سونىمەن بىرگە ۇلتتىق بانكتىڭ دەرەكتەرى بويىنشا, تامىز ايىنىڭ ورتاسىندا شىمكەنت قالاسىندا 662,6 ملن تەڭگەگە تۇرعىن ءۇي زاەمدارىن الۋعا 77 ءوتىنىش كەلىپ تۇسكەن.
جوعارىدا ايتىلعان مالىمەتتەردى شىمكەنت قالالىق قۇرىلىس باسقارماسىنىڭ باستىعى ابىلسەيىت راباەۆ «پرەزيدەنتتىڭ بەس الەۋمەتتىك باستاماسىنىڭ» جۇزەگە اسىرىلۋىن باقىلاۋ جونىندەگى قوعامدىق كەڭەس مۇشەلەرىنىڭ قاتىسۋىمەن وتكەن كەزدەسۋدە ءمالىم ەتتى. قوعامدىق كەڭەستىڭ مۇشەلەرى – قحا توراعاسىنىڭ ورىنباسارى ۆيتالي تۆاريوناس, ءماجىلىس دەپۋتاتتارى ازات پەرۋاشەۆ پەن بەرىك دۇيسەمبينوۆ, «قازاقستان-2050» جالپىۇلتتىق قوزعالىس كەڭەسىنىڭ توراعاسى مۇحتار مانكەەۆ, قازاقستاننىڭ جوعارى وقۋ ورىندارى قاۋىمداستىعىنىڭ پرەزيدەنتى راحمان الشانوۆ شىمكەنت قالاسىنا جۇمىس ساپارى بارىسىندا بىرقاتار الەۋمەتتىك جانە ىسكەرلىك نىسانداردى ارالاپ, وڭىردەگى «پرەزيدەنتتىڭ بەس الەۋمەتتىك باستاماسىنىڭ» جۇزەگە اسىرىلۋ بارىسىمەن تانىستى.
«جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحاناداعى جاعدايىن جاقسارتۋ» كوزدەلگەن ءۇشىنشى باستاما بويىنشا وڭتۇستىك قازاقستان مەملەكەتتىك پەداگوگيكالىق ۋنيۆەرسيتەتى 8 گەكتار اۋماقتا ورنالاسقان ستۋدەنتتىك كەشەندە جاتاقحانالار, سونىمەن قاتار سپورتتىق-تۇرمىستىق كەشەندەر سالۋدى جوسپارلاپ وتىر. قوعامدىق كەڭەستىڭ مۇشەلەرى ستۋدەنتتەر ۇيىندە بولىپ, جاستاردىڭ تۇرمىس جاعدايىمەن تانىستى. ۋنيۆەرسيتەتتىڭ ءبىرىنشى پرورەكتورى بارشاگۇل يسابەكتىڭ ايتۋىنشا, وقۋ ورنىندا 3,5 مىڭعا جۋىق ستۋدەنت وقيدى, ال جاتاقحانا قاجەتتىلىگى 200 ادامدى قۇرايدى. بۇل كورسەتكىشكە 500 ورىندىق جاڭا جاتاقحانا پايدالانۋعا بەرىلۋىنە بايلانىستى قول جەتكىزىلگەن.
سونداي-اق رەسپۋبليكالىق كەڭەستىڭ مۇشەلەرى «اقجايىق» شاعىن اۋدانىنداعى تۇرعىن ۇيلەردىڭ قۇرىلىسىمەن تانىستى. «نۇرتاس» شاعىن اۋدانىندا ورنالاسقان «سىدىقوۆ ت.ك.» جىلىجاي كاسىپورنىندا بولدى. كاسىپورىن ءتورتىنشى باستامادا مىندەتتەلگەن «شاعىن نەسيە بەرۋدى كوبەيتۋ» بويىنشا تومەن پروتسەنتتىك نەسيە تۇرىندە 5 ميلليون تەڭگە الىپ, وندىرىستىك قۋاتىن كەڭەيتكەن.
شىمكەنت قالاسىنداعى كاسىپكەرلەر پالاتاسىندا, ودان كەيىن قالالىق اكىمدىك عيماراتىندا وتكەن كەزدەسۋلەر بارىسىندا دا بەس الەۋمەتتىك باستامانىڭ جۇزەگە اسىرىلۋ بارىسى تالقىلاندى. رەسپۋبليكالىق قوعامدىق كەڭەس مۇشەلەرىنىڭ مالىمدەۋىنشە, ايماقتارداعى جۇمىس ساپارلارى بويىنشا جان-جاقتى تالداۋ جاسالادى, ونىڭ قورىتىندىلارى ۇكىمەتكە ۇسىنىلىپ, ەلباسىنا ەسەپ بەرىلەدى.
عالىمجان ەلشىباي,
«ەگەمەن قازاقستان»
شىمكەنت
