مەكتەپتەگى ءداستۇرلى اتا-انالار جينالىسى كوپتەگەن ماسەلەلەردى شەشۋگە كومەكتەسەتىنى انىق. الايدا سىنىپ جەتەكشىلەرىنىڭ ايتۋىنشا, اتا-انالارمەن قارىم-قاتىناس ورناتۋدىڭ بۇل تۇرىندە بىرقاتار قيىندىقتار تۋىندايدى. ەڭ باستى سەبەبى, پەداگوگتەرگە جۇكتەلەتىن جۇمىستىڭ شامادان تىس بولۋى جانە جينالىستى وتكىزۋ ءادىسىنىڭ ەسكىرۋى. سايىپ كەلگەندە, بۇل اتا-انالاردىڭ مەكتەپپەن قارىم-قاتىناس ورناتۋىنا اسەر ەتەدى. «بىرىڭعاي رەسپۋبليكالىق اتا-انالار كونفەرەنتسياسىنىڭ» ءداستۇرلى اتا-انالار جينالىسىنان ەرەكشەلىگى, بۇل جاس ۇرپاقتى يننوۆاتسيالىق بىلىممەن جانە وتباسىلىق تاربيەلەۋ ادىستەرىمەن وقىتۋعا باعىتتالعان جانە ءتۇرلى تاقىرىپتاردى قامتيتىن جاڭا فورمات. وسىعان وراي اتا-انالار كونفەرەنتسياسىن ەلىمىزدىڭ بارلىق مەكتەبىندە وتكىزۋ جوسپارلانعان. كەزدەسۋ بارىسىندا ءار سىنىپتىڭ اتا-انالارىنا ارنالعان ءتۇرلى تاقىرىپ قوزعالادى. اتالعان كونفەرەنتسيانىڭ العاشقى جيىنى وتكەن اپتا سوڭىندا بارلىق مەكتەپتە ءوتتى. ەلورداداعى №54 مەكتەپ-ليتسەيىنىڭ قابىرعاسىندا ۇيىمداستىرىلعان ماڭىزدى ماسليحاتقا ءبىلىم جانە عىلىم ۆيتسە-ءمينيسترى اسحات ايماعامبەتوۆ قاتىسىپ, بۇل كونفەرەنتسيانىڭ ۇستاز, اتا-انا, وقۋشى ءۇشىن قانشالىقتى قاجەت ەكەنىن تىلگە تيەك ەتتى.
«بيىل 1 قىركۇيەك كۇنى ەلىمىزدىڭ 7024 مەكتەبىنە 3 ميلليوننان استام وقۋشى كەلسە, ولاردىڭ 350 مىڭنان استامى 1 سىنىپقا بارعاندار. مەكتەپ تابالدىرىعىن ەندى اتتاعان بۇلدىرشىندەرىمىزدىڭ سانى جىل سايىن ارتىپ كەلە جاتقانى ءبىزدى قۋانتادى. مەكتەپكە العاش بارعان بالالاردىڭ اتا-انالارىمەن تىعىز بايلانىستا بولىپ, وسىنداي كونفەرەنتسيالاردى وتكىزۋ مەكتەپ پەن اتا-انا اراسىنداعى قارىم-قاتىناستى ودان ءارى ارتتىرادى. ماماندارىمىز ءتۇرلى تاقىرىپتا وي قوزعايتىن بولادى. مىسالى, بالانىڭ اقپاراتتىق قاۋىپسىزدىگىن قامتاماسىز ەتۋ تاقىرىبى. بۇل – وزەكتى. قازىرگى تاڭدا بۇلدىرشىندەر بالاباقشا جاسىندا بولسا دا پلانشەت, سمارتفونداردان الۋان ءتۇرلى اقپارات الادى. سوندىقتان بالا قانداي اقپارات الىپ جاتقانىن قاتاڭ قاداعالاۋ كەرەك. ەلباسىنىڭ «بولاشاققا باعدار: رۋحاني جاڭعىرۋ» باعدارلاماسىندا ءبىلىم-تاربيە سالاسىنا قاتىستى ماڭىزدى ماسەلەلەر كوتەرىلدى. سونىمەن قاتار ءبىلىم سالاسىنداعى جاڭا باعدارلامالار تۋرالى ءارتۇرلى اقپارات تارالۋدا. بۇل باعدارلامالاردىڭ بارلىعىن ساراپتاۋدان, سارالاۋدان وتكىزىپ, 2000 جىلداردان بەرى جۇرگىزىپ كەلەمىز. سەبەبى بىزگە فۋنكتسيونالدىق ساۋاتتىلىق كەرەك. ويتكەنى بۇگىندە اقپارات جىلدام جاڭارۋدا. سوندىقتان تەلەفوندارداعى, باسقا دا قۇرىلعىلارداعى اقپاراتتى جاتتاعاننان گورى ونى قالاي پايدالانامىز دەگەن سۇراقتىڭ جاۋابىن قاراستىرۋ قاجەت. تاعى ءبىر ماسەلە – ۇستاز مارتەبەسى. ۇستاز مارتەبەسى تەك مەملەكەت شەشەتىن ماسەلە ەمەس. وعان اتا-انالاردىڭ دا قوساتىن ۇلەسى قوماقتى. نەگە؟ سەبەبى داستارقان باسىندا مەكتەپتەگى مۇعالىم تۋرالى جاعىمسىز پىكىر ايتاتىن بولساڭىز, ونى بالاڭىز دا تىڭداپ وتىرۋى مۇمكىن. ودان كەيىن ۇستازدىڭ مارتەبەسى قالاي كوتەرىلەدى؟ كوپ ماسەلەلەر وتباسىنا بايلانىستى. وسى ماسەلە بويىنشا دا, ۇستازداردىڭ جالاقىسىن كوتەرۋگە بايلانىستى دا كوپتەگەن جۇمىس اتقارۋدامىز», دەدى ا.ايماعامبەتوۆ.
