بۇل قازاقستانداعى تەڭىز مۇنايگاز كەنورىندارىن يگەرۋدىڭ العاشقى ءىرى جوباسى. مەرەكەنى اتاپ ءوتۋ اياسىندا اتىراۋدا «قاشاعان- قازاقستاننىڭ بولاشاعى ءۇشىن» عىلىمي-تاجىريبەلىك كونفەرەنتسياسى وتكىزىلدى. NCOC باسشىلىعى مەن كونسورتسيۋم ۇجىمى, قاشاعان كەنورنىن العاش اشقان ارداگەرلەردىڭ الدىندا اتىراۋ وبلىسىنىڭ اكىمى نۇرلان نوعاەۆ ءسوز سويلەدى. جوبانىڭ ماڭىزدىلىعىنا توقتالا وتىرىپ, وبلىس اكىمى مەملەكەت باسشىسى نۇرسۇلتان نازارباەۆتىڭ قۇتتىقتاۋىن وقىدى.
«بۇل جوبا قازاقستاننىڭ مۇنايگاز سالاسى ءۇشىن ەڭ ءىرى جانە ماڭىزدى جوبالاردىڭ بىرىنە اينالدى. تاۋەلسىزدىكتىڭ العاشقى جىلدارىندا جاس مەملەكەتىمىز ءۇشىن كاسپي قايراڭىنداعى ءىرى قاشاعان كەنورنىن يگەرۋ ايىرىقشا وقيعا بولدى. جوبانى ىسكە اسىرۋ قازاقستانعا شەتەلدىك ينۆەستيتسيالاردى, جاڭا تەحنولوگيالاردى, كۇردەلى تەڭىز كەنورىندارىن يگەرۋدەگى الەمدىك تاجىريبەنى تارتۋعا مۇمكىندىك بەردى. بۇل وسى جوباعا بارلىق قاتىسۋشىلاردىڭ ۇلكەن ەڭبەگى. بۇل جۇمىس العا قاراي دا ەلىمىزدىڭ ەكونوميكاسى مەن ەنەرگەتيكالىق قاۋىپسىزدىگى ءۇشىن پايدا اكەلەدى دەپ سەنەمىن», - دەلىنگەن نۇرسۇلتان نازارباەۆتىڭ قۇتتىقتاۋىندا.
وبلىس اكىمى سولتۇستىك كاسپي جوباسى بۇگىنگى كۇنى ەلىمىزدىڭ ەكونوميكاسىنا ايتارلىقتاي ىقپالىن تيگىزىپ وتىرعان قاشاعان جوباسى عانا ەمەس ەكەنىن اتاپ ءوتتى.
- بۇل يگەرۋ كۇتىلىپ وتىرعان باسقا دا كەنورىندارى. مەن بۇگىنگى ۇجىمنىڭ الدارىنا قويعان مىندەتتەردى تولىق ورىندايتىنىنا سەنەمىن. از جۇمىس اتقارىلعان جوق, الايدا الدا ءالى دە اتقارىلاتىن جۇمىستار كوپ. «نولدىك تسيكل», قورشاعان ورتاعا ۇقىپپەن قاراۋ, قاۋىپسىزدىك تەحنيكاسىنىڭ ماسەلەلەرى – بۇل جوبانىڭ باسىندا تۇرعان وزەكتى مىندەتتەر جانە كۇنى بۇگىنگە دەيىن ومىرلىك ماڭىزدى ماسەلەلەر بولىپ تابىلادى. ولاردى شەشۋ ءۇشىن الەمدىك مۇناي سالاسىنىڭ بارلىق تاجىريبەسى مەن الەۋەتىن پايدالانۋ قاجەت, دەپ اتاپ كورسەتتى نۇرلان نوعاەۆ.
قاشاعان جوباسىن ىسكە اسىرۋ ەكى – اتىراۋ جانە ماڭعىستاۋ وبلىستارىنىڭ اۋماعىندا جۇرگىزىلۋدە. ماڭعىستاۋ وبلىسىنىڭ اكىمى ەرالى توعجانوۆ اتاپ وتكەندەي, كونسورتسيۋمنىڭ ءىرى الەۋمەتتىك جوبالاردى ىسكە اسىرۋداعى ۇلەسى ايتارلىقتاي.
