دەپۋتاتتار قىزىلورداعا ساپاردىڭ العاشقى كۇنى «نۇرشۇعىلا», «سىر بالاجان», «جەتىقازىنا», «سىر ەركەسى» جانە «بەگىم انا» مەكتەپكە دەيىنگى ءبىلىم بەرۋ مەكەمەلەرىنىڭ قىزمەتىمەن تانىستى.
كوميتەت توراعاسى ب.ءايتىموۆا وتىرىستى اشا كەلىپ, مەملەكەت باسشىسىنىڭ جولداۋىنا سايكەس مەملەكەتتىك-جەكەشەلىك ارىپتەستىك نەگىزىندە تۇرعىن ءۇي-كوممۋنالدىق ينفراقۇرىلىمدى جاقسارتۋ ماسەلەلەرىن جەدەل شەشۋدىڭ ماڭىزدىلىعىن اتاپ ءوتتى.
سەناتوردىڭ ايتۋىنشا, مەملەكەتتىك-جەكەشەلىك ارىپتەستىك تەتىكتەرى مەملەكەت پەن بيزنەستىڭ اراسىنداعى ىنتىماقتاستىقتىڭ جاڭا سيپاتى بولىپ تابىلادى جانە ول ەلىمىزدىڭ ۇكىمەتى شەكتەگەن سۋبەكتىلەردەن باسقا ەكونوميكانىڭ بارلىق سالالارىندا كەڭىنەن پايدالانىلا باستادى.
دەنساۋلىق ساقتاۋ سالاسىندا رەسپۋبليكالىق ءۇش مەملەكەتتىك-جەكەشەلىك ارىپتەستىك جوبالارى ازىرلەنۋدە. بۇل تۋرالى دەنساۋلىق ساقتاۋ ءمينيسترىنىڭ ورىنباسارى و.ابىشەۆ حابارلادى. 2016-2019 جىلدارعا ارنالعان «دەنساۋلىق» مەملەكەتتىك دەنساۋلىق ساقتاۋدى دامىتۋ باعدارلاماسى مەملەكەتتىك- جەكەشەلىك ارىپتەستىك نەگىزىندە دەنساۋلىق ساقتاۋ ينفراقۇرىلىمىن ودان ءارى دامىتۋدى كوزدەيدى. مينيسترلىك دەنساۋلىق ساقتاۋ سالاسىنداعى جەكە بيزنەسكە كەدەرگىلەردى ازايتۋ جونىندەگى جۇمىستاردى جالعاستىرىپ كەلەدى.
ءبىلىم بەرۋ سالاسىنداعى «بالاپان» بالالاردى مەكتەپكە دەيىنگى ءبىلىم بەرۋ جانە وقىتۋدى قامتاماسىز ەتۋ باعدارلاماسى جەكە ينۆەستيتسيانى تارتۋدىڭ جارقىن مىسالدارىنىڭ ءبىرى بولىپ وتىر. باعدارلاما جۇزەگە اسا باستاعاننان بەرى مەملەكەتتىك ءبىلىم بەرۋ تاپسىرىسىنا وراي مەكتەپكە دەيىنگى مەكەمەلەرگە جەكە ينۆەستورلاردىڭ قاتىسۋىمەن 200 مىڭنان استام بالالارعا ارنالعان 2 336 جەكە بالاباقشا مەن شاعىن ورتالىقتار اشىلدى.
پارلامەنت ەلىمىزدىڭ كەيبىر زاڭنامالىق اكتىلەرىنە جوعارى وقۋ ورىندارىنىڭ اكادەميالىق جانە باسقارۋشىلىق دەربەستىگىن كەڭەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭدى قابىلدادى, ول مەكتەپتەرگە جان باسىنا شاققانداعى قارجىلاندىرۋ بويىنشا اۋقىمدى اكىمشىلىك جانە ەكونوميكالىق دەربەستىك بەرەدى.
