ۇكىمەت • 23 تامىز، 2018

جوسپارلى مەجەلەر ورىندالۋىمەن قۇندى

211 رەتكورسەتىلدى

كەشە پرەمەر-مينيستر باقىتجان ساعىنتاەۆتىڭ توراعالىعىمەن كەزەكتى ۇكىمەت وتىرىسى ءوتىپ، وندا وراق ناۋقانىنىڭ بارىسى تالقىلاندى، سونىمەن قاتار 2016-2019 جىلدارعا ارنالعان يندۋستريالىق-يننوۆاتسيالىق دامۋ مەملەكەتتىك باعدارلاماسىنىڭ بيىلعى 6 ايداعى قورىتىندىسى باياندالدى. وتىرىستا جىلىتۋ ماۋسىمى مەن جاڭا 2018-2019 وقۋ جىلىنا دايىندىق شارالارى كەڭىنەن ءسوز بولدى. 

جاڭبىر سۋىنان زارداپ شەكپەۋى كەرەك

كەزەكتى ۇكىمەت وتىرىسىندا كۇن تار­تى­بىندەگى ماسەلەلەر تالقىلانباس بۇ­رىن پرەمەر-مينيستر باقىتجان سا­عىنتاەۆ تولاسسىز جاۋعان جاۋىن سالدارىنان استانانىڭ بىرقاتار كوشەلەرىنىڭ سۋ استىندا قالعانىن تىلگە تيەك ەتىپ، سونىڭ سالدارىنان جاياۋ جۇرگىنشىلەر مەن اۆتوكولىك يەلەرى زارداپ شەككەنىن، قوعامدىق كولىك قوزعالىسى قيىنداعانىن ايتتى. ب.ساعىنتاەۆ وسى ماسەلە جونىندە ەلباسى تاراپىنان دا بىرنەشە رەت ورىندى سىن-ەسكەرتۋلەر ايتىلعانىن اتاپ ءوتتى. بۇل ماسەلەنى شەشۋ ءۇشىن ءتيىستى تاپسىرمالار جۇكتەلگەن.

− قالا تۇرعىندارى قالالىق كوم­مۋ­نالدىق قىزمەتتەردىڭ ناشار جۇمى­سىنان زارداپ شەكپەۋگە ءتيىس. باۋىرجان مو­مىش ۇلى داڭعىلى مەن «تۇران» داڭعىلىندا، « ۇلى دالا» كوشەسىنىڭ قيىلىستارىندا، باراەۆ كوشەسىندە، «جاستار» شاعىن اۋدانىندا جانە تاعى باسقا جەرلەردە سۋ باسۋ جاعدايلارى ءجيى ورىن الادى، – دەدى ب.ساعىنتاەۆ.

جيىندا اتالعان ماسەلەنى شەشۋ جولدارىن تانىستىرۋ ءۇشىن استانا قالاسىنىڭ اكىمى اسەت يسەكەشەۆ ونلاين بايلانىسقا شىقتى. ونىڭ ايتۋىنشا، قالاداعى بارلىق جۇيەنى تەڭگەرىمدە ۇستاپ، نوسەرلىك اعىن قىزمەتتەرىمەن اينالىساتىن، جاۋىن-شاشىن كارىز جۇيەسىن بۇرۋ جونىندەگى ارنايى كاسىپورىن قۇرۋ جوسپارلانىپ وتىر. «استانا–تازالىق» دەپ اتالاتىن كاسىپورىن قالانى سۋدان تازارتىپ قانا قويماي، ونى جۇيەلى تۇردە رەتتەپ وتىرۋ ءۇشىن جۇمىس ىستەمەك. بۇل ماسەلەگە قاتىستى پرەمەر-مينيستر باقىتجان ساعىنتاەۆ ۇلتتىق ەكونوميكا مينيسترلىگىنە استانا قالاسىنىڭ اكىمدىگىمەن بىرلەسىپ اتالعان ماسەلەنى پىسىقتاۋدى تاپسىردى. اكىمدىككە جاقىن ارادا وسىنداي جاعدايلاردىڭ الدىن الۋ، كوممۋنالدىق قىزمەتتەردىڭ جۇمىسىن كۇشەيتۋگە قاتىستى قاجەتتى شارالار قابىلداۋ تاپسىرىلدى.

