ەلوردا اكىمدىگى «استانا - ىڭعايلى جانە قاۋىپسىز قالا» جوباسىن دامىتۋدى قولعا العان. جوبا اياسىندا ەندى بىرىڭعاي جيناقتاۋشى زەينەتاقى قورىنىڭ سالىمشىلارى, سونداي-اق بارلىق قالا تۇرعىندارى زەينەتاقىمەن قامسىزداندىرۋ ماسەلەلەرى بويىنشا iKomek ورتالىعىنىڭ وپەراتورلارىنان اقپارات جانە كەڭەس الا الادى.
ايتا كەتەيىك, ورتالىق بارلىق قالالىق قىزمەتتەر بويىنشا دەمالىسسىز جانە تاۋلىك بويى كەڭەس بەرەدى, تۇرعىنداردىڭ شاعىمدارى مەن وتىنىشتەرىن قابىلدايدى, الەۋمەتتىك جەلىلەرگە مونيتورينگ جاسايدى جانە الەۋمەتتىك جەلىلەر ارقىلى كەلىپ تۇسكەن وتىنىشتەرگە جاۋاپ بەرەدى. iKomek 770-تەن استام قىزمەت كورسەتەدى.
ەندى وعان بجزق جۇمىسى مەن كورسەتەتىن قىزمەتتەرى تۋرالى اقپارات بەرۋ جانە «بجزق» اق استانا قالالىق فيليالىنىڭ بايلانىس دەرەكتەرى بويىنشا انىقتامالىق اقپارات بەرۋ قىزمەتى قوسىلدى. ورتالىق 365/24/7 تارتىبىندە جۇمىس ىستەيدى. 109 تەلەفون ءنومىرى, «Smart Astana» ۇيالى قوسىمشاسى نەمەسە الەۋمەتتىك جەلىلەردەگى رەسمي پاراقشالارى ارقىلى ءوتىنىش بىلدىرۋگە بولادى.
