مەرەكەلىك شارانىڭ اشىلۋ سالتاناتىنا «دينامو» دەنە شىنىقتىرۋ-سپورت قوعامى ورتالىق كەڭەسى توراعاسىنىڭ ءبىرىنشى ورىنباسارى اسقار ومارقۇلوۆ, ۆەدومستۆولار مەن قۇقىق قورعاۋ ورگاندارىنىڭ وكىلدەرى, تانىمال سپورتشىلار قاتىستى. 93 جاستاعى سوعىس, ەڭبەك ارداگەرى ستەپان باشكيروۆ ءوز سوزىندە جينالعانداردى سپورتپەن جۇيەلى تۇردە اينالىسۋعا, سالاماتتى ءومىر سۇرۋگە ۇندەدى.
«وبلىس سپورت سالاسىن دامىتۋعا جان-جاقتى كوڭىل ءبولىپ كەلەدى. پەتروپاۆلدا الەكساندر ۆينوكۋروۆ اتىنداعى امبەباپ سپورت سارايى بوي كوتەردى. جاقىندا زاماناۋي تەننيس ورتالىعى اشىلادى», دەدى وبلىسى اكىمىنىڭ ءبىرىنشى ورىنباسارى ايداربەك ساپاروۆ.
جەرگىلىكتى پوليتسيا قىزمەتى جول-پاترۋلدىك پوليتسيا باتالونىنىڭ قىزمەتكەرلەرىنە جاڭا قىزمەتتىك كولىكتەردىڭ كىلتتەرى تابىس ەتىلدى. 11 كولىكتى الۋعا جەرگىلىكتى قازىنادان 52 ميلليون تەڭگە ءبولىندى.
اشىق چەمپيونات شىمىلدىعىن سولتۇستىك قازاقستان مەن استانا قالاسى كوماندالارى اشتى. ەلوردالىقتار 4:1 ەسەبىمەن جەڭىسكە جەتتى.باسقا كەزدەسۋلەر دە اسا تارتىستى ءوتتى. جارىس ەرتەڭ اياقتالادى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
