كومپوزيتور, قازاقستاننىڭ حالىق ءارتىسى اسەت بەيسەۋوۆتىڭ تۋعانىنا 80 جىل تولۋىنا وراي جارىق كورىپ وتىرعان كىتاپتا زامانداستارىنىڭ, اعا-ىنىلەرىلەرىنىڭ ەستەلىكتەرى, قازاق راديوسىنىڭ «التىن قورىندا» ساقتالعان اندەرىنىڭ ءتىزىمى توپتاستىرىلىپتى.
«جۇرەگى ءان دەپ سوعاتىن» كىتابى ليريكالىق اندەرىمەن ءار ادامنىڭ جۇرەگىنە سازدى اۋەننىڭ تۇنىق بۇلاعى بولىپ قۇيىلعان اسەت بەيسەۋوۆتىڭ سوناۋ بالالىق شاعىنان باستاپ, شىعارماشىلىقتىڭ شىنار شىڭىنداعى جەتىستىكتەرى تۋرالى باياندالادى.
ءىس-شاراعا جازۋشى عابباس قابىش ۇلى, ونەرتانۋشى پەرنەبەك مومىنوۆ, جامبىل اۋدانى اكىمىنىڭ ورىنباسارى ادىلبەك دالاباەۆ, ارداگەر ۇستاز تولەگەتاي اقباۋوۆ, ءانشى نۇرعالي ءنۇسىپجان, قايراتكەر جۋرناليست جۇماش ارعىمباەۆ, كومپوزيتور ۆلاديمير پيتەرتسەۆ جانە ت.ب. بەلگىلى مادەنيەت جانە ونەر قايراتكەرلەرى, اقىننىڭ تۋىستارى, وقىرماندار مەن باق وكىلدەرى قاتىستى.
ءىس-شارانى قازاقستاننىڭ ەڭبەك سىڭىرگەن مادەنيەت قايراتكەرى, كوسەمسوز شەبەرى, جازۋشى, «الماتى اقشامى» گازەتىنىڭ باس رەداكتورى قالي سارسەنباي جۇرگىزىپ, اسەت شىعارماشىلىعىنا قاتىستى قىزىقتى دا, مازمۇندى ەستەلىكتەر ايتىلىپ, اسەت اندەرى ورىندالدى.
«قۇرداستار» پوۆەسى, «سىرلى كۇمبەز», ت.ب. كىتاپتارى ارقىلى وقىرماندار ىقىلاسىنا بولەنىپ جۇرگەن تۇرسىنبەك اعامىزدىڭ جيناقتاپ, قۇراستىرعان تۇششىمدى ەڭبەگىنە قاتىسۋشىلار ريزاشىلىعىن ءبىلدىرىپ, اسەتتەي تۇلعانىڭ ءانى ۇرپاقتان-ۇرپاققا جالعاسىن تابادى دەگەن ۇلكەن سەنىممەن تارقاستى.
ەلۆيرا سەرىكقىزى,
«ەگەمەن قازاقستان»
الماتى
