بۇگىن استانا قالاسىندا VI قازاقستان ماشينا جاساۋشىلارى فورۋمى باستالدى. فورۋمنىڭ تاقىرىبى: ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى».
مەيرام پىشەمباەۆ فورۋم جۇمىسىنا اقش, گەرمانيا, يتاليا, رەسەي, تۇركيا, قحر جانە ت.ب. سەكىلدى الەمنىڭ 20 ەلىنەن 1000-نان استام دەلەگات قاتىساتىنىن اتاپ ءوتتى.
«فورۋم قاتىسۋشىلارى جىلدان جىلعا ساندىق ءارى ساپالىق جاعىنان ارتىپ كەلەدى. قازاقستان ماشينا جاساۋشىلارىنىڭ جىل سايىنعى فورۋمى ماشينا جاساۋشىلار سالاسىنىڭ ماڭىزدى ويىنشىلارى قاتىساتىن بىرەگەي الاڭ رەتىندە تانىلدى. فورۋم جالپى بيزنەس قاۋىمداستىق ءۇشىن جانە جەكەلەي العاندا ماشينا جاساۋ يندۋسترياسى ءۇشىن ۇلكەن مانگە يە جانە ەداۋىر پايدا اكەلەتىنى ءسوزسىز», — دەدى م. پىشەمباەۆ.
باق سۇراقتارىنا جاۋاپ بەرە وتىرىپ, قر ماشينا جاساۋشىلار وداعىنىڭ باسقارما توراعاسى يندۋستريا 4.0 ەلەمەنتتەرىن ەنگىزۋ تۋرالى ايتىپ بەردى.
ء«تورتىنشى ونەركاسىپتىك رەۆوليۋتسيانىڭ دامۋىن ءاربىر قازاقستاندىق سەزىنە الادى. بۇگىندە وسىعان دەيىن تاڭعاجايىپ رەتىندە سانالعان يدەيالار شىندىققا اينالۋدا. بۇل – اۆتوپيلوتتار, كومباينەرسىز استىق جينايتىن پيلوتسىز كومبايندار, اقىلدى ۇيلەر, جاساندى زەردە», — دەدى ول.
سونداي-اق, ونىڭ ايتۋىنشا, ءتورتىنشى ونەركاسىپتىك رەۆوليۋتسيانىڭ كەزەكتى بەلگىلەرى — روبوتتاندىرۋ, اۆتوماتتاندىرۋ, تسيفرلاندىرۋ, زاتتار ينتەرنەتى, جاڭا كومپوزيتتى ماتەريالدار جاساۋ. ماشينا جاساۋ سالاسى ترەندتە بولۋى ءتيىس.
«اسىرەسە ءتورتىنشى ونەركاسىپتىك رەۆوليۋتسيا جاعدايىندا ەكونوميكانىڭ, سونىڭ ىشىندە, ماشينا جاساۋ سالاسىنىڭ, باسەكەگە قابىلەتتى ءونىمدى شىعارۋدىڭ, ەڭبەك ونىمدىلىگىن ارتتىرۋ مەن جاڭا ءادديتيۆتى تەحنولوگيالاردى ەنگىزۋدىڭ تەحنولوگيالىق جاڭعىرۋى ءبىز ءۇشىن وتە ماڭىزدى. وسى ماسەلەلەردىڭ بارلىعى ماشينا جاساۋشىلار فورۋمىندا كەڭىنەن تالقىلانباق», — دەدى م. پىشەمباەۆ.
سونىمەن قاتار, ول ماشينا جاساۋ سالاسىندا ءبىر جۇمىس ورنى اشىلعاننىڭ وزىندە, وعان ىرگەلەس ونەركاسىپ سالالارىندا ون شاقتى جۇمىس ورنى اشىلاتىنىن, وسىلايشا كادرلاردىڭ بىلىكتىلىگى ارتىپ, كۇردەلى تەحنيكانى شىعارۋ كولەمى ۇلعايىپ, ەكسپورتقا باعدارلانا باستايتىنىن اتاپ ءوتتى.
فورۋم اياسىندا شەتەلدىك سەرىكتەستەرمەن بىرلەسكەن كاسىپورىندار قۇرۋ, تەحنولوگيالار ترانسفەرتى تۋرالى مەموراندۋمدارعا قول قويىلادى. سونىمەن قاتار, قاتىسۋشىلار وتاندىق ماشينا جاساۋدى ودان ءارى دامىتۋ, باسەكەگە قابىلەتتىلىكتى ارتتىرۋ بويىنشا تاجىريبەلىك ۇسىنىستار جاسايدى.
فورۋمنىڭ باستى ەرەكشەلىكتەرىنىڭ ءبىرى — فورۋم اياسىندا قازاقستاننىڭ ماشينا جاساۋ سالاسىن دامىتۋدىڭ 2019–2030 جىلدارعا ارنالعان كەشەندى جوسپارىنىڭ جوباسى تانىستىرىلادى, ول ورتا مەرزىمدى كەزەڭدە سالانى دامىتۋدىڭ ستراتەگيالىق جوسپارى بولادى.
كەشەندى جوسپاردىڭ ماقساتى — وتاندىق ماشينا جاساۋدىڭ باسەكەگە قابىلەتتىلىگىن ارتتىرۋ, ىشكى نارىقتى قازاقستاندا شىعارىلعان ونىمدەرمەن قامتاماسىز ەتۋ, ەكسپورت دەڭگەيىن ۇلعايتۋ. كەشەندى جوسپار جاڭا ساپالىق دەڭگەيگە كوشۋدى – نەگىزگى ءوندىرىستى جاڭعىرتۋدى كوزدەيدى. قولداۋ تۇرعىسىنان جوسپاردا قارجىلىق ەمەس, قارجىلىق, ونىڭ ىشىندە قولداۋدىڭ قازىنالىق شارالارى قاراستىرىلعان. تابىسقا جەتىپ, تيىمدىلىكتى ارتتىرۋعا, تەحنولوگيالىق جاڭارتۋعا قاراجات سالۋعا, باسەكەلى ونىمدەر شىعارۋعا جانە جاھاندىق نارىققا شىعۋعا مۇددەلى ماشينا جاساۋ كاسىپورىندارىنا جان-جاقتى قولداۋ كورسەتىلەدى.
