باسقوسۋدا ماتەماتيكا ءپانىن مەكتەپتەردە وقىتۋ ماسەلەسىنە كوبىرەك كوڭىل ءبولىندى. ءبىلىم بەرۋدىڭ جاڭارتىلعان مازمۇنى جاعدايىندا جالپى ءبىلىم بەرۋ مەكتەپتەرىنە ادىستەمەلىك قولداۋ كورسەتۋ تۋرالى ايتقان نازارباەۆ زياتكەرلىك مەكتەبىنىڭ مۇعالىمى ۋ.يساكوۆا جاڭادان ەنگىزىلگەن ادىستەمەلەردىڭ وزىق جانە وسال تۇستارىنا توقتالدى. وبلىستىق ءبىلىم باسقارماسىنىڭ مەكتەپكە دەيىنگى جانە جالپى ورتا ءبىلىم بەرۋ ادىستەمەلىك كابينەتى ماتەماتيكا جانە فيزيكا سەكتورىنىڭ مەڭگەرۋشىسى باقىتگۇل تالقانوۆا شاعىن جابدىقتالعان مەكتەپتەردە توپتىق جۇمىستاردى قولدانۋ جانە وقۋشىلاردىڭ ءبىلىمىن باعالاۋ ماسەلەسىن كوتەردى. شاعىن جابدىقتالعان مەكتەپتەرگە ارناپ ماتەماتيكا ءپانىن جۇرگىزۋگە ارنالعان ادىستەمە جاساۋدى ۇسىندى. پروفەسسور جەڭىسنۇر قۇجەكەەۆ باستاۋىش مەكتەپتەردە بالالاردىڭ ءوز بەتىنشە زەرتتەۋ جۇمىستارىن جۇرگىزۋ ماسەلەسىن كوتەرە وتىرىپ, بۇل ورايدا تاجىريبەنىڭ وتە ازدىعىن ايتتى. قوستاناي قالاسىنداعى فيزيكا-ماتەماتيكا ليتسەيىنىڭ مۇعالىمى س.ساياپينا بالالاردى جاس كەزىنەن عىلىمعا باۋلۋدى باستاۋىش سىنىپتاردان باستاپ وليمپيادا مەن عىلىمي جۇمىستار كونكۋرستارىنا قاتىستىرۋ ارقىلى تاربيەلەۋ كەرەكتىگىن ورتاعا سالدى.
«دوڭگەلەك ۇستەل» ماجىلىسىندە پەداگوگيكا عىلىمدارىنىڭ كانديداتتارى ت.شۋمەيكو, ا.ءمۋسىلىموۆا, پەداگوگيكا ۋنيۆەرسيتەتى فيزيكا-ماتەماتيكا جانە جالپىتەحنيكالىق پاندەر كافەدراسىنىڭ مەڭگەرۋشىسى و.تەلەگينا, نازارباەۆ زياتكەرلدىك مەكتەبىنىڭ مۇعالىمى, ماتەماتيكا ماگيسترى م.مۇسابەكوۆا جانە باسقالار ماتەماتيكا ءپانىن وقىتۋدىڭ پروبلەمالارىن جان-جاقتى قوزعادى.
«ماتەماتيكالىق كاسىبي ءبىلىم بەرۋدىڭ نەگىزدەرىن ۇستازىمىز مارقۇم توبىل داۋلەتباەۆ اينالىسقا بولاتىن. ول ءوزىنىڭ ماگيسترلارىمەن, ارىپتەستەرىمەن بىرىگىپ ينجەنەر-تەحنيكالىق, ەكونوميكالىق, اگرو-بيولوگيالىق, پەداگوگيكالىق, ياعني ماتەماتيكالىق ەمەس ماماندار دايىندايتىن فاكۋلتەتتەرگە ارناپ مونوگرافيالار, وقۋ-ادىستەمەلىك وقۋلىقتار جازدى. وكىنىشكە قاراي, قازىر جوعارى سىنىپتارعا ماتەماتيكالىق ءبىلىم بەرۋدىڭ ادىستەمەلەرى جەتىسە بەرمەيدى» دەدى م.مۇسابەكوۆا.
وقىتۋشىلار مەن عالىمدار ءماجىلىستى قورىتا كەلە, كەمشىلىكتەر بولعانىمەن قوستاناي وڭىرىندەگى مەكتەپتەر مەن جوعارى وقۋ ورىندارىندا ماتەماتيكالىق ءبىلىم بەرۋ ىسىندە العا باسۋشىلىق, جاعىمدى جاڭالىقتار بار جانە مامانداردىڭ بىلىكتىلىگى جوعارى ەكەنىن ايتىپ, ورتاعا سالىنعان پروبلەملاردىڭ شەشۋ جولدارىن ىزدەستىرۋدە كۇش بىرىكتىرۋگە كەلىستى.
ءنازيرا جارىمبەت,
«ەگەمەن قازاقستان»
قوستاناي
