قازاقستاننىڭ فۋتزالشىلارى جارتىلاي فينالدا پورتۋگاليامەن كەزدەسەدى «الماتى ارەنادا» وتكەن بۇل باسەكە باسىنان اياعىنا دەيىن جەرلەستەرىمىزدىڭ باسىمدىعىمەن ءوتتى. ويىننىڭ 6 مينۋتىندا ۆلاديسلاۆ چەرنوموردوۆ ەسەپ اشسا, ارادا ءۇش مينۋت وتكەننەن سوڭ ارگەنتينالىق دي ريكا تارازى باسىن تەڭەستىردى. دەسەك تە قوناقتاردىڭ قۋانىشى ۇزاققا سوزىلعان جوق. ۇزىلىسكە دەيىن قازاقستان قۇراماسى تاعى ەكى گول سوعىپ ۇلگەردى. بۇل گولدىڭ اۆتورلارى – ۇلان جاقسىلىقوۆ پەن ءبىرجان ورازوۆ. ال ەكىنشى تايمدا ەرسۇلتان ساعىندىقوۆ, ارنولد كناۋب جانە اسىلجان الين مەرگەندىك تانىتسا, ارگەنتينالىقتار وعان ءبىر عانا دوپپەن جاۋاپ قايىرا الدى. ەسەپ – 6:2.
بۇگىن ساعات 20:00-دە وتەتىن جارتىلاي فينالدىق سايىستا قازاقستاننىڭ فۋتزالشىلارى پورتۋگاليا قۇراماسىمەن كۇش سىناسادى. بۇل وتە مىقتى كوماندا. تاريحقا جۇگىنسەك, پيرەنەي تۇبەگىنىڭ تۇلەكتەرى ستۋدەنتتەر اراسىنداعى الەم بىرىنشىلىگىندە ەكى مارتە جەڭىس تۇعىرىنا كوتەرىلگەن ەكەن. 2008 جىلى سلوۆەنيادا وتكەن جارىستا ولار باس جۇلدەنى ولجالاسا, 2012 جىلى ءوز ەلىندە وتكەن باسەكەنى قولا مەدالمەن قورىتىندىلادى. سونداي-اق, پورتۋگاليالىقتار تاعى ءۇش مارتە ءتورتىنشى ورىنعا تابان تىرەدى. الماتىدا ءوتىپ جاتقان دوپ دوداسىنىڭ شيرەك فينالىندا ايتۋلى كوماندا تايلاند قۇراماسىن 7:2 ەسەبىمەن ۇتتى. ال كەلەسى جارتىلاي فينالدىق سايىستا رەسەي مەن ۋكراينا كەزدەسەدى.
عالىم سۇلەيمەن,
«ەگەمەن قازاقستان»
الماتى
