- دومبىرا كۋلتى, ۇلتتىق اسپابىمىزعا دەگەن قۇرمەت ءار شاڭىراقتان باستاۋ الۋى كەرەك. بۇگىنگى اكتسياعا دومبىرا ۇستاپ, كۇي تارتا الاتىن باتىسقازاقستاندىقتار ءوز ەركىمەن قاتىسىپ وتىر. بۇل ۇلكەن پاتريوتتىقتىڭ بەلگىسى. بۇگىن الاڭعا باتىس قازاقستان وبلىسىنىڭ ءار تۇكپىرىنەن 1500-دەن اسا دومبىراشى جينالدى. مەنىڭ ويىمشا, ەلىمىزدە مۇنشا كوپ ادام ءبىر مەزگىلدە ءبىر شىعارمانى ورىنداعان جوق. قازاقستان رەكوردى جاڭاراتىن شىعار, - دەدى شارا باستالار الدىندا باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ.
كۇن بۇلتتانىپ, كۇزدىڭ قارا سۋىق ىزعارى سوعىپ تۇرسا دا الاڭعا جينالعان حالىقتىڭ قاراسى شىنىندا دا كوپ ەدى. «دارىن» مەملەكەتتىك جاستار سىيلىعىنىڭ جانە «قۇرمەت» وردەنىنىڭ يەگەرى, داۋلەتكەرەي اتىنداعى ۇلت-اسپاپتار وركەسترىنىڭ كوركەمدىك جەتەكشىسى ءارى باس ديريجەرى ەركىن نۇرىمبەتوۆتىڭ «سىيقىرلى تاياعىنا» باعىنعان مىڭ سان ادام ءبىر مەزەتتە قۇرمانعازىنىڭ «بالبىراۋىن» كۇيىن ويناي جونەلدى. العاشقى كۇي وينالىپ بىتكەن سوڭ ءسال-ءپال ۇزىلىستەن كەيىن ادۋىندا «اداي» كۇيى كۇمبىرلەپ كەتتى.
- بۇگىنگى تاريحي ءىس-شاراعا قاتىسقان بارشا ونەرپازعا العىسىمدى ايتامىن. شىنىندا دا بۇگىن تاريحي كۇن, اتا-بابامىزدىڭ اڭساعان ارمانىنا جەتكەن كۇن. قۇرمانعازى بابامىزدىڭ ءومىرى كۇرەسپەن, ارپالىسپەن ءوتتى. كۇيلەرىنىڭ اتاۋى دا «تۇرمەدەن قاشقان», «كىسەن اشقان» بولىپ كەلەدى. ەركىندىكتى, ازاتتىقتى سۇيگەن كۇيشى بابامىزدىڭ دا ارمانى ەلىمىزدىڭ تاۋەلسىزدىگى بولعانى انىق. ەندەشە وسى باقىتىمىزدى باعالاۋىمىز كەرەك, قادىرلەۋىمىز كەرەك. تاۋەلسىزدىگىمىزدى ساقتايىق! – دەدى باتىس قازاقستان وبلىسىنىڭ اكىمى التاي كولگىنوۆ تولقىپ تۇرىپ.
بۇدان كەيىن مىنبەگە كوتەرىلگەن قازاقستان رەكوردتار كىتابىنا رەكوردتاردى تىركەۋ دەپارتامەنتىنىڭ ديرەكتورى باقىتجان تاستۇلەكوۆ بۇگىنگى «ناعىز قازاق – دومبىرا!» اتتى رەسپۋبليكالىق اكتسياعا قاتىسۋشىلار سانى 1700 ادام بولعانىن جاريالادى. «مەن بۇگىن ورال قالاسىندا قۇرمانعازى كۇيلەرىن بۇقارالىق ورىنداۋدا جاڭا رەكورد جاسالعانىن كۋالاندىرامىن! بۇدان ءۇش جىل بۇرىن اتىراۋ قالاسىندا وتكەن شاراعا 1017 ادام قاتىسقان بولاتىن. بۇگىن جاڭا رەكورد جاسالدى» دەدى باقىتجان ءسابيت ۇلى.
اكتسيا سوڭىندا وسى شارانى ۇيىمداستىرىپ وتكىزۋگە اتسالىسقان قازاقستان رەسپۋبليكاسىنىڭ ەڭبەك سىڭىرگەن قايراتكەرى, كۇيشى, پروفەسسور ايتجان توقتاعان, قازاق ۇلتتىق ونەر ۋنيۆەرسيتەتىنىڭ پروفەسسورى, كۇيشى ورىنباي دۇيسەن, قازاقستان رەسپۋبليكاسىنىڭ ەڭبەك سىڭىرگەن ءارتيسى, «دارىن» مەملەكەتتىك جاستار سىيلىعىنىڭ يەگەرى, پروفەسسور, كۇيشى-دومبىراشى ايگۇل ۇلكەنباەۆا, «قۇرمەت» وردەنىنىڭ يەگەرى, قازاقستان رەسپۋبليكاسىنىڭ ەڭبەك سىڭىرگەن ونەر قايراتكەرى, داۋلەسكەر كۇيشى ەرمەك قازيەۆ, «دارىن» مەملەكەتتىك جاستار سىيلىعىنىڭ جانە «قۇرمەت» وردەنىنىڭ يەگەرى, داۋلەتكەرەي اتىنداعى قازاق ۇلت-اسپاپتار وركەسترىنىڭ كوركەمدىك جەتەكشىسى ءارى باس ديريجەرى, كۇيشى ەركىن نۇرىمبەتوۆ, قازاقستان رەسپۋبليكاسى مادەنيەت سالاسىنىڭ ۇزدىگى, قۇرمانعازى اتىنداعى ورال ساز كوللەدجىنىڭ ديرەكتورى نۇرجان سەرتەك ارنايى سەرتيفيكاتپەن ماراپاتتالدى.
قازبەك قۇتتىمۇرات ۇلى
«ەگەمەن قازاقستان»
سۋرەتتى تۇسىرگەن دينارا كەندىرباەۆا
باتىس قازاقستان