كۇزگى ەگىن ناۋقانىنىڭ ءساتتى اياقتالۋى باقىلاۋدا

ەلىمىزدەگى ەگىن جيناۋ جۇمىستارى جو­نىندە پرەمەر-ءمينيستردىڭ ورىنباسارى – اۋىل شارۋاشىلىعى ءمينيسترى ومىرزاق شوكەەۆ باياندادى. ونىڭ ايتۋىن­شا، جالپى جۇمىس شتاتتىق رەجىمدە جۇرگىزىلۋدە. وراق ناۋقانى جامبىل وبلىسىندا 95،2 پروتسەنتكە اياقتالسا، تۇركىستان وبلىسىندا 95،6 پروتسەنتكە اياقتالدى. اتالعان وڭىرلەر بويىنشا ورتاشا تۇسىمدىلىك گەكتارىنا 21 تسەنتنەردى قۇراعان.

− جيىن-تەرىن جۇمىستارى اقتوبە، الماتى، باتىس قازاقستان، پاۆلودار، قىزىلوردا جانە شىعىس قازاقستان وبلىستارىندا جۇرگىزىلىپ جاتىر. اتالعان وبلىستارداعى ءداندى داقىلدار جينالاتىن القاپ 3 ملن گەكتاردى قۇرايدى، ونىڭ 1،1 ملن گەكتارى نەمەسە 36،3 پروتسەنتى جينالدى. گەكتارىنا 18،1 تسەنتنەر ورتاشا تۇسىمدىلىكپەن 2 ملن توننا استىق باستىرىلدى. استىقتىڭ جالپى ءتۇسىمى 20 ملن توننا بولادى دەپ بولجانۋدا، بۇل بيىلعى قۋاڭشىلىق جاعدايىندا جامان كورسەتكىش ەمەس. نەگىزگى استىق وسىرەتىن وڭىرلەر ەگىن جيناۋعا تامىز ايىنىڭ سوڭىندا، قىركۇيەك ايىنىڭ باسىندا كىرىسەدى. اكىمدىكتەردىڭ دەرەكتەرى بويىنشا تەحنيكالار ەگىن جيناۋعا 100 پروتسەنت دايىن، – دەپ مالىمدەدى ءو.شوكەەۆ. پرەمەر-ءمينيستردىڭ ورىن­باسارى – اۋىل شارۋاشىلىعى ءمي­نيسترى كەلتىرگەن اقپارات بويىنشا، ەگىن جيناۋ جۇمىستارىن دەر كەزىندە جۇر­گىزۋ ءۇشىن اۋىلشارۋاشىلىق تاۋار­لارىن وندىرۋشىلەرگە 394 مىڭ توننا ار­زانداتىلعان جانار-جاعارماي بولىنگەن. ەنەرگەتيكا ءمينيسترى قانات بوزىمباەۆ كەلتىرگەن اقپاراتقا سۇيەنسەك، قازاقستان بويىنشا 20 تامىزداعى جاعدايعا سايكەس ديزەل وتىنىنىڭ كولەمى 260 مىڭ توننادان اسادى، كۇزگى ناۋقان كەزىندەگى جۇمىستارعا 110،5 مىڭ توننا ديزەل جۇمسالعان.

ال رەسپۋبليكادا جالپى استىق ساقتاۋ ورىندارىنىڭ سىيىمدىلىعى 26،7 ملن توننانى قۇرايدى، ونىڭ ىشىندە استىق ساقتاۋ كاسىپورىندارىندا – 13،7 ملن توننا، اۋىل شارۋاشىلىعى تاۋارلارىن وندىرۋشىلەردە – 13 ملن توننالىق ورىن بار. اۋىل شارۋاشىلىعى مينيسترلىگىنىڭ دەرەكتەرىنە سايكەس، قازىرگى تاڭدا ءىىى ساناتتى بيدايدىڭ ءبىر تونناسى 48-49 مىڭ تەڭگە تۇرادى. جاڭا جينالعان ءونىمدى ەكسپورتقا جىبەرۋ ءۇشىن دايىندىق جۇمىستارى جۇرگىزىلۋدە. ءو.شوكەەۆ مەملەكەتتىك ورگاندارمەن بىرلەسىپ لوگيستيكا ماسەلەلەرىن شەشۋ ءۇشىن جۇيەلى جۇمىس جۇرگىزىلىپ جاتقانىن اتاپ ءوتتى.

تاقىرىپتى قورىتىندىلاعان پرە­مەر-مينيستر باقىتجان ساعىنتاەۆ ەنەرگەتيكا مينيسترلىگى ەگىن جيىن-تە­رىمى اياقتالعانعا دەيىن بەكىتىلگەن كەس­تەگە سايكەس ديزەلدىك وتىن جەتكىزۋدىڭ تۇ­راق­تىلىعىن قامتاماسىز ەتۋدى ەسكەرتىپ، بىر­قاتار تاپسىرما جۇكتەدى.

