حالىق قالاۋلىلارى اۋەلى بايزاق اۋدانىنداعى «لەسنياك» جەكە كاسىپكەرلىگىندە بولىپ, مۇنداعى ءسۇت وڭدەۋ جانە ءسۇت ونىمدەرىن شىعارۋ جۇمىستارىمەن تانىستى. اتالعان كاسىپورىن «پرەزيدەنتتىڭ بەس الەۋمەتتىك باستاماسىنىڭ» ءتورتىنشى باعىتى – «شاعىن نەسيە بەرۋدى كوبەيتۋ» بويىنشا تومەن پايىزبەن 18 ميلليون تەڭگە نەسيە الىپ, ول قارجىعا قوسىمشا قۇرىلعىلار ساتىپ الىپتى. بۇگىنگى تاڭدا ءسۇت وڭدەيتىن كاسىپورىننىڭ قۋاتتىلىعى ارتىپ, كۇنىنە 14 توننا ءسۇت وڭدەپ, سونىمەن قاتار ءتۇرلى ونىمدەر شىعارىپ وتىر. جيىرماعا جۋىق اۋدان تۇرعىندارىن جۇمىسپەن قامتىعان «لەسنياك» كاسىپورنى جۇزدەن استام اۋىل شارۋالارىنىڭ باسىن قوسىپ, كووپەراتيۆ قۇرعان.
جامبىل وبلىسىنا ساپارى كەزىندە ماجىلىسمەندەر «پرەزيدەنتتىڭ بەس الەۋمەتتىك باستاماسىنىڭ» ءۇشىنشى باعىتى – «جوعارى ءبىلىم الۋدىڭ قولجەتىمدىلىگى مەن ساپاسىن ارتتىرىپ, ستۋدەنت جاستاردىڭ جاتاقحاناداعى جاعدايىن جاقسارتۋ» بويىنشا جۇمىستارمەن تانىستى. بۇگىنگى تاڭدا تاراز يننوۆاتسيالىق-گۋمانيتارلىق ۋنيۆەرسيتەتى بۇرىنعى «تاراز» قوناقۇيىن ساتىپ الىپ, ونى ستۋدەنتتەر جاتاقحاناسىنا اينالدىرۋ ءىسىن قولعا الىپ وتىر. اتالعان عيمارات كەزەڭ-كەزەڭىمەن اعىمدىق جانە كۇردەلى جوندەۋدەن وتكىزىلەتىن بولادى. قازىرگى كەزدە نىساننىڭ ەكىنشى جانە ءۇشىنشى قاباتتارىنا اعىمدىق جوندەۋ جۇمىستارى جۇرگىزىلۋدە. سونىمەن قاتار, ۋنيۆەرسيتەت پرورەكتورى سانات اشىربەكوۆ دەپۋتاتتارعا عيماراتتى جوندەۋ شارالارى الداعى قىركۇيەك ايىندا اياقتالاتىنىن, قىركۇيەك ايىنان باستاپ بۇل جەرگە 160 ستۋدەنتتى ورنالاستىرۋ جوسپارلانۋدا ەكەنىن ايتتى. ال نىسان تولىق جوندەۋدەن وتكەن سوڭ مۇندا 200-دەن اسا ستۋدەنت جاتاقحانامەن قامتىلاتىن بولادى.
بۇگىنگى تاڭدا ءاربىر تۇرعىننىڭ باسپانالى بولۋىنا جول اشاتىن «7-20-25» مەملەكەتتىك باعدارلاماسىنىڭ ماڭىزى ەرەكشە. اتالعان باعدارلامانى جۇزەگە اسىرۋ ماقساتىندا جامبىل وڭىرىندە ءتيىستى جۇمىستار اتقارىلۋدا. وسى ورايدا دەپۋتاتتار تاراز قالاسىنداعى №15 مولتەك اۋدانىنىڭ جاڭادان سالىنىپ جاتقان بەس قاباتتى تۇرعىن ۇيلەرىنىڭ قۇرىلىسىمەن تانىستى. مۇنداعى 10 ۇيدەگى 800 پاتەر جىل سوڭىنا دەيىن تاپسىرىلۋى ءتيىس. بۇگىندە تاراز قالاسى بويىنشا 15,3 مىڭ ادام باسپانا كەزەگىندە تۇرعان بولسا, ەلباسى باستاماسى اياسىندا اتالعان باعدارلامامەن 9 مىڭعا جۋىق وتباسى باسپانامەن قامتىلاتىن بولادى.
