كونە گازەت بەتتەرىن پاراقتاساق, ورال قالاسىندا 1960-1970 جىلدارى وسىنداي وتكەل كوپىرلەردىڭ سالىنۋى ۇلكەن وقيعا, قالا دامۋىنىڭ كورىنىسى رەتىندە اتالىپ ءوتىپتى. راسىندا دا وبلىس ورتالىعىن ايقىش-ۇيقىش كەسىپ وتەتىن تەمىرجول تورابى اۆتوكولىك جولىمەن قيىلىسپاي, ءبىر-بىرىنە كەدەرگى كەلتىرمەۋى قاۋىپسىزدىك ءۇشىن دە, ۋاقىت ۇتۋ ءۇشىن دە قاجەتتى شارا عوي. بۇگىندە ءىرى مەگاپوليستەردە باعدارشام ازايىپ, اۆتوكولىك جولدارىنىڭ ءوزى ءبىر-بىرىنە كەدەرگى كەلتىرمەۋى قاتاڭ قاداعالانادى.
ءبىز ايتىپ وتىرعان دەپو كورىپى 1965 جىلى سالىنعان ەكەن. ورال تەمىرجول ۆوكزالىنىڭ ءدال ىرگەسىندە تۇرعان كۇردەلى نىسان. استىنان التى توراپ شويىن جول وتەتىن كوپىر ورالدىڭ ەڭ ۇلكەن ەكى اۋدانىن ءبىر-بىرىنە جالعايدى. كۇنى-ءتۇنى قولدانىستان ابدەن توزىعى جەتكەن كوپىر سوڭعى جىلدارى ىرگەسى سوگىلىپ, سىمدارى شىعىپ, شارشاعانى ءبىلىنىپ-اق جۇرگەن ەدى. قازىرگى كولىك تاسقىنىنىڭ دا ءنوپىرى بولەك قوي. كوپىردىڭ كىلت بۇرىلىسىندا جول-كولىك وقيعاسى بولىپ, كولىك قۇلاپ كەتكەن وقيعالار دا كەزدەستى.
دەپو كوپىرى 2017 جىلى 1 ناۋرىزدا جوندەۋگە جابىلدى. شىنىن ايتۋ كەرەك, اۆتوبۋس مارشرۋتتارى وزگەرىپ, اينالما جولدارعا سالماق ءتۇسىپ, ورالدىقتار ءۇشىن وتە قولايسىز جاعداي بولدى. «جوندەۋ جۇمىسى ەكى جىلعا سوزىلادى» دەگەن حابار دا قيىن ءتيدى. كوپىردى كۇردەلى جوندەۋ جۇمىسىمەن «كا ستروي لتد» جشس اينالىستى. «قاراشىعاناق پەترولەۋم وپەرەيتينگ ب.ۆ" كومپانياسى قارجىلاندىرعان جۇمىستى كۇردەلى جوندەۋ دەگەننەن گورى جاڭا نىسان دەسە دە بولادى – ويتكەنى بۇرىنعى كوپىردىڭ ورنىندا تۇرعانى بولماسا تۇگەلىمەن جاڭا قۇرىلىس. ۇزىندىعى 536 مەترلىك كوپىردىڭ ەنى ەكى ەسەدەن ارتىق كەڭىپ, بۇرىنعى ەكى جولاقتىڭ ورنىنا ءتورت جولاقتى جول پايدا بولدى. جاياۋ ادام جۇرەتىن قوسىمشا سوقپاق تا قاراستىرىلعان.
ەكى جىلعا جوسپارلانعان قۇرىلىس 17 ايدا ءبىتىپ, بۇگىن «قالا كۇنى» مەرەكەسى اياسىندا قايتا پايدالانۋعا بەرىلدى. جاڭا كوپىردەن العاشقى بولىپ وتكەن كولىكتەر بۇل وقيعاعا ەرەكشە شاتتانىپ, كولىك دابىلىن باسىپ, ازان-قازان, ۋ-شۋ توي بولدى.
قازبەك قۇتتىمۇرات ۇلى,
«ەگەمەن قازاقستان»
ورال قالاسى