پرەزيدەنتتىڭ بەس الەۋمەتتىك باستاماسىن ىسكە اسىرۋ اياسىندا 2019-2022 جىلداردا ستۋدەنت جاستار تۇراتىن جاتاقحانا جاعدايى جاقسارتىلىپ, 75 مىڭ ورىن قوسىمشا بەرىلەتىن بولادى.
قازىرگى كەزدە اكىمدىكتەر وسىناۋ وزەكتى ماسەلەنى العاشقى جىلدارى 70 مىڭ ادامعا نەمەسە قاجەتتىلىكتى 84 پايىزعا شەشۋگە مۇمكىندىك بەرەتىن جاتاقحانا قۇرىلىسىن سالۋعا 141 جەر تەلىمى بار ەكەنىن ناقتىلادى. پارلامەنت قابىلداعان زاڭ جاتاقحانا سالۋ تەتىكتەرىن ەنگىزۋدى كوزدەيدى.
تالقىلاۋدى قورتىندىلاي كەلىپ, سەناتور ب.ءايتىموۆا ءبىلىم بەرۋ جانە دەنساۋلىق ساقتاۋ سالاسىنداعى مەملەكەتتىك-جەكەشەلىك ارىپتەستىك تەتىكتەرىن رەتتەيتىن زاڭ جوبالارى قارالعان كەزدە ۇسىنىستار پايدالانىلاتىن بولادى, دەپ اتاپ ءوتتى.
كوميتەت وتىرىسىنا قىزىلوردا وبلىسىنىڭ اكىمى ق.كوشەرباەۆ, دەنساۋلىق ساقتاۋ, ءبىلىم جانە عىلىم, ۇلتتىق ەكونوميكا مينيسترلىكتەرىنىڭ, «قازاقستاننىڭ مەملەكەتتىك-جەكەشەلىك ارىپتەستىك ورتالىعى» اكتسيونەرلىك قوعامىنىڭ, وبلىستىق باسقارمالار مەن دەپارتامەنتتەردىڭ وكىلدەرى, قالا اكىمدىكتەرىنىڭ بولىمدەرى مەن وبلىس اۋداندارى باسشىلارى قاتىستى.
دەپۋتاتتار سول كۇنى وبلىستىق مەديتسينا ورتالىعىندا, ەمحانادا, دياگنوستيكا بولىمىندە, قازاق گۋمانيتارلىق زاڭ جانە تەحنيكالىق كوللەدجىندە, «تارلان» دەنەشىنىقتىرۋ-ساۋىقتىرۋ ورتالىعىدا بولىپ, قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ پروفەسسورلىق-وقىتۋشىلار قۇرامىمەن جانە ستۋدەنتتەرىمەن كەزدەستى.
سەناتورلار سونداي-اق سىرداريا اۋدانىندا مەملەكەتتىك-جەكەشەلىك ارىپتەستىكتى قولدانا وتىرىپ, تابىستى قىزمەت ەتىپ كەلە جاتقان ن.يلياسوۆ اۋىلدىق وكرۋگىنىڭ جۇمىسىمەن تانىستى.
پارلامەنتتىڭ ءتورتىنشى سەسسياسىنىڭ اشىلۋىندا مەملەكەت باسشىسى تۋريزم سالاسى كاسىپكەرلىكتى دامىتۋعا زور سەرپىن بەرەتىنى تۋرالى ايتا كەلىپ, 2023 جىلعا دەيىن ءتۋريزمدى دامىتۋ مەملەكەتتىك باعدارلاماسىن ازىرلەۋدى تاپسىرعان بولاتىن. دەپۋتاتتار 8 قىركۇيەكتە تۋريزم يندۋسترياسىن دامىتۋ اياسىندا قارماقشى اۋدانىنداعى «قورقىت اتا» مەموريالدىق كەشەنىنە بارۋدى جوسپارلادى.
سەناتورلار 9 قىركۇيەكتە قىزىلوردا قالاسىنداعى «اتامەكەن» بالالار اۋىلىنا بارادى.
