كەزدەسۋ بارىسىندا شاعىن جانە ورتا كاسىپكەرلىك سۋبەكتىلەرى ءۇشىن جەر تەلىمدەرىن قولجەتىمدى ەتۋ, كوتەرمە جانە تاراتۋ ورتالىقتارىن سالۋ جانە باسقا دا ماسەلەلەر تالقىلاندى. اسىرەسە جەر تەلىمدەرى تۋرالى اقپاراتتىڭ قولجەتىمدىلىگىنە ەرەكشە نازار اۋدارىلدى. «اتامەكەن» ۇكپ باسقارما توراعاسىنىڭ ايتۋىنشا, وبلىستا قولدانىستاعى باس جوسپاردىڭ ماتەريالدارى مەن ەگجەي-تەگجەيلى جوسپارلاۋدى قامتيتىن قالا قۇرىلىسى جوبالارى بويىنشا گەواقپاراتتىق دەرەكتەر بازاسىن قۇرۋ قولعا الىنعان. مۇنداي جۇمىس قىزىلوردا وبلىسىندا, استانا مەن الماتى قالالارىندا دا جۇرگىزىلۋدە.
– اكىمدىكتەردىڭ باس جوسپارلار تۋرالى, بوس جاتقان جەر ۋچاسكەلەرى جايلى اقپاراتتى ونلاين ارقىلى قولجەتىمدى ەتۋدىڭ ماڭىزى زور. مىسالى, 5-6 سيىرى بار «باستاۋدىڭ» تۇلەگى ءوز شارۋاسىن كەڭەيتىپ, تاعى 10-15 سيىر ساتىپ الۋعا نيەتتەندى دەلىك. وعان جايىلىم كەرەك. ول جەر ۋچاسكەسىنىڭ نەمەسە بوس جاتقان جەر ۋچاسكەسى تۋرالى اقپاراتتىڭ دا جوقتىعىن بىلەدى. سوندىقتان كاسىپكەرگە بارلىق اقپارات ونلاين رەجىمدە قولجەتىمدى بولۋعا ءتيىس. كاسىپكەرلەر ەسىكتەردى قاقپاي, بارلىق قىزمەتتى ءبىر جەردەن الۋى ءۇشىن بۇل الاڭدى وڭىرلىك پالاتالار ارقىلى قۇرۋ كەرەك, – دەدى ابىلاي مىرزاحمەتوۆ.
سونداي-اق ول قارجى رەسۋرستارىن الۋدى وڭايلاتۋ, مەملەكەتتىك ساتىپ الۋدى جەتىلدىرۋ, وتاندىق تاۋار وندىرۋشىلەردى قولداۋ جانە كادرلاردى وقىتۋ تۋرالى اتقارىلعان جانە جوسپارلانعان جۇمىستار بارىسى تۋرالى اڭگىمەلەدى.
ايماقتارداعى فەرمەرلەردى الاڭداتقان تاعى ءبىر ماسەلە – ساۋدا جەلىلەرىنىڭ جوقتىعى. بۇگىنگى تاڭدا الەۋمەتتىك-كاسىپكەرلىك كورپوراتسيالار (اكك) ەلدى مەكەندەردە فەرمەرلەر ونىمدەرىن وتكىزەتىن كوتەرمە جانە تاراتۋ ورتالىقتارىن قۇرۋدا. ا.مىرزاحمەتوۆ ايتقانداي, فەرمەرلەر نارىققا شىعۋ ماسەلەسىمەن وزدەرى عانا اينالىسپاۋعا ءتيىس. ولار تەك ءونىمدى قويماعا وتكىزىپ, تيەسىلى قاراجاتتى الۋعا مىندەتتى. قازىرگى تاڭدا «اتامەكەن» مۇنداي ورتالىقتار جۇيەسىن قۇرۋدى اۋىل شارۋاشىلىعى مينيسترلىگىمەن بىرلەسىپ قولعا العان.
كەزدەسۋ بارىسىندا الماتى وبلىسى كاسىپكەرلەر پالاتاسى وڭىرلىك كەڭەسىنىڭ ءتورايىمى ريمما سالىقوۆا كاسىپكەرلىككە ۇزاق مەرزىمدى كەلىسىمشارتتاردى ەنگىزۋ قاجەتتىلىگى تۋرالى ماسەلەنى كوتەردى.
– ءبىزدىڭ زاۋىت جول قۇرىلىسى ماتەريالدارىن وندىرۋمەن اينالىسادى. نارىققا شىققانىمىزعا 10 جىل بولدى. تەندەرلەر جەلتوقسان ايىندا, كەيدە قاڭتاردا نەمەسە اقپان ايىندا وتەدى, ال تاپسىرۋشى ءونىمدى ناۋرىز ايىندا تالاپ ەتەدى. وسى از ۋاقىت ىشىندە كەلىسىمگە قول قويىپ, شيكىزات ساتىپ الىپ, ءونىمدى دايىنداپ, قازاقستان بويىنشا جەتكىزىپ بەرۋگە مىندەتتىمىن. قازىرگى جاعدايدا بۇل مۇمكىن ەمەس. سوندىقتان بيزنەسكە ۇزاق مەرزىمدى كەلىسىمشارتتار وتە ماڭىزدى. سوندا عانا جۇمىسىمىزدى جوسپارلاي الامىز. مەكتەپ اسحانالارىندا, اۋرۋحانالاردا دا وسىعان ۇقساس جاعداي قالىپتاسقان, ولار دا جىل سايىن ساتىپ الۋدى جاريالاۋعا ءماجبۇر بولادى, – دەيدى كاسىپكەر.
ءوز كەزەگىندە ابىلاي مىرزاحمەتوۆ «سامۇرىق-قازىنا» ۇلتتىق ءال-اۋقات قورىمەن بەس جىل مەرزىمگە ۇزاق مەرزىمدى كەلىسىمشارتتار جاساۋ تۋرالى كەلىسىمگە قول جەتكىزىلگەنىن ايتتى.
جيىن سوڭىندا دەپۋتات نۇرتاي سابيليانوۆ وڭىرلىك بيزنەستىڭ پروبلەمالارى مەن ۇسىنىستارى پارلامەنتتىڭ سەسسيالارىندا قارلاتىنىن ايتتى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
