مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ تاپسىرىسى بويىنشا ەكسپەديتسيانى ۇيىمداستىرۋشى «Kazakh Tourism» ۇك. «جاڭا جىبەك جولى» ەكسپەديتسياسىنىڭ باعىتىن «QazaqGeography» رقب جۇزەگە اسىرۋدا.
ەكسپەديتسيا قۇرامى تاجىريبەلى ساياحاتشىلاردان, تۋروپەراتور وكىلدەرى مەن شەتەلدىك جانە قازاقستاندىق ترەۆەل-بلوگەرلەردەن, سونداي-اق «National Geographic رەسەي» كومانداسىنان قۇرالعان.
« ۇلى دالا ەلىنە ساياحات» جوباسى – قازاقستان ايماقتارىنا جاسالاتىن ەڭ ءىرى ەكسپەديتسيا. ەكسپەديتسيا التى باعىت بويىنشا التى تۋريستىك كلاستەردى قامتي وتىرىپ, ماڭىزدى تابيعي نىساندارعا بارۋ ارقىلى جۇرگىزىلەدى. ەكسپەديتسيانىڭ ماقساتى – جاڭا تۋريستىك باعىتتاردى جاساۋ ءۇشىن تابيعي, تاريحي, كيەلى مەكەندەردى زەرتتەۋ, ىشكى تۋريزم مەن ينفراقۇرىلىمدى دامىتۋ, جانە تۋعان ەلدى زەرتتەۋ. وعان قوسا, ەكسپەديتسيا تۋرالى ماتەريالدار قازاقستاننىڭ تۋريستىك دەستيناتسيا رەتىندە تانىلۋىنا جانە حالىقتى ىشكى تۋريزمگە تارتۋعا ىقپال ەتەدى. ەكسپەديتسيا ناتيجەسىندە ەلىمىزدىڭ تابيعي نىساندارى بويىنشا جاڭا تۋريستىك باعىتتار, ساپالى فوتو جانە ۆيدەوبانكتەر قۇرىلادى. ولاردىڭ قازىرگى جاعدايى تۋرالى وزەكتى اقپارات الىنادى, يلليۋستراتسيالانعان جولنۇسقا جاسالاتىن بولادى.
ەكسپەديتسيا الماتىدان قازاقستان – قىتاي شەكاراسىنا قاراي شىعادى دا, جاركەنت قالاسى مەن قورعاس اۋىلىنا ايالدايدى. ءارى قاراي, قازاقستانداعى ەڭ كورىكتى جەرلەردىڭ ءبىرى, سولتۇستىك تيان-شان مارجانى اتالاتىن – ساتى اۋىلىنا بارادى.
قاتىسۋشىلار ساتى اۋىلىنان جولسىز جەرمەن بىرنەشە شاقىرىم ءجۇرىپ, تاۋ ىشىندەگى كولساي جانە قايىڭدى كولدەرىنە قاراي باعىتتالادى. قايىڭدى كولى ەكو-تۋريستەردىڭ ەڭ سۇيىكتى جەرى جانە قازاقستاننىڭ باستى تۋريستىك نىساندارىنىڭ ءبىرى بولىپ سانالاتىنىن ايتا كەتكەن ءجون. ول تەڭىز دەڭگەيىنەن 1867 مەتر بيىكتە ورنالاسقان. بۇل جەردىڭ سۇلۋلىعىن سوزبەن سيپاتتاپ جەتكىزۋ مۇمكىن ەمەس. قايىڭدى كولى 1911 جىلعى جەر سىلكىنىسىنىڭ سالدارىنان پايدا بولعان: قۇلاعان تاس شاتقالدى جاۋىپ قالىپ, تابيعي بوگەت ءتۇزىلىپ, شىرشالار سۋ استىندا قالعان. كولساي كولىنىڭ سۋى تۇپ-تۇنىق. مۇندا قۇبىلمالى باقتاق, قابىرشاقسىز كوكباس, تاعى باسقا دا بالىق تۇرلەرى مەكەندەيدى. ماڭىنداعى ورمان ساڭىراۋقۇلاققا, قويبۇلدىرگەن مەن تاڭقۋرايعا باي.
