بۇگىندە ىرگەلى ەلگە اينالىپ, قاناتىن كەڭگە جايعان ۇرپاقتىڭ ۇيىمداسۋىمەن الماتى وبلىسى ۇيعىر اۋدانىنىڭ شونجى اۋىلىندا «رۋحاني جاڭعىرۋ» باعدارلاماسى اياسىندا جارتى باباعا ارنالعان مەموريالدىق كەشەننىڭ اشىلۋ سالتاناتى ءوتتى. ەسكەرتكىشتىڭ اشىلۋ سالتاناتىندا ۇيعىر اۋدانىنىڭ اكىمى شۋحرات نۋراحۋنوۆ قالىڭ كوپشىلىككە جىلى لەبىزىن ءبىلدىرىپ, الماتى وبلىسىنىڭ اكىمى اماندىق باتالوۆتىڭ وسى شاراعا ارنالعان قۇتتىقتاۋ ءسوزىن وقىدى. «جەر جانناتى جەتىسۋ وڭىرىندە, قارادالا جەرىندە بابا رۋحىنا تاعزىم ەتەر تاريحتان سىر شەرتەتىن ورىنداردىڭ اشىلۋى – ۇلكەن قۋانىش. ەل اراسىندا جارتى اتالىپ كەتكەن بابانىڭ اۋليەلىگى, ەمشى-تاۋىپشىلىگى, ەلىن امان الىپ قالعان كورەگەندىگى, تۇتاس ءبىر ەلگە تيگەن شاپاعاتى ءوز زامانىندا بابانى اسقاق ابىرويعا كەنەلتكەن. تۇتاستاي ەلدىڭ اماندىعىن اڭساعان بابانىڭ اتىن ۇلىقتاۋ, ەسىمىن ەلگە تانىتىپ, ۇرپاق جادىندا قالدىرۋ – ءبىزدىڭ مىندەتىمىز. مەموريالدى كەشەننىڭ باتىر بابالار رۋحىن اسقاقتاتىپ, بولاشاق ۇرپاقتى وتانسۇيگىشتىككە تاربيەلەپ وي سالارى ءسوزسىز» دەلىنگەن قۇتتىقتاۋدا.
«رۋحاني جاڭعىرۋ باعدارلاماسى» اياسىندا تاريحي ەسكەرتكىشتەر مەن مادەني نىسانداردى قالپىنا كەلتىرۋ, ەل تاريحىندا وتكەن ازاماتتاردىڭ ەسىمدەرىن جاڭعىرتۋ ارقىلى ۇرپاققا ۇلتتىق تاريحىمىزدى تانىتا الاتىنىمىز كامىل ەكەندىگىن اتاپ وتكەن اۋدان اكىمى وسى شاراعا اقجارما تىلەكتەرىن ارقالاي كەلگەن سارقان, كوكسۋ, قاراتال, پانفيلوۆ, رايىمبەك, كەگەن اۋداندارىنىڭ ازاماتتارىنا العىسىن ءبىلدىردى.
قۇلاشىن كەڭگە سەرمەگەن ماۋەلى بايتەرەك بولىپ بەينەلەنگەن ەسكەرتكىشتىڭ اشىلۋىندا «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆتىڭ قۇتتىقتاۋ ءسوزى وقىلدى.