جارتى جىلدا – 1800 جۇمىس ورنى

بيىلعى التى ايدا 2015–2019 جىل­دارعا ارنالعان يندۋستريالىق-يننو­ۆا­تسيالىق دامۋ مەملەكەتتىك باعدارلاماسىن ىسكە اسىرۋ قورىتىندىسىن بايانداعان ين­ۆەستيتسيالار جانە دامۋ ءمينيسترى جەڭىس قا­سى­م­بەك يندۋستريالاندىرۋ كارتاسى ايا­سىن­دا جارتى جىلدا 1800-دەن استام تۇ­راق­تى جۇمىس ورىنى اشىلعانىن مالىم­دەدى.

− 2018 جىلدىڭ ءى جارتى جىلدىعىن 2010 جىلمەن سالىستىرعاندا وڭدەۋ سالالارىندا جۇمىس ىستەيتىن قوسىمشا 3،5 مىڭ كاسىپورىن پايدا بولدى. نەگىزىنەن ءوسىم ماشينا جاساۋ، ازىق-ت ۇلىك ونەركاسىبى، قۇرىلىس ماتەريالدارى كاسىپورىندارى سانىنىڭ ءوسۋى ەسەبىنەن قامتاماسىز ەتىلدى. ولاردىڭ جالپى سومالىق ۇلەسى وڭدەۋ ونەركاسىبى كاسىپورىندارىنىڭ جيىنتىق وسىمىندە 50 پروتسەنتتەن استى، – دەدى مينيستر.

بيىلعى التى ايدىڭ قورىتىندىلارىن وتكەن جىلعى سايكەس كەزەڭمەن سالىس­تىر­عاندا وڭدەۋ سەكتورىنداعى ءوندىرىس 5،2 پروتسەنتكە ارتىپ وتىر. وڭ ديناميكاعا ىقپال ەتەتىن نەگىزگى درايۆەرلەر: ماشينا جاساۋ، حيميا ونەركاسىبى، ازىق-ت ۇلىك ونىمدەرى ءوندىرىسى، مۇناي وڭدەۋ، مەتاللۋرگيا، قۇرىلىس ماتەريالدارىنىڭ ءوندىرىسى. ينۆەستيتسيالار جانە دامۋ ءمينيسترىنىڭ ايتۋىنشا، بيىلعى ەسەپتى كەزەڭدە بارلىق ماقساتتى ينديكاتورلار بويىنشا وڭ قارقىن بايقالادى. مەملەكەتتىك باعدارلاما اياسىندا كاسىپورىندارعا جۇيەلى قولداۋ شارالارىن كورسەتۋدىڭ ناتيجەسىندە جاڭا وندىرىستەردى ىسكە قوسۋ، جۇمىس ىستەپ تۇرعان كاسىپورىنداردى جاڭ­عىرتۋ جانە كەڭەيتۋ شارالارى جالعاسۋدا.

بيىلعى التى ايدا يندۋستريالاندىرۋ كارتاسى اياسىندا 187 ملرد تەڭگەگە جۋىق سوماعا 18 جوبا ىسكە قوسىلعان. ەكىنشى جارتى جىلدىقتا جالپى سوماسى 1،1 ترلن تەڭگە بولاتىن 100-گە جۋىق جوبانى ىسكە اسىرۋ جوسپارلانىپ وتىر. وندا 12،2 مىڭنان استام جۇمىس ورنى اشىلادى دەگەن جوسپار بار. تاقىرىپتى قورىتىندىلاعان پرەمەر-مينيستر باقىتجان ساعىنتاەۆ كاسىپورىنداردى جاڭعىرتۋ ەسەبىنەن جاڭا جوعارى تەحنولوگيالى ءونىم شىعارۋعا، تۇبەگەيلى جاڭا سالالار قۇرۋعا جانە سول ارقىلى ەكسپورتتى ارتتىرۋعا مۇمكىندىك تۋاتىنىن ايتتى.