ءارى قاراي ساياحاتشىلارىمىز شارىن مەملەكەتتىك ۇلتتىق تابيعي ساياباعىنا بارىپ, تەمىرلىك, بەستاماق شاتقالدارى مەن قورعاندار القابىن تاماشالايدى. سول جەردەن «التىنەمەل» مەملەكەتتىك ۇلتتىق تابيعي ساياباعىنا بەت الادى. وندا ەكسپەديتسيا مۇشەلەرى اقتاۋ تاۋى مەن 700 جىلدان اسا ۋاقىت ءوسىپ تۇرعان اعاشتى كورە الادى. سودان سوڭ, ايعايقۇمعا, شوقان ءۋاليحانوۆ بۇلاعى مەن تالحيز قالاشىعىنا ات باسىن بۇرىپ, التىنشى كۇنى الماتىعا ورالىپ, «مەدەۋ» مۇز ايدىنى, «شىمبۇلاق» تشك جانە «ۇلكەن الماتى كولىنە» بارادى.
ەكسپەديتسيا باعىتىنداعى كەلەسى ايالداما – تامعالى شاتقالى. بۇل جەتىسۋداعى جارتاسقا جازىلعان ەڭ ەسكى, ءارى كورنەكتى ەسكەرتكىشتەردىڭ ءبىرى. ول 2004 جىلدان بەرى يۋنەسكو دۇنيەجۇزىلىك مۇراسىنىڭ نىسانى قاتارىندا. وتكەن عاسىردىڭ ورتاسىندا بۇل جەردەن جارتاسقا سالىنعان ءارتۇرلى سۋرەتتەر تابىلعان. تامعالى شاتقالى الماتى قالاسىنان سولتۇستىك-باتىسقا قاراي 170 شاقىرىم جەردەگى اڭىراقاي تاۋىندا.
تامعالىدان سوڭ ەكسپەديتسيا قاتىسۋشىلارى جامبىل وبلىسىنداعى ارحەولوگيالىق جانە تابيعي ەسكەرتكىشتەرگە جول تارتادى. ولاردىڭ ەڭ العاشقىسى – تاراز قالاسىنان 45 شاقىرىم جەردە ورنالاسقان اقىرتاس ارحەولوگيالىق كەشەنى. بۇل ورىن قازاقستاننىڭ 100 كيەلى نىسانىنىڭ تىزىمىنە كىرەدى. تاراز قالاسىندا ولار قاراحان مەن ايشا ءبيبى كەسەنەسىنە جانە «ەجەلگى تاراز» ارحەولوگيالىق ورتالىعىنا بارادى.
ەكسپەديتسيا توبى ورتالىق ازيا مەن قازاقستانداعى ەڭ ەسكى قورىقتاردىڭ ءبىرى اقسۋ-جاباعىلىدا ايالدايدى. مۇندا ولار تابيعاتتىڭ سۇلۋلىعىن جانە وسىمدىكتەر مەن جانۋارلاردىڭ كەرەمەت الەمىن تاماشالاي الادى. بۇل قورىق جامبىل جانە تۇركىستان وبلىستارىنىڭ اۋماعىندا ورنالاسقان.
ەكسپەديتسيا باعىتىنداعى كەلەسى پۋنكت – باتىس تيان-شان تاۋلارىنىڭ سولتۇستىك-شىعىسىنداعى سايرام-وگەم مەملەكەتتىك ۇلتتىق تابيعي ساياباعى. ساياحاتشىلار سايرام-وگەم شاتقالىنىڭ ەڭ كورىكتى جەرلەرىنىڭ ءبىرى, تەڭىز دەڭگەيىنەن 2350 مەتر بيىكتە ورنالاسقان سايرامسۋ كولىن كورىپ قايتادى.
تۇركىستان وبلىسىنىڭ اۋماعى ارحەولوگيالىق جانە تابيعي ەسكەرتكىشتەرگە باي. وتىرار قالاسى, ارىستان باب, قوجا احمەت ياساۋي كەسەنەلەرى, ساۋران قالاسى جانە باسقا دا نىساندار ساياحاتشىلار مەن زەرتتەۋشىلەردى قىزىقتىرارى ءسوزسىز.
«ەگەمەن-اقپارات»
