جايناگۇل سەگىز جاسقا كەلگەندە اناسى, بەس جىلدان كەيىن اكەسى دۇنيە سالادى. كورشى ەلدەن قوزعالعان ۇلكەن كوشپەن بىرگە قايىمحان اۋلەتى 2005 جىلى ەلىمىزگە قونىس اۋدارىپ, شىعىس قازاقستان وبلىسى, زايسان اۋدانى, قالجىر اۋىلىنا تابان تىرەيدى. اعا-جەڭگەسى قۋانبەك پەن نازىگۇل, ودان كەيىنگى اعاسى ەربولات پەن ءسىڭلىسى گۇلنۇر دا سوندا.
جايناگۇل ورتالاۋ مەكتەپتى ءبىتىرىپ, ودان ءارى بازارلى بولاشاعىنا ۇمتىلعان ساتتە كۇتپەگەن ناۋقاسقا شالدىعادى. ىشكى قۇرىلىسى – اس ءجۇرۋ جولدارى بۇزىلعان. اۋدان ورتالىعىنداعى دارىگەرلەر وپەراتسيا جاسايدى. الايدا ءبىر ايدان سوڭ جاراقات ورنى ىرىڭدەي باستايدى. بىرنەشە اي بويى جاراسىن ءوزى تازارتىپ, تاڭىپ جۇرەدى.
كەلەسى جىلى وبلىس ورتالىعى – وسكەمەندەگى وبلىستىق اۋرۋحاناعا كەلگەن جايناگۇلگە قايتادان وتا جاسالادى. ەمدەۋشى دارىگەر وعان: «...ەندى 15 كۇندىك ءومىرىڭ قالدى» دەگەن قاتال «ۇكىم» شىعارىپ بەرەدى. اس ءجۇرۋ جولدارى بۇزىلعان جايناگۇلدىڭ بۇيىرىنەن جاساندى تۇتىك شىعارىپ, ىدىس بايلاپ قويادى. بۇل جايت بۇرىنعىدان بەتەر قيناي تۇسەدى. جايسىزدىق سالدارىنان كوپشىلىك ورتادا ءجۇرىپ-تۇرا المايدى.
بىراق مۇنىمەن دە بولمايدى. جايناگۇل اۋىلدا ەكى ءۇيدىڭ وتىن جاعىپ, بالا باعىپ, قارجى جينايدى. شاماسى كەلگەن قانداي جۇمىستان دا قايتپايدى. ءسويتىپ ءجۇرىپ وبلىس ورتالىعىنداعى اۋرۋحاناعا وتا جاساتۋعا تاعى كەلەدى. بۇل – التىنشى وپەراتسيا. سىرقاتتىڭ جاعدايىن قاراعان دارىگەرلەر بۇل جولى وتادان كەيىن ءبىرجولا جازىلىپ شىعارىنا كۇماندانادى. ەندىگى ءۇمىت – استانا. وعان ارنايى كوميسسيانىڭ شەشىمىمەن جەڭىلدىك بەرۋ كەرەك.
سونىمەن 2014 جىلى ءساتى ءتۇسىپ, استانالىق دارىگەرلەردىڭ الدىنا كەلگەن بولاتىن. بىراق ابدەن اسقىنىپ كەتكەندىكتەن ىشكى قۇرىلىستى اشۋعا ەشكىمنىڭ ءداتى بارا قويمايدى. گەرمانيا, يزرايل, اقش سياقتى ەلدەرگە بارىپ ەمدەلۋگە كەڭەس بەرەدى. بارار ەدى-اۋ, بىراق وعان قارجى قايدا؟ شەتەلدىك دارىگەرلەر مىڭداعان دوللار بەرسەڭ عانا ەمدەيدى. وندا دا قۇلان-تازا ايىعىپ كەتۋىڭە كەپىلدىك بەرە المايدى. قىتايعا بارعان, ونداعىلار 30 ملن تەڭگە سۇراعان. ءبىر جاعىنان قارجى تاپشىلىعى ەڭسەنى باسسا, ەكىنشى جاعىنان اۋرۋ مەڭدەپ بارادى. ءسويتىپ جۇرگەندە ءوزى سياقتى اۋىراتىن قاديشا ەسىمدى قىزبەن الەۋمەتتىك جەلى ارقىلى تانىسىپ قالماسى بار ما؟ حابار-وشار الىسىپ جۇرگەن سول قۇربىسى جايناگۇلگە «استانادا قوبلاندين دەگەن پروفەسسور بار, سول عانا كومەكتەسە الادى» دەپ كەڭەس بەرەدى.
