ەل ەكونوميكاسىنداعى ەڭ اۋىر ەڭبەكتىڭ ءبىرى شاحتەرلەردىڭ ەنشىسىندە ەكەنى بەلگىلى. قاراعاندى وبلىسىنىڭ اكىمى ەرلان قوشانوۆ وڭىردەگى بايىرعى كەن ورىندارىنىڭ ءبىرى كوستەنكو اتىنداعى شاحتادا بولىپ, كەنشىلەرمەن جۇزدەستى. ءوڭىر باسشىسى ءوزى دە شاحتاعا ءتۇستى. كومىرشىلەرمەن جۇمىس بارىسىندا جۇزدەسىپ, ولاردىڭ حال-جايىمەن تانىستى. ولارعا ەلباسى ن.نازارباەۆتىڭ كەنشىلەردىڭ ەڭبەك جاعدايىن ۇنەمى سۇراپ, باقىلاۋدا ۇستاپ وتىراتىنىن جەتكىزدى.
قاراعاندى شاحتالارىن باسقاراتىن «ارسەلورميتتال تەمىرتاۋ» اق جىلدىڭ باسىنان بەرى ەڭبەككەرلەردىڭ جالاقىسىن 33,55%-كە ارتتىرعان.
پرەزيدەنت تاپسىرماسىمەن «ارسەلورميتتال تەمىرتاۋ» اكتسيونەرلىك قوعامىن دامىتۋدىڭ 2018-2020 جىلدارعا ارنالعان جول كارتاسى جاسالىپ, بۇل قۇجاتقا ينۆەستيتسيالار جانە دامۋ جونىندەگى ءمينيسترى جەڭىس قاسىمبەك, قاراعاندى وبلىسىنىڭ اكىمى ەرلان قوشانوۆ جانە اتالعان كومپانيانىڭ باس ديرەكتورى پارامجيت كالون قول قويعان بولاتىن. جول كارتاسىنا سايكەس, «ارسەلورميتتال تەمىرتاۋ» ءۇش جىل ىشىندە بولات, كومىر جانە كەن دەپارتامەنتتەرىنىڭ وندىرىستىك نىساندارىنا 305 ملرد تەڭگە ينۆەستيتسيالايدى. جىلعا شاققاندا, كومپانيا بيىل 100 ملرد تەڭگە, 2019 جىلى 105 ملرد تەڭگە جانە 2020 جىلى تاعى 100 ملرد تەڭگە قۇيماق. ايتا كەتۋ كەرەك, بىلتىر كومپانيا تەك 50 ملرد تەڭگە ينۆەستيتسيالاعان بولاتىن.
وسى قاراجاتتاردىڭ ەسەبىنەن ءوندىرىس وشاقتارى جەتىلدىرىلىپ, ماتەريالدىق-تەحنيكالىق تۇرعىدان جاقسارتىلىپ, شاحتەرلەر ەڭبەك قاۋىپسىزدىگىن قامتاماسىز ەتۋ شارالارى جۇزەگە اسىرىلادى. يندۋستريانىڭ 4.0. ستاندارتتارى قولدانىلادى. الداعى ۋاقىتتا ەكولوگيا ماسەلەلەرىنە دە باسا كوڭىل بولىنبەك.
قايرات ءابىلدا,
«ەگەمەن قازاقستان»
قاراعاندى
