اتالعان شارادا مەملەكەتتىك ورگاندار وكىلدەرى مەن كاسىپكەرلەر باس قوسىپ, بيزنەستى كوركەيتۋدىڭ جاي-جاپسارىن اڭگىمەلەدى. ماسەلەن, قازاقستاندىق بيزنەستىڭ حالىقارالىق دەڭگەيدەگى باسەكەگە قابىلەتتىلىگى ءسوز بولىپ, قولايلى بيزنەس ورتانى قالىپتاستىرۋ, ينفراقۇرىلىمعا قولجەتىمدىلىك, كادرلار دايارلاۋ ماسەلەسى قارالدى. سونداي-اق تسيفرلى جۇيەگە كوشۋدىڭ ءمان-ماڭىزى, سالاداعى وزگەرىستەر مەن وتاندىق بيزنەستىڭ وركەندەۋى تۋرالى ايتىلدى. مينيسترلىك وكىلدەرى مەن بىلىكتى ساراپشىلار وتاندىق بيزنەستىڭ وركەندەۋىنە جول اشاتىن ماسەلەلەردى سارالادى. جيىنعا ۇلتتىق ەكونوميكا مينيسترلىگى, استانا قالاسى اكىمدىگى, ستراتەگيالىق باستامالار ورتالىعى, ەكونوميكالىق زەرتتەۋلەر ينستيتۋتى جانە «اتامەكەن» كاسىپكەرلەر پالاتاسى وكىلدەرى, تاعى باسقالار قاتىستى.
مۇنداي جيىن ەلىمىزدىڭ باسقا دا وڭىرلەرىندە وتكىزىلگەن. ۇيىمداستىرۋشىلار بۇل جولى ات باسىن استاناعا بۇردى.
«استانا قالاسى شاعىن جانە ورتا بيزنەستى دامىتۋ بويىنشا كوش باستاپ تۇر. ايتسە دە, بيزنەستىڭ ۇلەسى ءالى دە از. نەگە ۇنەمى ءرۋبلدىڭ قۇلدىراۋىنا, دوللاردىڭ قىمباتتاۋىنا تاۋەلدىمىز؟ نەگە سىرتقى ساياساتقا باعىنىشتى بولىپ وتىرمىز؟ مۇنىڭ بارلىعى ەكونوميكامىزدىڭ تۇراقسىزدىعىن كورسەتەدى. ال تۇراقتى ەكونوميكا بولۋى ءۇشىن تۇراقتى بيزنەس كەرەك. ەكونوميكاداعى شاعىن جانە ورتا بيزنەستىڭ ۇلەسى 50%-كە جەتكەن كەزدە عانا ەكونوميكامىز تۇراقتانادى. ال قازىر رەسپۋبليكا بويىنشا بۇل كورسەتكىش بار بولعانى 27%-ءتى قۇراپ وتىر. استانا قالاسى بويىنشا ەكونوميكاداعى شوب ۇلەسى 45%, بۇل كورسەتكىشتى ارتتىرا ءتۇسۋ قاجەت», دەيدى ستراتەگيالىق باستامالار ورتالىعىنىڭ جوبالار جونىندەگى ديرەكتورى باقىتجان ساركەەۆ.
دينارا بىتىك,
«ەگەمەن قازاقستان»