مەديتسينا عىلىمدارىنىڭ دوكتورى, پروفەسسور, اكادەميك, جالپى حيرۋرگيا كافەدراسىنىڭ مەڭگەرۋشىسى سارسەن قوبلانديندى بىلمەيتىن جان نەكەن-ساياق. ەڭ سوڭعى ءۇمىتىن ۇكىلەپ جايناگۇل دە اكادەميكتىڭ الدىنا كەلەدى. اتاعىنان ات ۇرىككەندەي بولعانمەن, سارسەن قوبلاندين وتە كىشىپەيىل ادام ەكەن. كوڭىلى ءپاس, دەرتى ابدەن مازالاعان جاندى دارىگەر رياسىز پەيىلمەن قارسى الادى.
سىرقاتتىڭ جاعدايىمەن تانىسقان سوڭ سارسەن ناعىم ۇلى كافەدراسىنداعى دارىگەر-عالىمداردى جيناپ, كەڭەس وتكىزەدى. كافەدرا عالىمدارى ءبىراۋىزدان «تاۋەكەل» دەپ ۇيعارىمعا كەلەدى. بۇرىن تاجىريبەدە مۇنداي جاعدايلار كەزدەسكەن. بىراق مىنا سىرقاتتىكى ەرەكشە. ون جىل بويى جاساندى تۇتىكپەن جۇرگەن. ەندەشە ىشكى قۇرىلىستاعى ىشەكتەر سونشاما ۋاقىت بويى جۇمىس ىستەمەگەن. جۇمىس ىستەمەگەن اعزا قاتىپ قالادى. ەڭ قيىنى, توق ىشەك ءوز قىزمەتىن اتقارۋدان تىس قالعان. دەمەك, قايتا قالپىنا كەلتىرۋ كەرەك. ال وندا قانشاما قان تامىرلارى بار...
– ارينە ون جىل بويى جۇمىس ىستەمەي تۇرعان اس ءجۇرۋ جولدارىن قايتادان ىسكە قوسۋ وڭاي ەمەس. ەندى بۇلاي جۇرە بەرگەندە جامان اۋرۋعا اينالىپ كەتۋى دە مۇمكىن بولاتىن. ىشكى قۇرىلىستى اشىپ, ەمدەدىك. ەندى ەشقانداي قاۋىپ جوق, – دەيدى بىلىكتى وتاشى سارسەن ناعىم ۇلى.
بۇگىندە قازاقستان رەسپۋبليكاسىنىڭ دەنساۋلىق ساقتاۋ ءىسىنىڭ ۇزدىگى, 2011 جىلعى ۇزدىك دارىگەر, ن.ي.پيروگوۆ اتىنداعى حيرۋرگتەر قاۋىمداستىعىنىڭ تولىق مۇشەسى سارسەن ناعىم ۇلىنىڭ شەتەلدەن ەم-دوم تابا الماي كەلگەن تالاي ناۋقاستى اياعىنان تىك تۇرعىزىپ جىبەرگەنىنە جۇرت كۋا. استانا مەديتسينا ۋنيۆەرسيتەتىندە جالپى حيرۋرگيا كافەدراسىن باسقارىپ وتىرعان س.قوبلانديننىڭ جاساعان وتاسى شيپالى بولعان تالاي سىرقات التىن قولدى دارىگەردىڭ ەسىمىن قۇرمەتپەن ايتادى.
...ومىرگە قۇشتار جايناگۇلدىڭ جانارىنان جارىق دۇنيەگە دەگەن ىڭكارلىك سەزىمى جارق-جۇرق ەتەدى. ءبىز تىلدەسكەندە جانىندا قۇراق ۇشىپ ەرعازى ەسىمدى جىگىت جۇرگەن بولاتىن. سۇراستىرا كەلە ونىڭ بولاشاق جارى ەكەنىن بىلدىك. سوندا ەكەۋى «ۇيلەنەمىز!» دەگەن بولاتىن. «ون جىل مۇگەدەك حالدە ازاپ شەككەن مەنى بۇل كىسى ون كۇندە ومىرگە قايتا اكەلدى. سارسەن اعانىڭ جاساعان جاقسىلىعىن سوزبەن ايتىپ جەتكىزۋ مۇمكىن ەمەس. عاجاپ ادام!» دەيدى جايناگۇلدىڭ ءوزى ريزاشىلىق سەزىممەن. ايتپاقشى, جاقىندا ەرعازى مەن جايناگۇل تەلەفون شالدى. ادامنىڭ قۋانىشى داۋىسىنان سەزىلىپ تۇرادى عوي. شاڭىراق كوتەرگەن جاستاردىڭ كوڭىلدەرى شات-شادىمان. دەنساۋلىق تۇزەلگەن. ەندى بوپەلى بولماق ويلارى بار.
عالىمجان تورەحانوۆ,
قازاقستان جۋرناليستەر وداعىنىڭ مۇشەسى