- بۇل پرەزيدەنتىمىزدىڭ جوباسى, ەلىمىزدىڭ, تاۋەلسىز قازاقستاننىڭ دامۋىنا قۋاتتى سەرپىن بەرەتىن ءىرى جوبا. مەن جاقىندا اقتاۋ قالاسىندا وتكەن كاسپي ماڭى مەملەكەتتەرى باسشىلارىنىڭ قاتىسۋىمەن وتكەن ءىرى سامميتكە بەلسەنە قاتىسقانى ءۇشىن كونسورتسيۋم باسشىلىعىنا العىس بىلدىرگىم كەلەدى. كاسپي تەڭىزىنىڭ قۇقىقتىق مارتەبەسى ناقتى بەلگىلەنىپ, قول قويىلدى. بۇل تاريحي وقيعا. ءسامميتتى وتكىزۋگە ءسىزدىڭ كونسورتسيۋمنىڭ قوسقان ۇلەسى مول, دەدى ەرالى توعجانوۆ.
NCOC كونسورتسيۋمىنىڭ باسقارۋشى ديرەكتورى برۋنو جاردەن كاسپيدەگى كەنورىندارىن ىسكە اسىرۋ جونىندەگى بولاشاقتاعى جوبالار تۋرالى ايتىپ بەردى. جوبانىڭ ەكونوميكالىق ماڭىزدىلىعىن ايتارلىقتاي ارتتىراتىن پەرسپەكتيۆالىق كەنورىندار بار. جوبانىڭ تاريحى مەن بۇگىنگى جەتىستىكتەرى تۋرالى قازاقستاندىق مۇنايشى-گەولوگتار قوعامىنىڭ پرەزيدەنتى بالتابەك قۋاندىقوۆ, NCOC كونسورتسيۋمىنىڭ باسقارۋشى ديرەكتورى جاقىپ ماراباەۆ جانە باسقالارى اڭگىمەلەدى.
سونىمەن بىرگە, كونفەرەنتسيادا ءسوز سويلەگەن قر ەنەرگەتيكا ۆيتسە-ءمينيسترى ماعزوم مارزىعاليەۆ كاسپي قايراڭىنداعى ودان ءارى ىنتىماقتاستىقتىڭ پەرسپەكتيۆالارىن اتاپ ءوتتى. جاڭا كەنورىندارىن اشۋ ينۆەستيتسيالار سالۋدى, جاڭا تەحنولوگيالار تارتۋدى جانە جاڭا جۇمىس ورىندارىن اشۋدى تالاپ ەتەدى. بۇگىنگى كۇنى كونسورتسيۋم شامامەن 16 ملن توننا مۇناي مەن كوندەنسات, 5 ملرد تەكشە مەتردەن استام گاز ءوندىردى, 700 مىڭ توننادان استام كۇكىرت ەكسپورتتادى. بۇل قازاقستاننىڭ تەڭىز جوبالارىن دامىتۋدىڭ باستاماسى عانا.
كونفەرەنتسيانىڭ سوڭىندا كونسورتسيۋمنىڭ بىرقاتار باسشىلارى, جاۋاپتى قىزمەتكەرلەرى, جوبا ارداگەرلەرى «قازاقستاننىڭ مۇنايگاز سالاسىنىڭ ەڭبەگى سىڭگەن قىزمەتكەرى» توسبەلگىسىمەن, «قازاقستاننىڭ مۇنايگاز سالاسىن دامىتقانى ءۇشىن» مەدالىمەن, گراموتالارمەن جانە العىس حاتتارمەن ماراپاتتالدى.
29 تامىزدا سولتۇستىك كاسپي جوباسىنىڭ 25 جىلدىعىن تويلاۋ «قاشاعان داۋىسى» ۆوكالدى ورىنداۋشىلاردىڭ مۋزىكالىق كونكۋرسىمەن جالعاسادى. ءىس-شارا ن.ءجانتورين اتىنداعى فيلارمونيادا وتەدى. سول كۇنى كەشكە سۇلتان بەيبارىس اتىنداعى الاڭدا اتىراۋ تۇرعىندارى مەن قوناقتارى ءۇشىن ويىن-ساۋىق باعدارلاماسى باستالادى. كورەرمەندەردىڭ نازارىنا سۋرەت سالۋدان شەبەرلىك كلاستارى, كوشە بي توپتارىنىڭ ونەرلەرى ۇسىنىلادى. سونىمەن قاتار «بەشيكتاش» فك فۋتبول شەبەرلىگى بويىنشا شەبەرلىك كلاستارى وتەدى.
