ەۋروپالىق وداق, ەۋروپاداعى قاۋىپسىزدىك جانە ىنتىماقتاستىق ۇيىمى, قىلمىستىق كىرىستەردى جانە تەرروريزمدى قارجىلاندىرۋدى زاڭداستىرۋعا قارسى ءىس-قيمىل جونىندەگى ەۋرازيالىق توپ, بۇۇ-نىڭ ەسىرتكى جانە قىلمىس جونىندەگى وڭىرلىك باسقارماسى, ورتالىق ازيا وڭىرلىك اقپاراتتىق ۇيلەستىرۋ ورتالىعى سىندى ء(واواۇو) حالىقارالىق ۇيىمداردىڭ قىزمەتكەرلەرى باقىلاۋشى مىندەتىن اتقارعان وپەراتسياعا 22 مىڭنان استام قۇقىق قورعاۋ ورگاندارىنىڭ قىزمەتكەرلەرى قاتىسقان.
اپيىن كونترابانداسى ارنالارىنىڭ جولىن كەسۋ, ترانسۇلتتىق ەسىرتكى توپتارىنىڭ قىزمەتىنە, ەسىرتكى كىرىستەرىن زاڭداستىرۋعا توسقاۋىل قويۋ, زاڭسىز اينالىمداعى قارۋ-جاراقتار, وق-دارىلەر مەن جارىلعىش زاتتاردى تاركىلەۋ نەگىزگى مىندەتتەرى بولىپ تابىلاتىن «كانال – كراسنىي بارحان» وپەراتسياسى بارىسىندا قىزىلوردا جانە جامبىل وبلىستارىندا قاراسورانى زاڭسىز ءوسىرۋ مەن دايىنداۋعا قارسى كۇرەس شارالارى قاتار جۇرگىزىلدى. ىشكى ىستەر مينيسترلىگىنىڭ مالىمەتى بويىنشا, وپەراتسيا بارىسىندا بروندالعان 4 «تيگر» اۆتوكولىگى, «باگگي» سىنىبىنا جاتاتىن 6 بىرلىك, ءجۇرىپ ءوتۋ مۇمكىندىگى جوعارى 15-تەن استام اۆتوكولىك, مي-171ە تىكۇشاعى قولدانىلعان.
اۋقىمدى ءىس-شارالار ناتيجەسىندە قاتىسۋشى مەملەكەتتەر اۋماعىندا زاڭسىز اينالىمنان 9 توننا ەسىرتكى, ونىڭ ىشىندە 5 توننا اپيىن, 38 كگ گەروين, 2 توننا سينتەتيكالىق ەسىرتكىلەر, 800 كگ گاشيش جانە 830 كگ ماريحۋانا, سونىمەن قاتار 115 بىرلىك قارۋ-جاراق, 2,5 مىڭعا تاياۋ وق-دارىلەر, 127 مىڭ اقش دوللارى كولەمىندە باعالى ماتەريالدىق جانە باسقا دا زاتتار تاركىلەنگەن. بۇدان بولەك 719 ەسىرتكى قىلمىسى اشىلىپ, 7 مىڭعا تاياۋ قىلمىستىق ءىس قوزعالدى. زاڭسىز ارەكەتتەرى ءۇشىن 500 ادام اكىمشىلىك جاۋاپكەرشىلىككە تارتىلعان.
سونداي-اق مينيسترلىكتىڭ حابارلاۋىنشا, ارنايى وپەراتسيا شەڭبەرىندە ءىىم «دەلتا-دولينا» بولىمشەسىنىڭ اۋماعىندا قازاقستان جانە قىرعىزستان ءىىم كينولوگيالىق قىزمەتتەرىنىڭ بىرلەسكەن جاتتىعۋلارى, قىزمەتتىك-ىزدەستىرۋ يتتەرىنىڭ كورنەكى ونەر كورسەتۋلەرى وتكىزىلگەن.
عالىمجان ەلشىباي,
«ەگەمەن قازاقستان»
شىمكەنت
