كەڭەسكە قاتىسقان الماتى قالاسىنىڭ اكىمى باۋىرجان بايبەك 1 قىركۇيەكتە زاماناۋي 1200 ورىندىق مەكتەپ-گيمنازيا اشىلاتىنىن ايتىپ, ۇستازدار قاۋىمىن قۋانتتى. تامىز كەڭەسىنە قاتىسقان ءماجىلىس دەپۋتاتتارىن باستاپ كەلگەن گۇلميرا يسيمباەۆا دا ۇستازدارعا جىلى لەبىزىن ارنادى.
پارلامەنت ءماجىلىسى توراعاسىنىڭ ورىنباسارى, «نۇر وتان» پارتياسى فراكتسياسىنىڭ جەتەكشىسى گۇلميرا يسيمباەۆا باستاعان توپ تامىز كونفەرەنتسياسىنىڭ جۇمىسىنا قاتىسىپ, قالا مۇعالىمدەرىمەن كەزدەستى.
كەزدەسۋ كەزىندە گۇلميرا يستايبەكقىزى ءماجىلىس جۇمىسىنىڭ كەيبىر قورىتىندىلارىنا توقتالدى. سونىمەن قاتار جۇمىس بارىسىندا دەپۋتاتتار الەۋمەتتىك سالاعا ەرەكشە ءمان بەرگەنىن اتاپ ءوتتى. ماسەلەن, وتكەن سەسسيا بارىسىندا 84 زاڭ جوباسى ماقۇلدانسا, 6-ۋى ءبىلىم سالاسىن جانە بالالاردىڭ قۇقىعىن قورعاۋعا ارنالدى. ونىڭ 3-ەۋى دەپۋتاتتاردىڭ باستاماسىمەن ازىرلەندى. ولاردىڭ قاتارىندا بالالاردىڭ دەنساۋلىعىنا جانە دامۋىنا زيان كەلتىرەتىن اقپاراتتان قورعاۋعا باعىتتالعان جانە جوعارى وقۋ ورىندارىنىڭ اكەدەميالىق دەربەستىگى تۋرالى زاڭدار بار. سونداي-اق ءبىلىم تۋرالى زاڭعا ەنگىزىلگەن وزگەرىستەرگە سايكەس, كوللەدج تۇلەكتەرىنىڭ ءبىر ماماندىق شەڭبەرىندە بىردەن ءۇش بىلىكتىلىك الۋعا بولاتىنىن, مۇنىڭ ءوزى ولاردىڭ جۇمىسقا تۇرۋ مۇمكىندىگىن مولايتاتىنى تۋرالى دا ايتتى.
ء«ۇشىنشى پارلامەنتتىك سەسسيانى تاريحي تۇرعىدان ماڭىزدى دەپ ايتۋعا تولىق قۇقىعىمىز بار. ويتكەنى ءدال وسى پارلامەنت قابىرعاسىندا ەلباسىمىز العاش رەت بەس الەۋمەتتىك باستاماسىن جاريالادى, ونىڭ زاڭنامالىق قامتاماسىز ەتىلۋىنە دەپۋتاتتار بارىنشا بەلسەندى قاتىستى», دەدى دەپۋتات.
ءماجىلىس توراعاسىنىڭ ورىنباسارى گ.يسيمباەۆا ەلباسىنىڭ ء«بىلىمدى دامىتا المايتىن ەلدىڭ بولاشاعى جوق» – دەگەن ءسوزىن كەلتىرىپ, ۇستازدىق قىزمەتتىڭ باستى نىساناسى سانالاتىن ءبىلىم سالاسى مەملەكەتتىڭ تىرەگى, وركەنيەتتىڭ ايناسى ەكەنىن, كەلەسى سەسسيادا زاڭ شىعارۋشىلىق جۇمىسىنىڭ ۆەكتورى ەلباسىنىڭ تاپسىرمالارىن ورىنداۋعا جانە ەلىمىزدىڭ پەداگوگتەرىنە بارىنشا قولداۋ كورسەتۋگە باعىتتالاتىنىن ايتتى.
ساپارباي پارمانقۇل,
«ەگەمەن قازاقستان»
الماتى
