كوركەم گيمناستيكادان كوماندالىق جارىستا التىن جۇلدە جەڭىپ العان قازاقستاندىق سپورتشى الينا ءادىلحانوۆا كەشەگى جارىس كۇنىندە جەكەلەي سىندا دا توپ جارىپ, ازيا ويىندارىنىڭ ەكى دۇركىن چەمپيونى اتاندى. الينا جەكەلەي سىندا جالپى سانى 66.800 ۇپاي جيناپ, التىن مەدال يەلەندى. كۇمىس جۇلدە وزبەكستان ارۋى ءسابينا تاشكەنباەۆاعا (65,850 ۇپاي) بۇيىرسا, 65,500 ۇپاي جيناعان قىتاي وكىلى ياتينگ جاو قولا جۇلدەنى قاناعات تۇتتى.
سونداي-اق بۇل سىندا الينامەن بىرگە كوماندالىق ەسەپتە جەڭىسكە جەتكەن اديليا تلەكەنوۆا دا قاتىسقان بولاتىن. وكىنىشكە قاراي, ول 57,250 بالل توپتاپ, 24 سپورتشىنىڭ اراسىنان 10-ورىن يەلەندى.
كوركەم گيمناستيكادان قازاقستان ۇلتتىق قۇراما كومانداسىنىڭ باس باپكەرى ءاليا يۋسۋپوۆا گيمناسشى الينا ءادىلحانوۆانىڭ كوپسايىستاعى جەڭىسىنە قاتىستى ۇلتتىق وليمپيادا كوميتەتىنىڭ ءباسپاسوز قىزمەتىنە بەرگەن سۇحباتىندا بۇگىنگى باسەكە كەشەگىگە قاراعاندا جاۋاپكەرشىلىك جۇگى وتە اۋىر بولدى دەيدى. ء«بىرىنشى سايىستان كەيىن الينا ەكىنشى ورىندا تۇرعاندا ول دا, مەن دە قاتتى قوبالجىدىق. دەگەنمەن, وعان داۋىس كوتەرىپ, كوڭىل كۇيىن تۇسىرگىم كەلمەدى. سەبەبى قىزىمىزدىڭ ءالى ەكى سايىسى بارىن, ونىڭ ءوزى كوپ نارسە شەشەتىنىن ءتۇسىندىم. سوندىقتان «نە ىستەۋ كەرەكتىگىن بىلەسىڭ, قولىڭنان نە كەلەدى, سونى ىستە. سەن جارىستى باستادىڭ, ەندى شەگىنەرگە جول جوق» دەپ اقىلىمدى ايتتىم. ول ايتقانىمدى ەكى ەتپەي, تاپسىرمانى مۇدىرمەي ورىنداپ شىقتى. بالالار ءۇشىن ەكى كۇن قاتارىنان وسىنداي سالماقتى جارىسقا جاۋاپكەرشىلىكپەن قاتىسۋ وتە قيىنعا سوعادى. اسىرەسە بۇگىنگى جارىس كۇنى جاۋاپكەرشىلىك جاعىنان وتە اۋىر كۇن بولدى», دەيدى ءاليا يۋسۋپوۆا.
ازيا ويىندارىنداعى كەزەكتى قولا مەدالدى سينحروندى ءجۇزۋشى سپورتشىلارىمىز جەڭىپ الدى. جۇپتاسىپ ونەر كورسەتۋدە سىنعا تۇسكەن ەكاتەرينا مەن الەكساندرا نەميچ جارىس قورىتىندىسى بويىنشا ۇزدىك ۇشتىككە ەندى. نەميچتەر جالپى ەسەبى 170.8845 ۇپاي جينادى. ال التىن مەدال العان قىتايلىق سپورتشىلار 186.5101, كۇمىس جۇلدەگەر اتانعان جاپونيا كومانداسىنىڭ قىزدارى 182.3363 ۇپاي يەلەندى.
وسىلايشا ازيا ويىندارىنىڭ توعىزىنشى كۇنى ەلىمىزدىڭ قورجىنىنا ءبىر التىن, ءبىر قولا جۇلدە ءتۇستى. ازىرشە جەڭىل اتلەتتەرىمىزگە ەكى قولادان باسقا مەدال بۇيىرماي تۇر. ال بوكسشىلارىمىز ءبىر جۇلدەنى ناقتىلاپ قويدى. 69 كيلودا جۇدىرىقتاساتىن وتانداسىمىز اسلانبەك شىمبەرگەنوۆ كەشە قىرعىزستاندىق ءابدىراحمان ءابدىراحمانوۆتى ۇپاي سانىمەن جەڭىپ, جارتىلاي فينالعا شىقتى. ياعني, قورجىندا كەمىندە قولا جۇلدە بار دەگەن ءسوز. دەگەنمەن, وليمپيا ويىندارىندا «قازاقتىڭ سالماعى» سانالىپ كەتكەن 69 كيلونىڭ جۇگىن ارقالاپ جۇرگەن اسلانبەكتەن تەك التىن مەدال كۇتەمىز.
ال بۇگىننەن باستاپ دزيۋدوشىلارىمىز جارىس جولىنا شىعادى. وتانداستارىمىزدان العاش بولىپ تاتاميگە ەلدوس سمەتوۆ (60 كگ), ەلدوس جۇماقانوۆ (66 كگ), وتگونتسەتسەگ گالبادراح (48 كگ) جانە كامشات قاراسايقىزى (52 كگ) شىعادى. ينچحون (2014 جىل) ازياداسىندا دزيۋدوشىلار 1 التىن, 1 كۇمىس, 3 قولا مەدال جەڭىپ العان. دزيۋدودان قازاقستان ەرلەر ۇلتتىق قۇراما كومانداسىنىڭ باس باپكەرى ايدىن سماعۇلوۆ بيىلعى ازيا ويىندارىندا 1 التىن, 1 كۇمىس, 1 قولا جۇلدەنى جوسپارلاپ وتىرمىز, دەپ ايتقان بولاتىن.
ءالي بيتورە,
«ەگەمەن قازاقستان»