جىلىتۋ ماۋسىمىنا دايىندىق جۇرگىزىلۋدە

ەنەرگەتيكا ءمينيسترى قانات بوزىم­باەۆ بيىلعى جىلىتۋ ماۋسىمىنا دا­يىندىق جۇمىستارى كەستەگە ساي جۇر­گىزىلىپ جاتقانىن حابارلادى. ونىڭ ايتۋىنشا، قازىر 4 ەنەرگوبلوكتىڭ جوندەۋ جۇمىستارى اياقتالىپ، 20 قازاندىق پەن 20 تۋربينا جوندەۋدەن وتكەن. الداعى ۋاقىتتا 4 ەنەرگوبلوك پەن 25 تۋربينا جوندەۋدەن وتەدى دەپ كۇتىلۋدە. بۇعان قوسا، 21 مىڭ شاقىرىم ەلەكتر جەلىسى جوندەلىپ، 497 قوسالقى ستانساسى دا قالىپقا كەلتى­رىل­مەك. ورتالىقتاندىرىلعان جىلۋمەن جابدىقتاۋ ايماعىنداعى 568 قازاندىق­تىڭ 413-ءى جوندەلگەن. بۇعان قوسا، ەلەكتر ستانسالارىندا 2،8 ملن توننا كومىر جانە 81 مىڭ توننا مازۋت قورى ازىرلەنگەن.

− ورتالىقتاندىرىلعان جىلۋمەن قامتاماسىز ەتۋ ايماعىنداعى قازان­دىق­تاردا 979 مىڭ توننا كومىر، 32 مىڭ توننا مازۋت جينالعان، – دەدى ق.بوزىمباەۆ.

وڭىرلەردى كومىرمەن قامتاماسىز ەتۋ بارىسى جايىندا بايانداعان ينۆەس­تيتسيالار جانە دامۋ ءمينيسترى جەڭىس قاسىمبەك بيىلعى 7 ايدا 60 ملن توننا كومىر وندىرىلگەنىن، بۇل وتكەن جىلدىڭ سايكەس كەزەڭىمەن سالىستىرعاندا 4 پروتسەنتكە ارتىق ەكەنىن جەتكىزدى.

بيىل 3 ملن بالا مەكتەپكە بارادى

جيىندا 2018-2019 وقۋ جىلىنىڭ باس­تالۋىنا دايىندىق بارىسى تۋرالى ءبىلىم جانە عىلىم ءمينيسترى ەرلان ساعاديەۆ باياندادى. ونىڭ ايتۋىنشا، رەسپۋبليكادا 898،4 مىڭ بالانى قامتيتىن 10 311 مەكتەپكە دەيىنگى ءبىلىم بەرۋ ۇيىمى بار. ونىڭ 6727-ءسى – مەملەكەتتىك، 3584-ءى – جەكەمەنشىك. ەلىمىزدەگى 99 بالاباقشاعا كۇردەلى جوندەۋ جۇمىستارى جۇرگىزىلۋدە.

مينيستر كەلتىرگەن اقپارات بويىنشا، ەلىمىزدە جاڭا وقۋ جىلىندا 3 ملن-نان استام بالا 7024 مەملەكەتتىك مەكتەپكە باراتىنى انىقتالعان. ونىڭ ىشىندە 350 مىڭعا جۋىق بالا ءبىرىنشى سىنىپقا قابىلدانباق. رەسپۋبليكالىق بيۋدجەت قاراجاتى ەسەبىنەن 110 مەكتەپ سالىنىپ جاتىر، ونىڭ 72-ءسى بيىل پايدالانۋعا بەرىلەدى دەپ جوسپارلانعان. جەرگىلىكتى بيۋدجەت ەسەبىنەن 94 مەكتەپ سالىنۋدا.

ءسوز سوڭىندا ۇكىمەت باسشىسى ءبىلىم جانە عىلىم مينيسترلىگىنە جاڭا وقۋ جىلىنا مەكتەپتەردىڭ ساپالى دايارلىعىن جانە دە مەكتەپتەردى وقۋلىقتارمەن قامتۋ ماسەلەسىن باقىلاۋدا ۇستاۋدى تاپسىردى.

ەركەجان ايتقازى،

«ەگەمەن قازاقستان»

سوڭعى جاڭالىقتار

شىمكەنتتە العىس ايتۋ كۇنى اتالىپ ءوتتى

وڭتۇستىك قازاقستان • بۇگىن، 15:44

ورالدا كوروناۆيرۋس بار ما؟

قوعام • بۇگىن، 15:36

كوشپەلى كورمەمەن تانىستى

اباي • بۇگىن، 12:57

اباي – ۇلتتىڭ ۇستازى

اباي • بۇگىن، 12:44

اۋىر سىناق، قيىن سۇراق

ايماقتار • بۇگىن، 12:15

بەيبىت جيىن قانداي بولۋى كەرەك؟

ايماقتار • بۇگىن، 11:28

تۇركىستان وبلىسىندا سۋ تاسقىنى قاۋپى جوق

وڭتۇستىك قازاقستان • بۇگىن، 11:20

تۋعان ءتىل – تاتۋلىق تىرەگى

قازاقستان • بۇگىن، 10:32

ۇقساس جاڭالىقتار