قاتىسۋشىلار بۇيراتاۋ, باياناۋىل جانە قارقارالى ۇلتتىق پاركتەرىن ارالادى, قۇماي ارحەولوگيالىق كەشەنىندە, سۇڭقار تاۋلاردا, ءاجىباي, جاسىباي جانە شايتانكول كولدەرىندە بولدى. ولار باياناۋىل تابيعي پاركىندەگى تورايعىر كولىنىڭ تابيعاتى تاماشا جاعالاۋىندا ايالدادى.
«قازاقستاندا 12 ۇلتتىق تابيعي پارك بار, ولاردىڭ ۇشەۋى ءبىزدىڭ باعىتتىڭ كارتاسىندا اتاپ وتىلگەن. ولاردىڭ ارقايسىسى وزىندىك قايتالانباس جانە بىرەگەي سۇلۋلىققا يە, وسى سۇلۋلىقتى باستاپقى كۇيىندە ساقتاۋ ءاربىر قازاقستاندىقتىڭ ىسىنە اينالۋى ءتيىس», — دەپ وي ءبولىستى ەكسپەديتسيا جەتەكشىسى, QazaqGeography-ءدىڭ حالىقارالىق جانە عىلىمي جوبالارىنىڭ مەنەدجەرى نۇرجان العاشوۆ.
بۇدان ءارى باعىت بويىنشا ەكى ۇلتتىق پارك بار: «كوكشەتاۋ» تابيعي پاركى جانە يۋنەسكو دۇنيەجۇزىلىك مۇراسىنىڭ تىزىمىنە كىرەتىن قورعالجىڭ مەملەكەتتىك تابيعي قورىعى.
ەسكە سالا كەتسەك, شىلدە ايىندا قر مادەنيەت جانە سپورت مينيسترلىگىنىڭ تۋريزم يندۋسترياسى كوميتەتىنىڭ تاپسىرىسىمەن «Kazakh Tourism» ۇك ۇيىمداستىرعان قازاقستاننىڭ تۋريستىك الەۋەتىن دامىتۋ بويىنشا « ۇلى دالا Eلىنە ساياحات» اۋقىمدى جوباسى باستاۋ الدى. ەكسپەديتسيا ەلىمىزدىڭ اسا ماڭىزدى التى باعىتىن قامتيدى جانە قازاقستاننىڭ 14 وبلىسىنىڭ 11-ىنەن وتەدى.
«سارىارقا» باعىتىنىڭ ەكسپەديتسياسىن Kazakh Tourism-مەن ءوزارا ىنتىماقتاستىق تۋرالى مەموراندۋم اياسىندا QazaqGeography جۇزەگە اسىرىپ كەلەدى. باعىتتىڭ جالپى ۇزاقتىعى 4000 شاقىرىمدى قۇرايدى. كوماندا قۇرامىندا ساياحاتشىلار, تەلەۆيزيا جۋرناليستەرى, تۋروپەراتورلار مەن گەوگرافيالىق قوعامداردىڭ وكىلدەرى, فوتوگرافتار, شەتەلدىك جانە قازاقستاندىق ترەۆەل-بلوگەرلەر, ونىڭ ىشىندە دەونيسي ميت, ەربولات شادراحوۆ, ەلەنا حاچينا مەن ۇلان الىمبەك بار. ەكسپەديتسيا قورىتىندىلارى بويىنشا تۋريستىك وبەكتىلەردى ارالاۋ بويىنشا ارنايى باعدارلاما شىعارىلادى.
« ۇلى دالا ەلىنە ساياحات» جوباسىنىڭ اياسىندا تاعى ەكى باعىت قالدى: قىزىلوردا, اقتوبە جانە ماڭعىستاۋ وبلىستارىنىڭ اۋماعى بويىنشا «تەڭىزدەن تەڭىزگە دەيىن» باعىتى جانە تۇركىستان, جامبىل, الماتى وبلىستارىنىڭ اۋماعى بويىنشا «جاڭا جىبەك جولى» باعىتى, وعان «National Geographic رەسەي» كومانداسى قاتىسادى.
«Kazakh Tourism» ۇك قر ۇكىمەتىنىڭ قاۋلىسىمەن 2017 جىلعى شىلدەدە قۇرىلدى. كومپانيانىڭ نەگىزگى مىندەتتەرى شەتەلدە ەلىمىزدىڭ تۋريستىك الەۋەتىن ىلگەرىلەتۋ, سونداي-اق قازاقستاننىڭ تۋريستىك سالاسىنا ينۆەستيتسيالار تارتۋ.
«QazaqGeography» قازاقستاندىق ۇلتتىق گەوگرافيالىق قوعامى بەس باعىتتا جۇمىس ىستەيدى: گەوگرافيا, كليمات; قورشاعان ورتا, تابيعات رەسۋرستارى; بيوالۋانتۇرلىلىك; تۋريزم, ساياحات, ولكەتانۋ; تاريحي-مادەني مۇرا, ەتنوگرافيا. قازىرگى ۋاقىتتا قر-دا 11 وكىلدىك اشىلعان.
