بۇگىندە تۋريزم سالاسى ەكونوميكانىڭ قوزعاۋشى كۇشى رەتىندە حالىقتى جۇمىسپەن قامتاماسىز ەتۋدىڭ باستى كوزدەرىنىڭ ءبىرى بولىپ تابىلادى.
وسىعان وراي ءتۋريزمدى دامىتۋدىڭ 2023 جىلعا دەيىنگى مەملەكەتتىك باعدارلاماسىنىڭ جوباسى ازىرلەنىپ, تۋريزم سالاسى ماماندارىنىڭ قىزۋ تالقىسىنا تۇسكەن. جوبانى 2019 جىلدىڭ 1 قاڭتارىندا بەكىتۋ جوسپارلانىپ وتىر.
بۇگىندە تۋريزم يندۋسترياسىنىڭ جيىنتىعى الەمدىك ءجىو-ءنىڭ 10 پايىزىن قۇرايتىن بولسا, داعدارىستى كەزىنىڭ وزىندە تۋريزم جىل سايىن 4-5 پايىزعا ءوسىپ وتىرادى. بۇگىندە قازاقستانعا كەلەتىن تۋريستەردىڭ (ىشكى ءتۋريزمدى قوسا العاندا) 40 پايىزىن الماتىعا كەلۋشىلەر قۇرايدى.
وتكەن جىلى الماتى اۋەجايى ارقىلى 508 مىڭ تۋريست وتسە, اعىمداعى جىلدىڭ قاڭتار-شىلدە ايلارىندا بۇل كورسەتكىش 286 مىڭ ءتۋريستى قۇراپ, وتكەن جىلمەن سالىستىرعاندا 20 پايىزعا ءوسىپ وتىر. ەۋروپا پەن ازيادان كەلەتىن تۋريستەردىڭ 60 پايىزىن الماتىنىڭ ەرەكشە تابيعاتى قىزىقتىراتىن كورىنەدى. ال تۋريستەردىڭ قالعان بولىگى اسەم قالاعا كوڭىل كوتەرۋ ءۇشىن كەلەدى ەكەن.
بۇگىندە الماتى ەكونوميكاسىنىڭ 87 پايىزى قىزمەت كورسەتۋدىڭ ۇلەسىنە تيەسىلى دەسەك, قالادا تۋريستىك بيزنەس جۇرگىزۋگە قولايلى جاعدايلار قاراستىرىلعان. الماتىدا 150-دەن استام تۋريزم نىساندارى, 15,5 مىڭ ورىندىق 180-نەن استام قوناق ۇيلەر مەن حوستەلدەر, 1300 تۋريستىك ۇيىم, 2000-نان استام جوعارى دەڭگەيلى سەرۆيس ۇسىناتىن كافە-مەيرامحانالار جۇمىس ىستەيدى. بۇل كورسەتكىش جىل ساناپ ءوسىپ كەلەدى. بيىلعى جىلى الەمدىك دەڭگەيدەگى 2 قوناق ءۇي, 50 شاقتى كافە مەنمەيرامحانا اشۋ جوسپارلانىپ وتىر. اعىمداعى جىلى 2020 جىلعا دەيىن ء«تۋريزمدى دامىتۋدىڭ 100 قادامى» كەشەندى قالالىق جوسپارى باعىتتارى بەكىتىلگەن.
ەلۆيرا سەرىكقىزى,
«ەگەمەن قازاقستان»
الماتى
