ۋنيۆەرسيتەت رەكتورى ەرلان سىدىقوۆ: ء«شاربانۋ بەيسەنوۆا – قازاق ادەبيەتىنە ۇلكەن ۇلەس قوسقان, جازۋشى, جۋرناليست. ۇزاق جىلدار «مادەنيەت جانە تۇرمىس», «قازاقستان ايەلدەرى» جۋرنالدارىندا جەمىستى قىزمەت ەتىپ, ءتول مادەنيەتىمىز بەن ادەبيەتىمىزگە ايرىقشا ەڭبەك ءسىڭىردى. بۇگىنگى كەزدەسۋ ستۋدەنتتەر ءۇشىن ايرىقشا كۇن, ەرەكشە كەزدەسۋ رەتىندە ەستەرىندە قالادى دەپ ويلايمىن. ءشاربانۋ قوناقبايقىزىنىڭ ەڭبەك جولى مەن ونەر جولىن باعالاپ, ۋنيۆەرسيتەتىمىزدىڭ ەڭ جوعارى ناگراداسى «كۇلتەگىن» مەدالىمەن ماراپاتتايمىز. شىعارماشىلىق جولىنا تابىس تىلەيمىز», دەدى.
ءشاربانۋ بەيسەنوۆاعا ستۋدەنتتەر تاراپىنان مول, قىزىقتى سۇراقتار قويىلدى. ونەر جولىن اڭگىمە جازۋدان باستاعان جازۋشى, قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنە ونىنشى سىنىپتى بىتىرە سالىپ, اۋداندىق گازەتتىڭ جولداماسىمەن بىردەن قابىلدانعان. قازاق تاريحىنداعى باتىر انالار, ەرجۇرەك ارۋلار تۋرالى شىعارمالار سەرياسىن جازىپ, ءونىمدى ەڭبەك ەتىپ جۇرگەن قالامگەر, وسى تاقىرىبىن ءالى دە ىندەتىپ, تەرەڭدەتىپ جازاتىنىن ايتتى.
ومىرلىك سەرىگى, قازاق ادەبيەتىنىڭ كورنەكتى وكىلى, سىنشى ساعات اشىمباەۆپەن بىرگە كەشكەن ساۋلەلى عۇمىرى تۋرالى دا سىرت شەرتكەن جازۋشى ستۋدەنتتەردىڭ بارلىق سۇراعىنا رياسىز جاۋاپ بەرىپ, كەزدەسۋدى ۇيىمداستىرۋشىلار مەن تىڭداۋشىلارعا العىسىن ايتتى.
كەش بارىسىندا ءشاربانۋ بەيسەنوۆانىڭ شىعارماشىلىعى تۋرالى فيلولوگيا عىلىمدارىنىڭ دوكتورى جانات اسكەربەكقىزى وي-پىكىرىن ءبىلدىرىپ, سەرىك تۇرعىنبەك ۇلى ارناۋ جىرىن تارتۋ ەتتى.
تىرشىلىگىن قالىبىندا, ءومىر مەن ونەر جولىندا كورگەنى مول, تۇيگەنى كوپ قازىنا كەۋدە ۇلكەندەرىمىزبەن سۇحباتتاسۋ جاستارعا قاشاندا قىزىق, قاشاندا ازىق بولىپ قالا بەرەدى.
باعاشار تۇرسىنباي ۇلى,
«ەگەمەن قازاقستان»
