كەزدەسۋ نەگىزىنەن قۇقىق قورعاۋ سالاسىنا قاتىستى بولعاندىقتان, ەڭ باستى تالاپ قوعامدىق ءتارتىپ ەكەنى باسا ايتىلدى. جيىن بارىسىندا حالىق قالاۋلىلارى دەپارتامەنت قىزمەتكەرلەرى تاراپىنان قولدانىستاعى زاڭعا قاتىستى ايتىلعان ۇسىنىستاردى تىڭدادى.
جامبىل وڭىرىنە ساپارى بارىسىندا سەناتورلار تاراز قالاسىنداعى قۇقىق قورعاۋ قىزمەتى ورتالىعىنىڭ جۇمىسىن كوردى.
– قازىر سەنات دەپۋتاتتارى بارلىق وڭىردە ءجۇر. ولار وبلىستاردا ەستىگەن, كورگەن ماسەلەلەرىن ءارى قاراي دەپۋتاتتىق ساۋالدار ارقىلى نەمەسە دوڭگەلەك ۇستەلدەردە, ۇلكەن جينالىستاردا كوتەرىپ, زاڭنامانى ۋاقىت تالابىنا سايكەستەندىرۋگە اتسالىسادى. قىركۇيەك ايىنىڭ باسىندا پارلامەنت كەزەكتى سەسسياسىن جالعاستىرادى. سوندا وسى ايتىلعان ماسەلەلەردىڭ بارلىعى ورتاعا سالىناتىن بولادى, – دەگەن بەكتاس بەكنازاروۆ بىرقاتار ماسەلەگە توقتالدى. سونىمەن قاتار سەنات توراعاسىنىڭ ورىنباسارى جامبىل وبلىسى حالقىنىڭ جارتىسىنان كوبىنە ءالى كوگىلدىر وتىن جەتپەگەنىن, وسى گاز ماسەلەسى 2022 جىلعا دەيىن شەشىلۋى كەرەكتىگىن ايتتى.
سەناتورلاردىڭ جامبىل وڭىرىندەگى جۇمىس ساپارى تاراز قالاسىنىڭ كاسىپكەرلەرگە قىزمەت كورسەتۋ ورتالىعىنىڭ جۇمىسىمەن تانىسۋمەن جالعاستى. بۇدان كەيىن حالىق قالاۋلىلارى بايزاق اۋدانى, بۋرىل اۋىلدىق وكرۋگىندەگى «ياشار» شارۋا قوجالىعىنىڭ ەگىن القاپتارىنىڭ جۇمىسىمەن, كوكتال اۋىلىنداعى «دۋلات» شارۋا قوجالىعىنىڭ جۇمىسىمەن جانە وسى اۋدانداعى بىرقاتار نىساننىڭ قىزمەتىمەن تانىستى.
سەنات توراعاسىنىڭ ورىنباسارى بەكتاس بەكنازاروۆ پەن سەنات دەپۋتاتى ابدالى نۇراليەۆ جامبىل وبلىسىنا جۇمىس ساپارى بارىسىندا وبلىس اكىمى اسقار مىرزاحمەتوۆپەن كەزدەستى. شاعىن قۇرامداعى باسقوسۋدا بىرقاتار وزەكتى ماسەلە ايتىلىپ, شەشۋ جولدارى قاراستىرىلدى. بەكتاس بەكنازاروۆ بۇگىندە جامبىل وڭىرىندە ايتارلىقتاي جۇمىس اتقارىلىپ جاتقانىنا توقتالدى. بۇل تۇرعىدا اسقار مىرزاحمەتوۆ سەناتورلارعا وبلىس ءۇشىن ماڭىزدى ماسەلەلەردى ايتتى. جيىن سوڭىندا وتكەن التى ايدا جامبىل وبلىسىندا اۋىل شارۋاشىلىعى, ونەركاسىپ پەن كاسىپكەرلىك سالاسىن دامىتۋدىڭ جول كارتاسى ازىرلەنگەندىگى, ماسەلەنى شەشۋ ءۇشىن ونىڭ ارنايى تەتىگى قاراستىرىلعاندىعى جونىندە ايتىلدى. بۇدان كەيىن سەناتورلاردىڭ جامبىل وبلىسىنا جۇمىس ساپارى جامبىل جانە جۋالى اۋداندارىندا جالعاسىن تاپتى. سەناتورلار اۋداندارداعى بىرقاتار الەۋمەتتىك-كاسىپكەرلىك نىساننىڭ جۇمىستارىمەن تانىستى.
حاميت ەسامان,
«ەگەمەن قازاقستان»
جامبىل وبلىسى