– ەلباسىنىڭ «پرەزيدەنتتىڭ بەس الەۋمەتتىك باستاماسىنىڭ» ءبىرىنشى باعىتى بويىنشا جاساقتالعان «7-20-25» باعدارلاماسى ءار وتباسىنا ۇلكەن مۇمكىندىك بەرەدى. باسپانالى بولۋ ءۇشىن العاشقى جارنانىڭ كولەمى دە 20 پايىزعا دەيىن تومەندەتىلگەن. بۇل تۇرعىندار ءۇشىن تەڭدەسسىز مۇمكىندىك. جەرگىلىكتى اكىمدىككە, جاۋاپتى مەملەكەتتىك ورگاندارعا اتالعان باعدارلامانىڭ ارتىقشىلىقتارى جايلى حالىقتى كەڭىنەن اقپاراتتاندىرۋ جۇمىستارىن جانداندىرۋ قاجەت, – دەدى دەپۋتات ءابدىماناپ بەكتۇرعانوۆ. ال جامبىل وبلىسى اكىمىنىڭ ورىنباسارى ەركەبۇلان داۋىلباەۆ دەپۋتاتتارعا «7-20-25» باعدارلاماسى بويىنشا ءبىر ورتالىق اشۋ كەرەكتىگىن ۇسىندى. بۇل ورايدا حالىق قالاۋلىلارى بۇل ۇسىنىستى پارلامەنت تورىنەن كورسەتەتىندەرىن ايتتى.
قازىرگى كەزدە ەلباسى تاپسىرماسىنا سايكەس, شاعىن نەسيە بەرۋدى كوبەيتۋ ارقىلى كاسىپكەرلىكتى دامىتۋ ماڭىزدى بولىپ وتىر. ءماجىلىس دەپۋتاتتارى اعىمداعى جىلى مەملەكەتتىك باعدارلاما ارقىلى تومەن پايىزبەن 14 ميلليون قاراجات الىپ, تاۋلىك بويى جۇمىس جاسايتىن ءسان سالونىن اشقان تۇرسىناي بايعابىلوۆانىڭ جۇمىسىمەن تانىستى.
بۇدان كەيىن رەسپۋبليكالىق كەڭەس مۇشەلەرى, دەپۋتاتتاردىڭ قاتىسۋىمەن م.ح.دۋلاتي اتىنداعى تاراز مەملەكەتتىك ۋنيۆەرسيتەتىندە كەڭەس وتىرىسى ءوتتى. جيىندا جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ پرەزيدەنتتىڭ بەس الەۋمەتتىك باستاماسى اياسىندا ايماقتا اتقارىلىپ جاتقان جۇمىستار جونىندە مالىمدەسە, تارمۋ رەكتورى, پەداگوگيكا عىلىمدارىنىڭ دوكتورى ماحمەتعالي سارىبەكوۆ ستۋدەنتتەردى جاتاقحانامەن قامتۋ جايىن باياندادى. ءوز سوزدەرىندە ءابدىماناپ بەكتۇرعانوۆ پەن جامبىل احمەتبەكوۆ ەلباسىنىڭ بەس باستاماسىنىڭ جامبىل وڭىرىندەگى ورىندالۋ بارىسىنا وڭ باعا بەرىپ, ءالى دە جۇمىستاردى جانداندىرۋ كەرەكتىگىن ايتتى. سونىمەن قاتار دەپۋتاتتار بۇل جۇمىس ساپارى بويىنشا جاسالعان تالداۋ ۇكىمەتكە جولداناتىنىن, ەلباسىعا باياندالاتىن قورىتىندىعا نەگىز بولاتىنىن جەتكىزدى.
حاميت ەسامان,
«ەگەمەن قازاقستان»
جامبىل وبلىسى