جازۋشى نۇرلان ورازالين بۇل شارا جارتى باباعا عانا ەمەس, قازاقتىڭ قازاق بولىپ قالۋىنا ۇلەس قوسىپ, الاشتىڭ تۋىن ۇستاعان مىڭداعان بابالارىمىزعا جاسالعان قۇرمەت, دەپ اتاپ وتسە, شارانىڭ ۇيىمداستىرۋ كوميسسياسىنىڭ توراعاسى, الماتى وبلىستىق ءماسليحاتىنىڭ دەپۋتاتى ىزعاربەك بەكتۇرسىنوۆ «رۋحاني جاڭعىرۋ» باعدارلاماسى اياسىندا تاعىلىمى زور, تاربيەلىك ءمانى مول جارتى بابا ۇرپاقتارىنىڭ ۇيىتقى بولۋىمەن سالىنعان «جارتى بابا» مەموريالدىق كەشەنى مەن ء«تۇپ-تۇقيان توعايى» ساياباعى ماڭگىلىك ەل بولۋ جولىنداعى ىزگى مۇراتتاردىڭ ءبىرى بولىپ قالاتىندىعىنا توقتالدى. سونداي-اق, ەسىمى ەلىمىزگە تانىمال پۋبليتسيست-جازۋشى تەلمان جانۇزاقوۆ, قالامگەر باققوجا مۇقاي سىندى جارتى بابادان تارايتىن ۇرپاقتاردى ماقتانىشپەن اتاپ ءوتتى. ولاردىڭ قاتارىندا سونىمەن قاتار پروفەسسور تەلعوجا جانۇزاق, جازۋشى-جۋرناليست, ەلىمىزدىڭ باس گازەتى «ەگەمەن قازاقستاندا» باس رەداكتوردىڭ ورىنباسارى, باس رەداكتور, ۆيتسە-پرەزيدەنتى بولعان جانبولات اۋپباەۆ, جازۋشى دانەش احمەتوۆ, پروفەسسور شەرۋباي قۇرمانباي ۇلى, قازاقستان رەسپۋبليكاسىنىڭ ەڭبەك سىڭىرگەن ارتىستەرى سۇلۋشاش نۇرماعانبەتوۆا, مۇرات احمانوۆ, مەملەكەتتىك «دارىن» جاستار سىيلىعىنىڭ يەگەرى, وسى مەموريال-ەسكەرتكىشتىڭ اۆتورى ەلدوس ەلمۇرات ۇلى, ءداستۇرلى انشىلەر تىلەۋلەس قۇرمانعاليەۆ پەن ارداق بالاجانوۆا, اقىن-جۋرناليست نۇرلان قالقا, وبلىستىق «جەتىسۋ» گازەتىنىڭ ءتىلشىسى ۇلبوسىن بورىبايقىزى, وبلىستىق «جەتىسۋ» گازەتى باس رەداكتورىنىڭ ورىنباسارى جۇماتاي وسپان ۇلى مەن جەتى جاسىنان التى الاشقا تاڭداي قاقتىرعان بالا جامبىل ەسىمدەرىنە ەرەكشە توقتالىپ ءوتتى.
شارا بارىسىندا قازاقستاننىڭ حالىق ءارتىسى ءاسانالى ءاشىموۆ, گەنەرال-لەينەنات ءادىل شاياحمەتوۆ, ت.ب. ازاماتتار ىزگى لەبىزدەرىمەن بولىسسە, ۇيىمداستىرۋشىلار وسى يگى ىسكە قولداۋ بىلدىرگەن ازاماتتارعا ات مىنگىزىپ, شاپان جاپتى. ال قازاقستاننىڭ حالىق ءارتىسى نۇرعالي ءنۇسىپجانوۆ, سۇلۋشاش نۇرماعانبەتوۆامەن قاتار جىگەر اۋىپباەۆ, ت.ب. جاس ونەرپازدار ءان سالىپ, دالا ءتوسىن كوڭىلدى اۋەنگە بولەدى. كوك مايسادا قاناتىن كەڭگە جايعان اڭ ششاڭقان كيىز ۇيلەر كەلگەن قوناقتارعا ەسىگىن ايقارا اشىپ, «جارتى بابا شەجىرەسى» كوپشىلىككە ۇلەستىرىلدى. كيەلى قارادالانى دۇرىلدەتكەن ءدۇبىرلى شارا قازاقتىڭ ات بايگەسىنە ۇلاستى.
ەلۆيرا بوكەنباەۆا,
«ەگەمەن قازاقستان»
الماتى وبلىسى
