ءىس-شاراعا سىرتقى ىستەر ءمينيسترىنىڭ ورىنباسارى رومان ۆاسيلەنكو, «قازپوشتا» اق اكىمشىلىك ماسەلەلەر جونىندەگى باسقارۋشى ديرەكتورى باۋىرجان اينابەكوۆ, سونداي-اق اتوم جوباسىنىڭ قۇرمەتتى ەلشىسى كارىپبەك كۇيىكوۆ قاتىستى.
جاڭا پوشتا ماركاسى مەملەكەت باسشىسى نۇرسۇلتان نازارباەۆتىڭ باستاماسىمەن ىسكە قوسىلعان يادرولىق قارۋدىڭ جويىلۋىنا قولداۋ كورسەتەتىن اتوم (Abolish testing - our mission) جوباسىنا ارنالعان.
«اتوم جوباسى – ەلباسى نۇرسۇلتان نازارباەۆتىڭ جاھاندىق يادرولىق قارۋسىزدانۋ جانە قوعامدىق ديپلوماتيا سالاسىنداعى ماڭىزدى باستاماسى. بۇل باستامانى ەلباسى 2012 جىلدىڭ 29 تامىزىندا «يادرولىق سىناقتارعا تىيىم سالۋدان – بەيبىتشىلىككە, يادرولىق قارۋدان – ەركىندىككە» اتتى حالىقارالىق كونفەرەنتسيا كەزىندە كوتەرگەن بولاتىن», دەدى ر.ۆاسيلەنكو.
سونداي-اق ر.ۆاسيلەنكو قازاقستاندا شەتەلدىك سەرىكتەستەرمەن بىرگە يادرولىق قارۋعا قارسى كۇرەس كۇنىنە ارنالعان ءىرى حالىقارالىق شارالار ۇيىمداستىرىلاتىنىن جەتكىزدى. 29 تامىزدان 1 قىركۇيەككە دەيىن استانادا قر ءسىم مەن شەتەلدىك ساياسي جانە قوعامدىق-ساراپشىلىق توپ وكىلدەرىنىڭ قاتىسۋىمەن يادرولىق سىناقتارعا جاپپاي تىيىم سالۋ تۋرالى شارتقا قاتىستى ءتورت كۇندىك كونفەرەنتسيا وتەدى.
جيىن بارىسىندا ءسوز العان ك.كۇيىكوۆ اتوم جوباسىنىڭ ماقساتى الەمدەگى يادرولىق سىناقتاردى تۇپكىلىكتى توقتاتۋ جانە اتوم بومباسىنان ازات الەم قۇرۋ جولىندا بىرىگۋ ەكەنىن اتاپ ءوتتى.
«اتوم جوباسىنىڭ سايتىندا ەل كوشباسشىلارىنان يادروسىز الەمدى قۇرۋ تالاپ ەتىلگەن پەتيتسيا ورنالاستىرىلدى. وعان الەمنىڭ 100 ەلىنەن 312 مىڭنان استام ادام قول قويدى. ءبىزدىڭ ەندىگى ماقساتىمىز – 1 ميلليون قول جيناۋ. جوبانىڭ www.theatomproject.org سايتىنداعى پەتيتسياعا قول قويۋعا مۇمكىندىك بار. سول ارقىلى يادرولىق قارۋسىز الەمدى قۇرۋعا ۇلەس قوسا الاسىزدار», دەدى ك.كۇيىكوۆ.
اتوم جوباسىنىڭ «جەر بەتىندەگى ءومىر ءۇشىن» پوشتالىق ماركاسى وفسەتتىك باسپامەن كوك جانە سارى ءتۇستى بوياۋدا جاسالعان. پەرفوراتسياسى يرەك ءتارىزدى, تيراجى – 20 000 دانا.
اباي اسانكەلدى ۇلى,
«ەگەمەن قازاقستان»