اتالعان وقۋ ورداسىنىڭ باسشىسى شاكارىم تولىباي ۇلى بۇل شارانىڭ نەگىزگى ماقساتى – مەكتەپ اكىمشىلىگى, مۇعالىمدەر جانە اتا-انالار قاۋىمداستىعىنىڭ اراسىنداعى بىرلىك, وسى بىرلىكتىڭ ارقاسىندا مەكتەپكە جاڭادان قادام باسقان وقۋشىلارعا پەداگوگيكالىق, پسيحولوگيالىق كەڭەس بەرۋ ەكەنىن جەتكىزدى. سونداي-اق كونفەرەنتسيا بارىسىندا «بالانىڭ اقپاراتتىق قاۋىپسىزدىگىن قامتاماسىز ەتۋ», «بالادا ينتەرنەت-تاۋەلدىلىك قالىپتاسۋىنىڭ الدىن الۋ», «مەكتەپ ورتاسىنا دەسترۋكتيۆتى ءدىني اعىمدار ەنگىزۋدىڭ الدىن الۋ», «وتباسىلىق قۇندىلىقتاردى نىعايتۋ», «بالاعا مەكتەپكە وقۋعا بەيىمدەلۋگە ءتيىمدى كومەك شارالارى تۋرالى», «نەيرو-پسيحوفيزيولوگتەردىڭ بولاشاق ءبىرىنشى سىنىپ وقۋشىلارى – ۇلدار مەن قىزداردىڭ اتا-انالارىنا ارنالعان ۇستانىمدارى», «بالانىڭ ءوزىن-ءوزى باعالاۋىن ارتتىرۋعا ىقپال ەتىڭىز» سياقتى ماڭىزدى تاقىرىپتار ماڭايىندا مامانداردىڭ پىكىرى ايتىلدى.
شارا اياقتالعان سوڭ بالاسى 1 سىنىپقا بارعان اتا-انالاردىڭ ءبىرى مارجان نۇرشايىحقىزىن اڭگىمەگە تارتقان ەدىك.
«مەندە بالامدى مەكتەپكە بەرمەي تۇرىپ ءبىلىم سالاسى, مەكتەپ جايلى جاعىمسىز پىكىر باسىم بولدى. سەبەبى ارىپتەستەرىمنەن مەكتەپ جۇيەسىنە كوڭىلدەرى تولمايتىنىن كوپ ەستىگەن ەدىم. وسى كونفەرەنتسياعا شاقىرعان كەزدە قاتارداعى ءبىر جينالىس شىعار دەپ ويلاعان ەدىم. بىراق الۋان ءتۇرلى اقپاراتتار, ماڭىزدى پىكىرلەر ويىمدى تۇگەلدەي وزگەرتتى. ويتكەنى جيىننان كوپ اسەر الدىم. ەڭ ءبىرىنشى, ۇيىمداستىرۋشىلار بۇگىنگى ماڭىزدى ماسەلە, ياعني بالالاردىڭ اقپارات الۋىن, ونى پايدالانۋ جايىن دۇرىس تاڭداعان. ۆيتسە-مينيستر اتاپ وتكەندەي, ءبىز بارلىق مىندەتتى تەك مەكتەپكە نەمەسە مۇعالىمدەرگە ارتىپ قويىپ وتىرماۋىمىز كەرەك. نەگە دەسەڭىز, بالانىڭ قالىپتاسۋىنا اتا-انا دا اسەر ەتەدى. وسىنى ەسكەرە وتىرىپ, اتا-انالار قاۋىمى جۇمىسى قاۋىرت بولسا دا, بالاسىنا نازار اۋدارىپ, قانداي اقپارات الىپ جاتقانىنان حاباردار بولۋى كەرەك. سپيكەرلەردىڭ ءبىلىم مەن تاربيەنى قاتار الىپ ءجۇرۋ كەرەك دەگەن پىكىرى قۇندى جانە بولاشاعىمىز ءۇشىن ماڭىزدى», دەيدى ول.
راۋان قايدار,
«ەگەمەن قازاقستان»
