iogan» اۆتوكولىگىن سىيلاپ, كومەك كورسەتتى. شاريپوۆا كوپشىلىككە ەكى سالماق دارەجەسىندە WIBA, WBC (silver), IBO تۇجىرىمدارى بويىنشا الەم چەمپيونى رەتىندە تانىمال. كاسىپكەر بولماسا دا قايىرىمدىلىق قاعيداتىن بەرىك ۇستانعان قارشاداي قىزدىڭ بۇل ارەكەتىنە كوپشىلىك قۋاندى. شارا بارىسىندا تاراز قالاسىنىڭ اكىمى عالىمجان ءابدىرايىموۆ تا فيرۋزانىڭ بۇل كومەگى كوپكە ۇلگى ەكەنىن اتاپ وتكەن ەدى.
قايىرىمدىلىق جاساۋ ءاربىر جاعدايى كەلگەن ادامنىڭ پارىزى. ادامشىلىق تۇرعىسىنان دا سولاي. بىراق فيرۋزا بۇل قايىرىمدىلىقتى ءوزىن ناسيحاتتاۋ ءۇشىن جاساماعانىن ايتادى. قايتا ەلباسىنىڭ «تۋعان جەر» باعدارلاماسى شەڭبەرىندە ءاربىر جاعدايى كەلگەن ازامات از قامتىلعان وتباسىنا كومەك قولىن سوزسا ەكەن دەيدى. راسىندا دا وڭىردە قايىرىمدىلىققا مۇقتاج قانشاما ادام بار. سولاردىڭ جانىنا دەمەۋ, كوڭىلىنە مەدەۋ جاندار كوپ بولسا, بۇل دا ەلدىكتىڭ كورىنىسى.
ال اۆتوكولىك يەسى اتانعان ءتورت بالانىڭ اناسى ريزا سەيىلجانوۆا ءۇشىن بۇل كۇتپەگەن جاعداي بولىپتى. الايدا ەكى بىردەي مۇمكىندىگى شەكتەۋلى بالانى ءوسىرىپ وتىرعان انانىڭ فيرۋزاعا العىسى شەكسىز. بۇگىندە نۇراسىل مەن ەراسىل ون ءبىر جاسقا كەلىپتى. «بۇرىن بالالاردى كوتەرىپ جۇرە بەرەتىنمىن. قازىر قيىن. بۇگىن كومەك كورسەتىپ وتىرعان فيرۋزعا العىسىم شەكسىز. جەڭىستەن جەڭىسكە جەتە بەرۋىنە تىلەكتەسپىن», دەيدى ريزا انا. سول جيىنعا قاتىسقان جۇزۋدەن ريو-دە-جانەيرو پاراليمپياداسىنىڭ چەمپيونى ءزۇلفيا عابيدۋللينا دا ريزاشىلىعىن ءبىلدىردى. ال دالاعا شىعىپ, قالا اكىمى مەن چەمپيون قىز اۆتوكولىك يەسى اتانعان انانى كولىككە القالاپ مىنگىزگەندە, قۋانباعان جان قالمادى دەۋگە بولادى.
«باتامەنەن ەل كوگەگەر» دەيدى حالقىمىز. جۇرەگى تۋعان ەل دەپ سوققان فيرۋزا شاريپوۆانى بۇل رەتتە «تۋعان جەرگە تۋىڭ تىك!» اكتسياسىن جالعاعان ازاماتتار قاتارىنان كوردىك. كوردىك تە سۇيسىندىك. ونىڭ قازاقتىڭ تۋىن الەم الدىندا اسقاقتاتار كۇنى لايىم كوپ بولسىن دەپ تىلەدىك!
حاميت ەسامان,
«ەگەمەن قازاقستان»
جامبىل وبلىسى
