مەكتەپتە سۋرەت پانىنەن ساباق بەرەتىن اعايلارى پەتروپاۆل قالاسىندا دارىندى بالالاردى مۋزىكالىق-ەستەتيكالىق باعىتتا تاربيەلەيتىن ونەر كوللەدجى كەشەنى جۇمىس ىستەيتىنىن, ساپالى ءبىلىم بەرەتىنىن, ەكى قىزى وسىندا وقيتىنىن ايتىپ, بارۋلارىن قيىلا وتىنگەن. بۇل ۇسىنىس انالارى سالتاناتقا وي سالعانىمەن, بىردەن شەشىم قابىلداۋعا جۇرەكسىنگەن. ءتورت جاسىندا اسقار تاۋ پانالارى قايتىس بولعان قوس قۇلىنىنىڭ كوز الدىندا ءجۇرۋىن ىشتەي قالاعان. دەسە دە اكە اقىلىنا جۇگىنۋدى ءجون كورگەن.
ەرمەك اقساقالدىڭ نەگىزگى ماماندىعى سۋرەتشىلىك-تۇعىن. قىرىق جىلدان استام شاكىرت تاربيەلەگەن ونىڭ تاجىريبەسى دە, ومىردەن توقىعانى دا مول. كەڭىنەن تولعاپ, كەسىمدى شەشىم ايتاردا تاماعىن ءبىر قىرناپ الاتىن ادەتىمەن ءوز ويىن بىلاي ساباقتاعان: «اتىڭ باردا جەر تانى جەلىپ ءجۇرىپ» دەگەن ەكەن بابالارىمىز. توماعاسىن سىپىرىپ, قۇسقا سالار جاس قىران دا باپ تىلەيدى. بارماقتاي باقتان گورى تاۋداي تالاپتى ارقالاپ, ەڭبەكتىڭ اششى ءدامىن تاتقان جانعا جەمىسى ءتاتتى كەلەدى». وسىلايشا جيەندەرىنە اق جول تىلەپ, اتالىق باتاسىن بەرگەن.
الاۋلاعان ارمان وتىن تۇتاتقان قوس ءورىم 2013 جىلى اتالمىش كەشەن قۇرامىنداعى مۋزىكالىق مەكتەپتىڭ جەتىنشى سىنىبىنا قابىلدانادى. بۇگىندە ونەر كوللەدجىنىڭ ەكى كۋرسىن ءتامامداپ, قياعا قيالاي سالعان ورنەكتى ىزدەرى شىن تالانتتىڭ تاستى دا جارىپ شىعاتىنىن ايعاقتايدى.
– ونەر ورىندە ءور مىنەزدىلىك تانىتۋدى جۇرەكپەن سەزىنۋگە انامىزدىڭ ۇلكەن ىقپالى بولدى. جاستايىمىزدان بي ۇيىرمەسىنە قاتىستىق. كەيىن ءان ايتۋعا, مۋزىكالىق اسپاپتاردا ويناۋعا ماشىقتاندىق. بۇل قاسيەتتەر سەگىز قىرلى, ءبىر سىرلى ناعاشى اتامىزدان جۇققان سەكىلدى,–دەيدى ونەردە دە, ومىردە دە جۇپتارى جازىلماي كەلە جاتقان ەگىز قىزدار.
التىنجان جۋىردا قۇرمانعازى اتىنداعى ۇلتتىق كونسەرۆاتوريا ۇيىمداستىرعان كىشى وليمپياداعا پريما-قوبىز اتالىمى بويىنشا قاتىسىپ, ەكىنشى ورىندى يەلەندى. بۇعان رەسپۋبليكالىق «جاس تالانت», «اق سۇڭقار», «كوشپەندىلەر اۋەنى», حالىقارالىق ء«سىبىر جۇلدىزداردى جاعادى» اتتى بايقاۋلاردا لاۋرەات, ديپلومانت اتانعانىن قوسساق, العان اسۋلارى قوماقتى ەكەنى بىردەن اڭعارىلادى. وبلىستىق فيلارمونيا جانىنداعى «القيسسا» انسامبلىندە ونەر كورسەتەدى. التىنشاشتىڭ دا جەتكەن جەتىستىكتەرى از ەمەس. سونىڭ ءبىر مىسالىنا رەسەيدىڭ قورعان قالاسىندا وتكەن حالىقارالىق دودادا گران-پري جەڭىپ العانىن ايتساق تا جەتكىلىكتى. سيمفونيالىق وركەستردىڭ بەلدى مۇشەسى.
فورتەپيانو, پريما-قوبىز, كلارنەت, جەتىگەن سەكىلدى مۋزىكالىق اسپاپتاردى جەتىك مەڭگەرگەن ەگىز قىزدار ۇكىلەپ قوسقان تالاي ونەر جارىستارىندا توپ جارىپ, ەل نامىسىن ابىرويمەن قورعاپ كەلەدى.
ءومىر ەسقالي,
«ەگەمەن قازاقستان»
پەتروپاۆل
