توعىزقۇمالاقشىلاردىڭ ۇپايى تۇگەل
دۇنيەجۇزىلىك كوشپەندىلەر ويىندارىندا سپورتشىلارىمىزدىڭ ىشىنەن ەڭ جاقسى كورسەتكىشتى توعىزقۇمالاقشىلار كورسەتتى. توعىزقۇمالاقتان 4 التىننىڭ 3-ەۋىن قازاقستاندىقتار جەڭىپ الدى. 1 التىنعا قىرعىزستاندىقتار يە بولدى. سونداي-اق توعىزقۇمالاقشىلارىمىز 2 كۇمىس, 1 قولا مەدالدى ەنشىلەدى. توعىزقۇمالاقشىلار مانگالا ويىنىنا (تۇرىك توعىزقۇمالاعى) قاتىسىپ, كوماندالىق ەسەپپەن 2 كۇمىس, 2 قولا مەدالدى الدى. توعىزقۇمالاقتان الەمنىڭ 8 دۇركىن چەمپيونى اسەل داليەۆا جەكە ەسەپتە 1 التىن, كوماندالىق ەسەپتە (ەكى سپورتشى بىرىگىپ) 1 التىن الىپ بەردى.
قازاقستان ەكىنشى ورىندى مىسە تۇتتى
قىرعىزستاننىڭ ىستىقكول وبلىسىندا وتكەن ءىىى دۇنيەجۇزىلىك كوشپەندىلەر ويىندارىندا قازاقستان قۇراماسى جالپى ەسەپتە ەكىنشى ورىنعا يە بولدى. ءبىرىنشى ورىنعا قورجىنىنا تۇسكەن جالپى 100 مەدالدىڭ 40-ى التىن, 30-ى كۇمىس, 30 قولاسى بار, قىرعىزستاننىڭ ۇلەسىنە ءتيدى.
ەكىنشى ورىندى قازاقستاندىق سپورتشىلار ەنشىلەدى. التىن سانى بويىنشا رەسەيلىكتەرمەن تەڭ تۇسكەن جەرلەستەرىمىز, كۇمىس مەدالدىڭ سانى باسىمدىعىمەن العا شىقتى. قازاقستان قورجىنىندا 16 التىن, 24 كۇمىس, 29 قولا مەدال (بارلىعى 69 مەدال) بار. ال رەسەيلىكتەردىڭ قورجىنىندا 52 مەدال: 16 التىن, 11 كۇمىس, 25 قولا.
ءتورتىنشى ورىندا تۇرىكمەنستاندىق سپورتشىلار. ولاردىڭ ەنشىسىندە 10 التىن, 5 كۇمىس, 12 قولا (27 مەدال). العاشقى بەستىكتى وزبەكستاندىق ساڭلاقتار تۇيىندەدى. ولاردىڭ قورجىنىنا 7 التىن, 8 كۇمىس, 18 قولا (33 مەدال) ءتۇستى.
2-8 قىركۇيەك ارالىعىندا وتكەن دۇنيەجۇزىلىك كوشپەندىلەر ويىندارىنا 80-نەن استام ەلدەن 3000-عا جۋىق سپورتشى قاتىستى. ولار 37 سپورت تۇرىنەن باق سىنادى. ءدۇبىرلى دودادا قازاقستاننىڭ نامىسىن 134 سپورتشى قورعادى.
نازاربەك بايجىگىتوۆ,
ارنايى «ەگەمەن قازاقستان» ءۇشىن
قىرعىز رەسپۋبليكاسى,
شولپان-اتا قالاسى
