سول سياقتى شاعىن شارۋاشىلىق اشقانىمەن, باسىنا تارتسا ەتەككە جەتپەي كۇنى قۇر كىجىنۋمەن ءوتىپ جۇرگەن ازاماتتار كوپ. ازىن-اۋلاق جەرىن جىرتىپ الۋعا تەحنيكا جوق. تەحنيكا جوقتىقتان قىستىققا جەم-ءشوپ دايىنداي الماي, قىمبات باعاعا ساتىپ الۋعا ءماجبۇر بولادى. قولدا ناقتى اقشا جوق. مال – ايىرباس قۇرالى. شىعىندانا بەرگەن سوڭ مال باسى وسە مە؟! جەڭىلدەتىلگەن نەسيە الايىن دەسە بانككە قويار ىلكىمدى دۇنيەسى, جىلجىمايتىن مۇلكى جوق, مەملەكەتتەن سۋبسيديا دا الا المايدى...
اۋەلدە ء«وزىم دەگەندە وگىز قارا كۇشىم بار» دەپ اعىنعا قارسى قويىپ كەتىپ, ارىنى قايتتى. مەملەكەتتىك باعدارلامالاردىڭ ءتيىمدى جاقتارىنا مويىن بۇردى. سونىڭ بىرەگەيى – اۋىل شارۋاشىلىعىنىڭ كووپەراتيۆى ەدى. كووپەراتيۆ مۇشەسى بولساڭ مەملەكەتتىك يگىلىكتەردىڭ ءبارى قيىندىقسىز بەرىلەدى. ارينە, بەس ساۋساق بىردەي ەمەستىگى سياقتى, كووپەراتيۆ باسشىلارىنىڭ ىسكەرلىگى, تازالىعى مۇندايدا ۇلكەن ءرول اتقارادى.
قىزىلوردا وبلىسىنىڭ شاعىن شارۋاشىلىق جەتەكشىلەرى كووپەراتيۆتەردىڭ تابىسقا شىعاراتىنىنا كوزدەرى جەتىپ بولدى. بيىلدىڭ وزىندە 250 جەكە شارۋاشىلىقتىڭ 18 اۋىل شارۋاشىلىعى كووپەراتيۆىنە بىرىككەنى سونىڭ ايعاعى.
ونىمدىلىك تە جىل سايىن مولايىپ كەلەدى. ماسەلەن, 2017 جىلى كووپەراتيۆتەر 342 توننا ەت, 133 توننا ءسۇت دايىنداسا, بيىلعى جارتى جىلدىقتىڭ وزىندە 206 توننا ەت, 253 توننا ءسۇت ازىرلەۋگە قول جەتكىزگەن.
بۇگىندە وبلىستا 2320 شارۋا قوجالىعىن بىرىكتىرگەن 105 كووپەراتيۆ بار. بۇل 800 وتباسىلىق مال بورداقىلاۋ الاڭى مەن 385 ءسۇت فەرماسىن قۇرۋعا مۇمكىندىك بەرىپ وتىر. سونداي-اق ايماقتا قۇس شارۋاشىلىعى جاقسى دامىپ كەلەدى. بىلتىر شيەلى اۋدانىندا العاشقى قۇس فابريكاسى سالىندى. سونىمەن قاتار, وتكەن جىلى تاعى ەكى قۇس فابريكاسى اشىلدى. ناتيجەسىندە اعىمداعى جىلدىڭ 6 ايىندا قۇس سانى 36 پايىزعا, ال جۇمىرتقا ءوندىرۋ 45 پايىزعا ارتتى. بيىل قارماقشى اۋدانىندا «بايقوڭىر» اكك-مەن جىلىنا قۋاتتىلىعى 1500 توننا ەت وندىرەتىن تاعى ءبىر قۇس فابريكاسىنىڭ قۇرىلىسى باستالدى. كەيىنگى جىلدارى وسىنداي يگى ىستەردەن ىشكى جالپى ءونىمنىڭ وسكەندىگى ايتارلىقتاي بايقالادى.
بۇگىندە «ساتىپ ال دا قايتا سات» ۇستانىمىنىڭ داۋرەنى اياقتالىپ كەلە جاتقانىن ىسكەر ازاماتتار اڭعارىپ, نەگىزگى ينۆەستيتسيانى اۋىل شارۋاشىلىعىنا سالا باستادى. بۇل – وتە قۇپتارلىق ءىس. كووپەراتيۆتەر كوبەيسە ەلىمىزدىڭ ازىق-ت ۇلىك قاۋىپسىزدىگى نىعايادى. سىرتتان كەلەتىن ساپاسى كۇماندى تاۋارلارعا توسقاۋىل جاسايدى. وتاندىق تاۋارلاردىڭ بەلسەندىلىگى كوزگە كورىنىپ, ەڭ باستىسى, ەڭبەككە دەگەن قۇلشىنىس ارتادى.
كۇنى كەشە ءشىلدىڭ قيىنداي جان-جاققا پىشىراعان ۇساق شارۋاشىلىقتار كووپەراتيۆكە بىرىگۋ ارقىلى تابىسقا شىعۋعا بولاتىنىنا كوزدەرى جەتىپ كەلەدى.
باقتيار تايجان,
«ەگەمەن قازاقستان»
قىزىلوردا
